ឧស្សាហកម្មដឹកអ្នកដំណើរ និងដឹកទំនិញតាមអាកាសរបស់សហរដ្ឋអាមេរិក បានមើលឃើញពីការធ្លាក់ចុះនៃការងារសរុប ២៩,០០០ នាក់ក្នុងមួយខែគិតត្រឹមពាក់កណ្តាលខែតុលា ដោយសារការរឹតត្បិតរបស់រដ្ឋាភិបាលលើការបញ្ឈប់បុគ្គលិកផុតកំណត់។ ក្រសួងដឹកជញ្ជូនសហរដ្ឋអាមេរិកបាននិយាយថា ក្រុមហ៊ុនអាកាសចរណ៍របស់អាមេរិកបានជួលកម្មករចំនួន ៦៧៣,២៧៨ នាក់នៅពាក់កណ្តាលខែតុលា ដែលតិចជាងខែមីនា ចំនួន ៨១,៧៤៩ នាក់ ខណៈពេលដែលតម្រូវការធ្វើដំណើររបស់សហរដ្ឋអាមេរិកបានចាប់ផ្តើមធ្លាក់ចុះយ៉ាងខ្លាំងដោយសារតែជំងឺរាតត្បាត Covid-19 ។

ចាប់តាំងពីខែមីនា ក្រុមហ៊ុនអាកាសចរណ៍ United Airlines បានកាត់បន្ថយកម្លាំងពលកម្មរបស់ខ្លួនចំនួន ៣២% ឬ ២៩,២៤៣ នាក់ខណៈដែលក្រុមហ៊ុនអាកាសចរណ៍ Delta Air Line បានកាត់បន្ថយបុគ្គលិករបស់ខ្លួន ៣២% ឫ ២៨,៧៥១ នាក់។

ទោះជាយ៉ាងណា ឧស្សាហកម្មអាកាសចរណ៍របស់អាមេរិកនៅតែខាតបង់រាប់ពាន់លានដុល្លារក្នុងមួយខែដោយសារតំរូវការការធ្វើដំណើរនៅតែធ្លាក់ចុះជាង ៦០% ហើយការផ្តល់យោបល់ស្តីពីការធ្វើដំណើរប្រឆាំងនឹងជំងឺឆ្លង Covid-19 នាពេលថ្មីៗនេះបានរារាំងដល់ការធ្វើដំណើរវិស្សមកាល។

ទន្ទឹមនឹងនេះ រដ្ឋលេខាធិការក្រសួងរតនាគារលោក Steven Mnuchin បាននិយាយកាលពីថ្ងៃពុធថា លោកគាំទ្រដល់ការផ្តល់ប្រាក់បៀវត្សរ៍បន្ថែមចំនួន ២០ ពាន់លានដុល្លារបន្ថែមទៀតរបស់រដ្ឋាភិបាល សម្រាប់ក្រុមហ៊ុនអាកាសចរណ៍ដែលអាចជួយកម្មកររាប់ម៉ឺននាក់ឱ្យវិលត្រឡប់ទៅបើកប្រាក់ខែវិញ។

គួរឱ្យដឹងផងដែរថា ក្រុមហ៊ុនអាកាសចរណ៍ American Airlines បានកាត់បន្ថយការបើកប្រាក់ឈ្នួលដល់បុគ្គលិករបស់ខ្លួនចំនួន ១៨,២៦២ នាក់ឬ ១៧% ខណៈដែលក្រុមហ៊ុនអាកាសចរណ៍​Southwest Airlines បានកាត់បន្ថយបុគ្គលិក ៦% ស្មើនឹង ៥៨,១៣៤ នាក់៕

អត្ថបទ៖ នីតា
ប្រភព៖ channelnewsasia