ឯកឧត្តម ឃឹម ហ្វីណង់ អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងកាលពីថ្មីៗនេះថា ក្នុងកាលៈទេសៈដែលថ្លៃស្រូវនៃពូជមកពីប្រទេសដទៃកំពុងស្ថិតក្នុងភាពស្រពេចស្រពិល និងមានការប្រែប្រួលខ្លាំង ប្រជាកសិករជិត១០០គ្រួសារនៅក្នុង ស្រុកបារាយណ៍ ខេត្តកំពង់ធំ បានស្ម័គ្រចិត្តចងក្រងគ្នាជាសហគមន៍កសិកម្មទំនើប និងជ្រើសរើសផលិតស្រូវសែនក្រអូបលើផ្ទៃដីដាំដុះជាង២០០០ហិកតា ដើម្បីទទួលបានតម្លៃពិសេស ១៣៥០រៀលក្នុងមួយគីឡូក្រាម ដែលជាតម្លៃចុះកិច្ចសន្យាទុកជាមុន។ មន្ត្រីជាន់ខ្ណស់ខាងលើ បានបន្ថែមថា មានតែការចងក្រងគ្នាជាសហគមន៍កសិកម្មទំនើបទេ ទើបអាចទទួលបានការធានាថ្លៃទុកជាមុនតាមរយៈការធ្វើផលិតកម្មកសិកម្មតាមកិច្ចសន្យាទៅបាន។ ពូជស្រូវយុទ្ធសាស្ត្ររបស់កម្ពុជាដូចជាស្រូវសែនក្រអូប ដែលធ្លាប់ឈ្នះពានរង្វាន់មាសរហូតដល់ទៅ២ដង តែងមានស្ថេរភាពថ្លៃជាងស្រូវដទៃទៀត ព្រោះយើងមានទីផ្សារនាំចេញច្បាស់លាស់ ហើយក៏មានបណ្តាញរោងម៉ាស៊ីនដែលធ្វើការដោយផ្ទាល់ជាមួយក្រសួង ដែលអាចឱ្យយើងអន្តរាគមន៍ក្នុងករណីចាំបាច់បានផងដែរ។ បើមិនមានអ្វីប្រែប្រួលទេ សហគមន៍កសិកម្មទំនើប មួយនេះនឹងអាចដំណើរការបានក្នុងរយៈពេល២-៣ខែខាងមុខ ជាមួយនឹងការគ្រប់គ្រងម៉ាសុីនបូមទឹកខ្នាតធំ និងប្រព័ន្ធធារាសាស្ត្រដែលក្រសួងកសិកម្មទើបបានវិនិយោគរួចជាស្រេចក្នុងតំបន់នេះ ដែលនឹងក្លាយទៅជាមុខរបរបន្ថែមមួយទៀតរបស់សហគមន៍ផងដែរ៕

ឯកឧត្តម ឃឹម ហ្វីណង់ អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងនៅថ្ងៃទី០៦ ខែមករា ឆ្នាំ២០២៥ ថា ពីរទៅបីឆ្នាំចុងក្រោយនេះ ផ្ទៃដីផលិតកម្មស្រូវក្នុងខេត្តពោធិ៍សាត់បានកើនឡើងគួរឱ្យកត់សម្គាល់ពីជាង១៥០ ០០០ហិកតា រហូតដល់ជិត ២០០ ០០០ហិកតា បើគិតត្រឹមដំណាច់ឆ្នាំ២០២៤ ។ ក្នុងឱកាសដឹកនាំកិច្ចប្រជុំបូកសរុបលទ្ធផលការងារប្រចាំឆ្នាំ២០២៤ របស់មន្ទីរកសិកម្មខេត្តពោធិ៍សាត់ និងទិសដៅបន្តសម្រាប់ ឆ្នាំ២០២៥ នៅចុងសប្តាហ៍កន្លងទៅនេះ ក្នុងនាមថ្នាក់ដឹកនាំក្រសួងទទួលបន្ទុកខេត្តពោធិ៍សាត់ ឯកឧត្តម ឃឹម ហ្វីណង់ បានណែនាំឱ្យមន្ទីរព្យាយាមចងក្រងបងប្អូនកសិករដែលធ្វើផលិតកម្មស្រូវប្រាំងនៅលើតំបន់ដែលមានភាពប្រថុយប្រថានខ្ពស់ទាំងនោះ ឱ្យទៅជាសហគមន៍កសិកម្មទំនើប និងរៀបចំជាផែនទីតម្រង់ទិសឱ្យបានច្បាស់លាស់ ដើម្បីងាយស្រួលគ្រប់គ្រង ផ្សព្វផ្សាយ ក៏ដូចជាត្រៀមផែនការអន្តរាគមន៍ក្នុងករណីចាំបាច់។

យោងតាមសូចនាករម៉ាក្រូសេដ្ឋកិច្ចដែលរៀបចំឡើងដោយក្រសួងសេដ្ឋកិច្ច និងហិរញ្ញវត្ថុ បានវាយតម្លៃ និងព្យាករកំណើនសេដ្ឋកិច្ចកម្ពុជាឆ្នាំ២០២៥នេះថា នឹងទទួលបានក្នុងរង្វង់៦,៣ភាគរយ។ ជាមួយគ្នានេះផលិតផលក្នុងស្រុកសរុប សម្រាប់មនុស្សម្នាក់ៗនៅ ឆ្នាំ២០២៥នេះ ត្រូវបានរំពឹងថា នឹងកើនឡើងដល់ ២៩២៤ ដុល្លារ ដែលជាការកើនឡើងជាង ៤០ ភាគរយ ធៀបនឹងតួលេខ ដែលបានព្យាករនៅឆ្នាំ ២០២៤ ។ ការព្យាករណ៍កំណើនសេដ្ឋកិច្ចកម្ពុជាឆ្នាំ២០២៥នេះ បានធ្វើឡើងយោងទៅតាម កំណើនសេដ្ឋកិច្ចកម្ពុជា ដែលបានរំពឹងថានឹងងើបឡើងវិញក្នុងអត្រា ៦,០% នៅក្នុងឆ្នាំ ២០២៤នេះ ដោយយោងទៅលើសកម្មភាពនៃការវិនិយោគលើសហគ្រាសធុនតូច និងមធ្យម, ហេដ្ឋារចនាសម្ព័ន្ធឌីជីថល និងបៃតង ជាមួយ នឹងការចាប់ផ្តើម និងពន្លឿនការអនុវត្ត «យុទ្ធសាស្ត្របញ្ចកោណ-ដំណាក់កាលទី១»

យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា រាជរដ្ឋាភិបាលតាមរយៈក្រសួងសេដ្ឋកិច្ច និងហិរញ្ញវត្ថុ បានបង្កើតក្រុមការងារ បច្ចេកទេសសម្រាប់គម្រោងអភិវឌ្ឍន៍លំនៅឋាន តម្លៃសមរម្យនៅកម្ពុជា ក្នុងគោលបំណងជំរុញការអភិឌ្ឍគម្រោងលំនៅឋានតម្លៃសមរម្យសម្រាប់ជួយដល់ប្រជាពលរដ្ឋ ដែលមានប្រាក់ចំណូលទាប និងមធ្យម ជាពិសេសមន្ត្រីរាជការឱ្យទទួលបានលំនៅឋានស្នាក់នៅសមរម្យ។ ក្រុមការងារ បច្ចេកទេសនេះ ជាសេនាធិការ នៃគណៈកម្មាធិការអន្តរក្រសួងសម្រាប់គម្រោង អភិវឌ្ឍន៍លំនៅឋានតម្លៃសមរម្យដែលមានសមាសភាពចំនួន ១២រូប ក្នុងនោះឯកឧត្តម ឱម ម៉ាក់ធារិទ្ធ ដែលជាអគ្គនាយក នៃអគ្គនាយកដ្ឋានភាពជាដៃគូរវាងរដ្ឋ និងឯកជន គឺជាប្រធានក្រុមការងារ។ ក្រុមការងារបច្ចេកទេសនេះ មានតួនាទី និងភារកិច្ច សំខាន់ៗដូចជា សម្របសម្រួលការលើកលែងពន្ធ ការបន្ធូរបន្ថយពន្ធ ឬការដាក់ពន្ធជាបន្ទុករបស់រដ្ឋ ដោយធ្វើការវាយតម្លៃផលប៉ះពាល់លើចំណូលរបស់រដ្ឋ ដើម្បីជាមូលដ្ឋាននៃការសម្រេចចិត្តរបស់រាជរដ្ឋាភិបាល

យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា កិច្ចប្រជុំនាពេលនេះធ្វើឡើងក្នុងគោលបំណង ដើម្បីពិភាក្សាការងារទាក់ទិនទៅនឹងប្រាក់កម្ចីរបស់អ្នកអភិវឌ្ឍន៍លំនៅឋាន និងអតិថិជន ដោយស្វែងរកការសម្របសម្រួល និងរៀបចំនីតិវិធីឯកភាពក្នុងការ ផ្តល់លទ្ធភាពឱ្យក្រុមហ៊ុនអភិវឌ្ឍន៍លំនៅឋាន និងទិញលំនៅឋាន ទទួលបានកម្ចីមានការប្រាក់សមរម្យទទួលយកបាន ដែលអត្រាការប្រាក់ថ្មីនេះ នឹងផ្តល់ឱ្យអតិថិជនក៏ដូចជាស្ថាប័នហិរញ្ញវត្ថុ បន្តដំណើរការទូទាត់កាន់តែមានសុវត្ថិភាព និងងាយស្រួល។ ថ្លែងក្នុងកិច្ចប្រជុំជាមួយក្រុមការងារផ្នែកសំណង់ និងអចលនទ្រព្យ ផ្នែកឯកជន “ក្រុមឌ” វិស័យធនាគារនិងហិរញ្ញវត្ថុដែលបានធ្វើឡើងនៅទីស្ដីការក្រសួងរៀបចំដែនដី នគរូបនីយកម្ម និងសំណង់ នាថ្ងៃទី៣ ខែមករា ឆ្នាំ២០២៥។ ទន្ទឹមនេះក៏ដើម្បីស្តាប់ និងពិភាក្សាស៊ីជម្រៅជាមួយស្ថាប័នធនាគារ ហិរញ្ញវត្ថុ និង ភាគីពាក់ព័ន្ធ

យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា វិស័យសំណង់ និងអចលនទ្រព្យក្នុង​ប្រទេស​កម្ពុជា នាឆ្នាំ២០២៤​កន្លងទៅនេះ មាន​សញ្ញាវិជ្ជមាន​ឡើងវិញ ក្នុងនោះ ការ​ផ្ដល់​ឥណទាន​ក្នុងវិស័យ​សំណង់ និងអចលនទ្រព្យ​ បានកើនទំហំទឹកប្រាក់ ១៣,៥១​ ពាន់​លានដុល្លារ​អាមេរិក។ នេះបើតាម​របាយការណ៍​របស់​ធនាគារ​ជាតិ​នៃ​កម្ពុជា​ចេញផ្សាយកាលពីចុង​ខែធ្នូ ឆ្នាំ២០២៤​ថ្មីៗនេះ។ ក្នុង​របាយការណ៍ដែលគិតត្រឹម​ខែ​តុលា ឆ្នាំ២០២៤ បានបង្ហាញថា ឥណទានក្នុងវិស័យសំណង់​មានទំហំទឹក​ប្រាក់ប្រមាណ ២៩ ១៩៩​ពាន់​​លានរៀល ឬស្មើនឹ​ង​ប្រមាណ ៧,៣ពាន់លានដុល្លារ បើប្រៀប​​ធៀប​នឹង​​ឆ្នាំ២០២៣​មានការកើនឡើង​ប្រមាណ ៣៣,៣ភាគរយ ។ ចំណែក​ការ​ផ្ដល់ឥណទាន​ទៅក្នុងវិស័យ​អច​ល​ន​ទ្រ​​ព្យមានទំហំ​ទឹកប្រាក់ប្រមាណ ២៤ ៨៦៣ពាន់លានរៀល ឬ​ស្មើនឹងប្រមាណ ៦,២១ពាន់លាន​ដុល្លារ​​ បើ​ប្រៀបធៀបនឹង​ឆ្នាំ២០២៣​ កើនឡើង​ប្រមាណ​១៧,៨ភាគរយ​ ។​​

យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា គិតត្រឹមចុងឆ្នាំ២០២៤ ទំហំពាណិជ្ជកម្មទ្វេភាគី កម្ពុជា-សាធារណរដ្ឋ​កូរ៉េ សម្រេចបាន ៧៦២លានដុល្លារអាម៉េរិក​កើនឡើង១១,៤៩ភាគរយ ក្នុងនេះការនាំចេញរបស់កម្ពុជាសម្រេចបាន ២៨៨លានដុល្លារ កើន​ឡើង ១៣,៧៧ភាគរយ។នេះបើយោងតាមរបាយការណ៍​របស់ក្រសួង​ពាណិជ្ជកម្ម។ ទាក់ទងនឹងទំនាក់ទំនងពាណិជ្ជកម្មនៃប្រទេសទាំងពីរ ក្រសួងពាណិជ្ជ​កម្ម​បានបញ្ជាក់ថា​កិច្ចប្រជុំលើកទី១នៃគណៈ​កម្មា​ធិការ​​ចម្រុះកិច្ចព្រម​ព្រៀងពាណិជ្ជកម្មសេរី កម្ពុជា-កូរ៉េ នៅសាធារណរដ្ឋកូរ៉េបានអនុម័ត​លើវិធាននៃនីតិវិធីសម្រាប់​គណៈ​កម្មា​ធិការចម្រុះ,ពិនិត្យនិង​ផ្តល់​អនុសាសន៍លើលទ្ធផល នៃកិច្ចពិភាក្សារបស់ គណៈកម្មការក្រោម​ចំណុះចំនួន៣ រួមមាន៖ (១)-គណៈកម្មការ ពាណិជ្ជកម្មទំនិញ (២)-គណៈកម្មការវិធានដើមកំណើតទំនិញ និង នីតិវិធីគយ និង(៣)-គណៈ​កម្មការ​សហ​ប្រតិបត្តិការសេដ្ឋកិច្ច,លើកទឹកចិត្តឱ្យគណៈ​កម្មាធិកា​ររៀបចំកិច្ចប្រជុំជាទៀងទាត់ និង ប្រឹងប្រែងផ្សព្វផ្សាយពី កិច្ចព្រមព្រៀង​ពាណិជ្ជកម្មសេរីកម្ពុជា-កូរ៉េ ដើម្បីទាញយកប្រយោជន៍ជា​អតិបរមាពី​កិច្ចព្រមព្រៀងនេះ។ គណៈកម្មាធិការចម្រុះកិច្ចព្រមព្រៀងពាណិជ្ជកម្មសេរី កម្ពុជា-កូរ៉េ ក៏បានឯកភាពបន្តការពិភាក្សាដើម្បីផ្តួចផ្តើមការចរចា​លើផ្នែក​ពាណិជ្ជកម្ម សេវាកម្ម និងវិនិយោគ

ក្រសួងសេដ្ឋកិច្ច និងហិរញ្ញវត្ថុ នាថ្ងៃទី៣១ ខែធ្នូ ឆ្នាំ២០២៤ កន្លងទៅថ្មីៗ បានចេញសេចក្ដីជូនដំណឹងស្ដីពីការលើកលែង និងអនុគ្រោះពន្ធប្រថាប់ត្រាលើការផ្ទេរកម្មសិទ្ធិ ឬ សិទ្ធិកាន់កាប់អចលនទ្រព្យសម្រាប់អ្នកទិញលំនៅដ្ឋាន និង/ ឬ ផ្ទេរកម្មសិទ្ធិជាលើកដំបូង (First-Time Home Buyer) ដែលត្រូវអនុវត្តចាប់ថ្ងៃទី០១ ខែមករា ឆ្នាំ២០២៥ រហូតដល់ថ្ងៃទី៣១ ខែធ្នូ ឆ្នាំ២០២៥)។ ការលើកលែង និងអនុគ្រោះខាងលើនេះ បានធ្វើឡើងដោយអនុលោមតាមចំណារឯកភាពដ៏ខ្ពង់ខ្ពស់របស់សម្ដេចមហាសេនាធិបតី ហ៊ុន ម៉ាណែត ដែលចុះនៅថ្ងៃទី១៨ ខែវិច្ឆិកា ឆ្នាំ២០២៤ លើលិខិតលេខ ១២១៦៦ សហវ.លល.គសហ ចុះថ្ងៃទី១៣