យោងតាមការចុះផ្សាយរបស់សារព័ត៌មាន vnexpress បានឱ្យដឹងថា ក្រុមហ៊ុន Nike កំពុងសំលឹងឃើញឱកាសងើបឡើងវិញ ខណៈរោងចក្រផលិតនៅវៀតណាមបានបើកដំណើរការឡើងវិញ។ ក្រុមហ៊ុនផលិតសម្លៀកបំពាក់កីឡា Nike មានទំនុកចិត្តថា ការបន្តផលិតឡើងវិញក្នុងប្រទេសវៀតណាម នឹងជំរុញការងើបឡើងវិញនាពេលអនាគតរបស់ក្រុមហ៊ុន។

ប្រធានផ្នែកហិរញ្ញវត្ថុ Matthew Friend បានប្រាប់កាសែត Wall Street Journal ថា៖ បើប្រៀបធៀបទៅនឹងកៅសិបថ្ងៃមុន យើងមានទំនុកចិត្តកាន់តែខ្លាំងឡើងថាការផ្គត់ផ្គង់នឹងធ្វើឱ្យមានដំណើរការធម្មតាក្នុងឆ្នាំសារពើពន្ធ ២០២៣ ដោយសាររោងចក្រទាំងអស់នៅក្នុងប្រទេសវៀតណាមកំពុងដំណើរការ ហើយការផលិតមានប្រហែល ៨០% នៃអ្វីដែលអ្វីដែលក្រុមហ៊ុនមាននៅមុនពេលបិទ។

គួរឱ្យដឹងថា វិធានការរក្សាគម្លាតពីសង្គមក្នុងប្រទេសវៀតណាម ដែលជាកន្លែងផលិតជាងពាក់កណ្តាលនៃស្បែកជើង និងប្រហែលមួយភាគបីនៃការផលិតសម្លៀកបំពាក់របស់ Nike បានដាក់ចេញក្នុងអំឡុងខែកក្កដាដល់ខែកញ្ញា ដែលបានបណ្តាលឱ្យក្រុមហ៊ុនលុបចោលការផលិតប្រហែល ១៣០លានផលិតផល៕

អត្ថបទ៖ លីនី
ប្រភព៖ vnexpress