ក្រុមហ៊ុន Marathon Petroleum បានយល់ព្រមលក់ស្ថានីយប្រេងឥន្ធនៈ Speedway របស់ខ្លួននៅសហរដ្ឋអាមេរិកទៅឱ្យក្រុមហ៊ុនលក់រាយជប៉ុន Seven & i Holdings ដែលជាម្ចាស់នៃហាង 7-Eleven ក្នុងតម្លៃ ២១ ពាន់លាន​ដុល្លារអាមេរិក។ កិច្ចព្រមព្រៀងនេះត្រូវបានរក្សទុកអស់រយៈពេល ៥ខែ ដោយសារធ្វើឡើងចំពេលមានការរីករាលដាលនៃវីរុស Covid-19 នេះបើយោងតាមការផ្សាយ​របស់សាព័ត៌មាន CNA។

ក្រុមហ៊ុន Marathon Petroleum បាននិយាយថា ចំណូលក្រោយពីការលក់ដែលត្រូវបានអនុម័តដោយក្រុមប្រឹក្សារបស់ក្រុមហ៊ុនទាំងពីរ ត្រូវបានប៉ាន់ប្រមាណថាមានចំនួន ១៦.៥ ពាន់លានដុល្លារ។ លើសពីនេះក្រុមហ៊ុនទាំងពីរនឹងប្រើប្រាស់ប្រាក់ទាំងនោះដើម្បីទូទាត់បំណុលដែលមានស្រាប់។ សម្រាប់ Seven & i កិច្ចព្រមព្រៀងនេះនឹងជួយឲ្យក្រុមហ៊ុននេះ ផ្លាស់ប្តូរការផ្តោតអារម្មណ៍របស់ខ្លួនហួសពីទីផ្សារជប៉ុនដែលមានផលប័ត្រ គុណនឹងផលប័ត្ររបស់ខ្លួននៅស្ថានីយ៍ប្រេងឥន្ធនៈសហរដ្ឋអាមេរិក និងហាងលក់រាយដែលទទួលបានតាមរយៈកិច្ចព្រមព្រៀងចំនួន ៣.៣ ពាន់លានដុល្លារជាមួយក្រុមហ៊ុន Sunoco ក្នុងឆ្នាំ ២០១៧។

ជាងនេះទៅទៀត 7-Eleven បាននិយាយថា កិច្ចព្រមព្រៀងចុងក្រោយនឹងបង្កើនចំនួនហាងរបស់ខ្លួននៅសហរដ្ឋអាមេរិក និងកាណាដាឈានទៅដល់ចំនួនប្រហែល ១៤,០០០ ហាង។ បន្ថែមពីនេះ 7-Eleven ក៏បាននិយាយផងដែរថា ខ្លួនរំពឹងថានឹងសម្រេចបាននូវការរួបរួមគ្នាពី ៤៧៥ លានដុល្លារទៅ ៥៧៥ លានដុល្លារក្នុងឆ្នាំទី៣ បន្ទាប់ពីការបញ្ចប់កិច្ចព្រមព្រៀង។

ក្រុមហ៊ុននេះបានឲ្យដឹងទៀតថា កិច្ចព្រមព្រៀងនេះក៏នឹងធ្វើឲ្យមានកំណើនប្រចាំឆ្នាំលើសពី ១៥% នៅក្នុងប្រាក់ចំណូលប្រតិបត្តិការរបស់ 7–Eleven រយៈពេល ៣ ឆ្នាំដំបូងបន្ទាប់ពីកិច្ចព្រមព្រៀងបានបញ្ចប់ ហើយថ្លៃទិញបានឆ្លុះបង្ហាញពីអត្ថប្រយោជន៍ពន្ធ ៣ ពាន់លានដុល្លារផងដែរ។ ដោយឡែកអ្នកវិភាគ និងអ្នកវិនិយោគជាច្រើនបាននិយាយថា ការព្រមព្រៀងគ្នាដំបូង គឺថ្លៃណាស់ ប៉ុន្តែអ្នកខ្លះក៏បាននិយាយថា វានៅតែសមហេតុផលសម្រាប់ក្រុមហ៊ុន Seven & i ដើម្បីពង្រីកខ្លួនបន្ថែមទៀតនៅអាមេរិកខាងជើង។

គួបញ្ជាក់ផងដែរថា កិច្ចព្រមព្រៀងនេះត្រូវបានគេរំពឹងថានឹងបញ្ចប់នៅត្រីមាសទី១ ឆ្នាំ២០២១ រួមទាំងកិច្ចព្រមព្រៀងផ្គត់ផ្គង់ប្រេងរយៈពេល ១៥ ឆ្នាំក្នុងតម្លៃប្រហែល ៧.៧ ពាន់លានហ្គាឡុនក្នុងមួយឆ្នាំដែលជាប់ទាក់ទងនឹងអាជីវកម្ម Speedway។ ជាមួយគ្នានេះ ក្រុមហ៊ុនជប៉ុនបានបោះបង់ចោលកិច្ចព្រមព្រៀងនេះនៅក្នុងខែមីនា ដោយសារមានការព្រួយបារម្ភអំពីតម្លៃដែលត្រូវបានគេរាយការណ៍ថាមានប្រហែល ២២ ពាន់លានដុល្លារអាមេរិក ជាពិសេសដោយសារតែការព្រួយបារម្ភកាន់តែខ្លាំងអំពីការធ្លាក់ចុះសេដ្ឋកិច្ចពិភពលោកចំពេលមានការផ្ទុះឡើងនៃវីរុស Covid-19៕

អត្ថបទ៖ លីនី
ប្រភព៖ channelnewsasia