Saki Tamogami អាយុ ៣៧ឆ្នាំ រស់នៅយ៉ាងសន្សំសំចៃ រហូតសម្រេចបំណងចង់មានផ្ទះចំនួន ៣ នៅអាយុ ៣៤ឆ្នាំ។ យោងតាមការចុះផ្សាយរបស់សារព័ត៌មាន yahoo ស្រ្តីជប៉ុនរូបនេះ បានប្រើពេល ១៦ឆ្នាំ ដើម្បីសម្រេចក្ដីសុបិន្តរបស់នាង ដោយចាយមួយថ្ងៃតែ ១.៥០ដុល្លារប៉ុណ្ណោះ។

Tamogami បានដាក់ក្ដីសុបិន្តនៅពេលនាងអាយុ ១៨ឆ្នាំ ហើយតាមរយៈមធ្យោបាយសន្សំជាច្រើន នៅវ័យ ២៧ឆ្នាំ នាងបានទិញផ្ទះជាលើកដំបូងនៅទីក្រុង Saitama ក្នុងតម្លៃ ១០លាន​យ៉េន (ប្រហែល ៧៥,០០០ ដុល្លារ)។​ ហើយ ២ឆ្នាំក្រោយមក Tamogami បានទិញលើកផ្ទះទីពីរក្នុងតម្លៃ ១៨លានយ៉េន (ប្រហែល ១៤០,០០០ដុល្លារ)។ នៅឆ្នាំ២០១៩ នៅពេលនាងមានអាយុ ៣៤ឆ្នាំ បានសម្រេចបំណងរបស់នាងជាមួយនឹងការទិញផ្ទះចុងក្រោយក្នុងតម្លៃ ៣៧លានយ៉េន (ប្រហែល ២៨០,០០០ដុល្លារ)។

ដើម្បីសម្រេចបាននូវគោលដៅនេះ Tamogami បានបង្ហាញពីការចំណាយប្រចាំថ្ងៃជាមធ្យម ៥០យ៉េន (ប្រហែល ០.៣៨ដុល្លារ) លើអាហារ ដូចជា មីអ៊ូដុន នំប៉័ងបន្ទះ និងបាយជាមួយនឹងត្រី។ នាងពូកែសន្សំសំចៃណាស់ ដោយសូម្បីតែសាប៊ូលាងចានក៏នាងប្រើតិចតួចដែរ ពោលគឺនាងមិនប្រើចានដាក់អាហារទេ គឺនាងញ៉ាំអាហារក្នុងឆ្នាំងតែម្ដង។

ជាងនេះទៅទៀត ចំពោះរបស់ប្រើប្រាស់នាងទិញតែទំនិញដែលគេបញ្ចុះតម្លៃប៉ុណ្ណោះ ហើយចំពោះខោអាវវិញ Tamogami មិនទិញថ្មីឡើយគឺនាងកែច្នៃខោអាវដែលបានពីសាច់ញាតិ និងទិញខោអាវជជុះ។ លើសពីនេះ នៅអាយុ ២៩ឆ្នាំ Tamogami បានទៅកាត់សក់ និងលក់សក់របស់នាងក្នុងតម្លៃ ៣,១០០ យ៉េន (ប្រហែល ២៣.៤០ដុល្លារ)។ សព្វថ្ងៃនេះ Tamogami ធ្វើការនៅក្នុងអចលនទ្រព្យ និងរកចំណូលដែលបានមកពីការជួលផ្ទះរបស់នាង៕

អត្ថបទ៖ លីនី
ប្រភព៖ yahoo