ប្រសិនបើអ្នកចង់បានដំបូន្មានហិរញ្ញវត្ថុផ្ទាល់ខ្លួនពីអ្នកណាម្នាក់ មហាសេដ្ឋី Mark Cuban អាចជាគំរូមួយដ៏ល្អ។ លោក Mark Cuban គឺ ជាអ្នកផលិតកម្មវិធីទូរទស្សន៍ដ៏ល្បី Shark Tank និងម្ចាស់ក្រុមហ៊ុន Dallas Mavericks បានលក់ក្រុមហ៊ុន startup របស់ខ្លួនទៅឲ្យក្រុមហ៊ុន CompuServe ក្នុងឆ្នាំ១៩៩០ ក្នុងតម្លៃ ៦លានដុល្លារ បន្ទាប់មកគាត់បានលក់អាជីវកម្មទី២ របស់គាត់ទៅឲ្យក្រុមហ៊ុន Yahoo ក្នុងតំលៃ ៥.៩ លានដុល្លារក្នុងឆ្នាំ ១៩៩៩។
ចាប់តាំងពីពេលនោះមក គាត់បានបង្កើត និងទិញអាជីវកម្មជាច្រើន ហើយបានវិនិយោគនៅក្នុងក្រុមហ៊ុនជាច្រើនទៀតផងដែរ។ យ៉ាងណាមិញខាងក្រោមនេះជាដំបូន្មានចំនួន ៤ ពីមហាសេដ្ឋីរូបនេះ ដែលអ្នកគួរធ្វើជាមួយប្រាក់របស់អ្នក៖
១.ចាប់ផ្ដើមដោយការសងបំណុលទាំងអស់៖ មហាសេដ្ឋី Cuban បាននិយាយនៅក្នុងបទសម្ភាសន៍ជាមួយ MarketWatch ថា « ការវិនិយោគដ៏ល្អបំផុតដែលអាចធ្វើបានគឺ ទូទាត់កាតឥណទានរបស់អ្នក និងទូទាត់បំណុលដែលអ្នកមានទាំងអស់។ ហើយក្នុងករណីដែលអ្នកមានប្រាក់កម្ចីនិស្សិត ជាមួយនឹងអត្រាការប្រាក់ ៧% ប្រសិនបើអ្នកសងប្រាក់កម្ចីនោះអ្នកនឹងទទួលបាន ៧% នោះ គឺជាការត្រឡប់មកវិញភ្លាមៗរបស់អ្នក ដែលវិធីនេះវាមានសុវត្ថិភាពជាងការជ្រើសរើសវិនិយោគលើភាគហ៊ុន ឬ ព្យាយាមជ្រើសរើសយកអចលនទ្រព្យ។ ជាការពិតណាស់ប័ណ្ណឥណទានមានអត្រាការប្រាក់ខ្ពស់ជាងនេះ ដូច្នេះវាមានគុណប្រយោជន៍កាន់តែធំក្នុងការទូទាត់ឱ្យពួកគេ។
២.សន្សំប្រាក់ចំណូលឲ្យបាន ៦ខែ៖ លោក Cuban មហាសេដ្ឋីពាន់លានបានប្រាប់ Vanity Fair ថា អ្នកគួរតែព្យាយាមសន្សំប្រាក់ចំណូលឱ្យបាន ៦ខែ និងរក្សាវាឲ្យបានគង់វង្ស។ គាត់បានពន្យល់ថា ប្រសិនបើអ្នកមិនចូលចិត្តការងាររបស់អ្នកនៅចំណុចណាមួយ ឬ អ្នកត្រូវគេបណ្តេញចេញ និងមួយវិញទៀត ប្រសិនបើអ្នកអ្នកត្រូវផ្លាស់ប្តូរ ឬ មានអ្វីខុស អ្នកនឹងត្រូវការប្រាក់ចំណូលយ៉ាងហោចណាស់ប្រាំមួយខែមុនពេលអាចរកការងារថ្មីបាន។
៣.គួរតែមានប្រាក់វិនិយោគ ១០% នៃចំនួនសរុបនៅពេលវិនិយោគអ្វីមួយ៖ លោក Cuban បានទទួលស្គាល់ថា មហាសេដ្ឋីដែលបង្កើតឡើងដោយខ្លួនឯងអាចឈានដល់កម្រិតជាមហាសេដ្ឋីបាន ដោយសារការប្រថុយប្រថានក្នុងការវិនិយោគ។ ដូច្នេះការវិនិយោគលើអ្វីមួយដែលប្រថុយប្រថាន គឺជាពិតជាល្អ ដរាបណាអ្នកកំណត់ថាអ្នកមាន ១០% នៃការវិនិយោគសរុបរបស់អ្នក។
៤.ទិញទំនិញពេលបញ្ចុះតម្លៃ៖ នេះគឺជាដំបូន្មានហិរញ្ញវត្ថុផ្ទាល់ខ្លួនដែលមនុស្សភាគច្រើនធ្វើ ហើយវាក៏ជាទម្លាប់មួយរបស់មហាសេដ្ឋី Cuban ផងដែរ។ នៅក្នុងពេលបច្ចុប្បន្ននេះ វាពិតជាពិបាកណាស់ក្នុងការស្វែងរកប្រាក់ចំណូលខ្ពស់ ហើយនិងប្រាក់ចំណេញច្រើនពីការវិនិយោគ ដូច្នេះមហាសេដ្ឋីរូបនេះណែនាំថា អ្នកគួរតែទិញរបស់របរណាដែលប្រើបានយូរឆ្នាំ ទុកសម្រាប់រយៈពេល ២ឆ្នាំ ប្រសិនបើវាបញ្ចុះតម្លៃ ៥០%។ គាត់បានពន្យល់ថា ការសន្សំសំចៃតាមវិធីនេះ នឹងធ្វើឲ្យអ្នកប្រើប្រាស់ខ្ទង់ចំណាយបានល្អ ហើយវាប្រសើរជាងការរកលុយដែលបានមកការវិនិយោគទៅទៀត ព្រោះប្រាក់ដែលអ្នកចំណេញនេះមិនចាំបាច់ក្នុងការបង់ពន្ធ៕
អត្ថបទ៖ លីនី
ប្រភព៖ inc