លោក ហួម សារ៉ូម ជាកសិករ រស់នៅភូមិបាក់រទេះ ឃុំ ព្រែកហ្លួង ស្រុកឯកភ្នំ ខេត្តបាត់ដំបងបានប្រាប់ឱ្យដឹងថា ការដាំបន្លែត្រសក់ទ្រើង ជាមុខរបរបន្ថែមក្រៅពីធ្វើស្រែរបស់គ្រួសារលោក នេះបើយោងតាមការចុះផ្សាយរបស់ក្រសួងព័ត៌មាន។ លោករៀបរាប់ថា ការដាំត្រសក់នេះ ដំបូងត្រូវរៀបចំភ្ជួរដី និងហាលដីឱ្យស្ងួត មានកម្តៅគ្រប់គ្រាន់ ហើយយើងរៀបចំលើករង ដាក់សំពត់ភ្លៀង ដាក់ដំណក់ទឹក ។ បន្ទាប់មកទៀតត្រូវ ដាក់គ្រាប់ត្រសក់ដាំ ដោយប្រើជីលាមកគោ និង ប្រើទុយោដំណក់ទឹក រយៈពេល ៤ថ្ងៃ គឺត្រសក់ចាប់ ផ្តើមដុះ។

កសិកររូបនេះបន្តថា ពេលត្រសក់ដុះ យើងត្រូវថែរក្សាការពារពីពពួកសត្វល្អិត ដោយប្រើថ្នាំគីមីបាញ់ ហើយត្រសក់បានពីរសប្តាហ៍ ត្រូវរៀបចំដាក់ទ្រើង ។ លោកថា ចាប់តាំងពីដាំរហូតដល់ប្រមូលផល ប្រើរយៈពេល ជាង៣០ថ្ងៃ ។

លោក សារ៉ូម ថា ការងារដាំត្រសក់នេះ មិនសូវជាចំណេ ញច្រើននោះទេ ដោយត្រូវទូទាត់ថ្លៃដើម ពិសេសថ្នាំ ជីផ្សេងៗ ។ រីឯតម្លៃវិញបានប្រហែលជា ១២០០រៀល ទៅ ១៥០០រៀល ក្នុងមួយគីឡូក្រាម តែទីផ្សារប្រែប្រួលមិនទៀងនោះឡើយ ម្តងថ្លៃ ហើយពេលខ្លះធ្លាក់ដល់ទាបខ្លាំង រហូត ដល់ ២០០ ឬ ៣០០ រៀល ក៏មាន ។

តែយ៉ាងណា លោក សារ៉ូម នៅតែបន្តដាំបន្លែផ្សេងៗ ឬត្រសក់ យកលក់លើទីផ្សារ ដើម្បីបានចំណូលខ្លះ ទប់ទល់ជីវភាពគ្រួសារ ក្រៅពីធ្វើតែស្រែមួយមុខ និងជាជាងទុកដីទំនេរចោល ៕

ប្រភព៖ ក្រសួងព័ត៌មាន