អាល្លឺម៉ង់សន្យាផ្ដល់ហិរញ្ញប្បទានឥតសំណងប្រមាណ ៥៣លានអឺរ៉ូ សមមូលនឹង ៦៣លានដុល្លារអាមេរិក ដើម្បីចូលរួមចំណែកជាមួយរាជរដ្ឋាភិបាលកម្ពុជា ក្នុងការកាត់បន្ថយភាពក្រីក្រ និងលើកកម្ពស់ជីវភាពរស់នៅរបស់ប្រជាជនកម្ពុជា សម្រាប់ឆ្នាំ២០២១-២០២២។ ការសន្យាផ្ដល់ជំនួយនេះត្រូវបានលើកឡើងនៅក្នុងកិច្ចចរចាស្តីពីកិច្ចសហប្រតិបត្តិការអភិវឌ្ឍន៍ឆ្នាំ២០២១ រវាងរាជរដ្ឋាភិបាលកម្ពុជា និងរដ្ឋាភិបាលនៃសាធារណរដ្ឋសហព័ន្ធអាល្លឺម៉ង់ ដោយភាគីកម្ពុជាដឹកនាំដោយ ឯកឧត្ដម ឈៀង យ៉ាណារ៉ា រដ្ឋមន្រ្តីប្រតិភូអមនាយករដ្ឋមន្រ្តី អគ្គលេខាធិការគណៈកម្មាធិការនីតិសម្បទា និងអភិវឌ្ឍន៍កម្ពុជានៃក្រុមប្រឹក្សាអភិវឌ្ឍន៍កម្ពុជា (គ.ជ.នា/ក.អ.ក) និងមានការអញ្ជើញចូលរួមពីមន្រ្តីជាន់ខ្ពស់ និងមន្រ្តីជំនាញជាតំណាងមកពីក្រសួង-ស្ថាប័នពាក់ព័ន្ធនៃរាជរដ្ឋាភិបាលចំនួន ១៨ ។
រីឯភាគីអាល្លឺម៉ង់ដឹកនាំដោយ ឯកឧត្ដម Norbert Barthle សមាជិកសភានៃសាធារណរដ្ឋសហព័ន្ធអាល្លឺម៉ង់ និងជារដ្ឋលេខាធិការក្រសួងសហព័ន្ធអាល្លឺម៉ង់សម្រាប់សហប្រតិបត្តិការសេដ្ឋកិច្ច និងការអភិវឌ្ឍ (BMZ) អមដោយឯកឧត្ដម Christian Berger ឯកអគ្គរដ្ឋទូតនៃសាធារណរដ្ឋសហព័ន្ធអាល្លឺម៉ង់ប្រចាំព្រះរាជាណាចក្រកម្ពុជា លោកស្រី Gisela Hammerschmidt នាយិកា និងជាស្នងការទទួលបន្ទុកតំបន់អាស៊ីនៃ BMZ, លោកស្រី Bettina Horstmann ប្រធានទទួលបន្ទុកតំបន់អាស៊ីបូព៌ា និងអាស៊ីអាគ្នេយ៍នៃ BMZ ជាសហប្រធាននៃកិច្ចចរចា និងមន្ត្រីជាន់ខ្ពស់នៃស្ថានទូតអាល្លឺម៉ង់ ទីភ្នាក់ងារអាល្លឺម៉ង់សម្រាប់កិច្ចសហប្រតិបត្តិការអន្តរជាតិ (GIZ) ធនាគារអភិវឌ្ឍន៍អាល្លឺម៉ង់ (KfW) និងវិទ្យាសា្ថនជាតិមាត្រាសាស្រ្តអាល្លឺម៉ង់ (PTB) សរុបទាំងអស់ប្រមាណ ៧០ រូប។
នៅក្នុងសេចក្ដីប្រកាសព័ត៌មានស្ដីពីលទ្ធផលនៃ កិច្ចចរចាស្តីពីកិច្ចសហប្រតិបត្តិការអភិវឌ្ឍន៍ឆ្នាំ២០២១ រវាងរាជរដ្ឋាភិបាលកម្ពុជា និងរដ្ឋាភិបាលនៃសាធារណរដ្ឋសហព័ន្ធអាល្លឺម៉ង់ បានបង្ហាញថា ទំហំហិរញ្ញប្បទានឥតសំណងខាងលើនេះរួមមាន៖ ២៦លានអឺរ៉ូ សម្រាប់កិច្ចសហប្រតិបត្តិការផ្នែកហិរញ្ញវត្ថុ និង ២៧លានអឺរ៉ូ សម្រាប់កិច្ចសហប្រតិបត្តិការផ្នែកបច្ចេកទេស។
បន្ថែមពីលើនេះ នាខែមីនា ឆ្នាំ២០២១ ភាគីអាល្លឺម៉ង់ បានផ្ដល់ហិរញ្ញប្បទានឥតសំណងចំនួន ៤.៨លានអឺរ៉ូ សម្រាប់កិច្ចសហប្រតិបត្តិការផ្នែកបច្ចេកទេស។ បើបូកបញ្ចូលទាំងហិរញ្ញប្បទានដែលបានសន្យាផ្ដល់ក្នុងកិច្ចចចារនេះ ទំហំហិរញ្ញប្បទានសរុបបានកើនដល់ ៥៧.៨លានអឺរ៉ូ សមមូលនឹង ៦៩ លានដុល្លារអាមេរិក។
គួរបញ្ជាក់ផងដែរថា ដើម្បីឆ្លើយតបទៅនឹងវិបត្តិសុខភាពសកល គិតត្រឹមខែមីនា ឆ្នាំ២០២១ ភាគីអាល្លម៉ង់បានផ្ដល់ហិរញ្ញប្បទានឥតសំណងប្រមាណ ១៣.៨លានអឺរូ សមមូលនឹង ១៧លានដុល្លារ ដើម្បីគាំទ្រដល់វិធានការឆ្លើយតបបន្ទាន់ទៅនឹងការឆ្លងរីករាលដាលនៃជំងឺកូវីដ-១៩ នៅកម្ពុជា។ ហិរញ្ញប្បទាននេះ ត្រូវបានប្រើប្រាស់ ដើម្បីរួមចំណែកគាំទ្រដល់វិធានការឆ្លើយតបបន្ទាន់ទៅនឹងផលប៉ះពាល់នៃជំងឺកូវីដ-១៩ និងវិធានការស្ដារសេដ្ឋកិច្ចរបស់រាជរដ្ឋាភិបាលកម្ពុជា៕
អត្ថបទ៖ លីនី