ក្រុមហ៊ុន Alibaba Cloud នៃក្រុមហ៊ុនអេឡិចត្រូនិកយក្សរបស់ចិន Alibaba កាលពីថ្ងៃទី២ ខែកក្កដាបានប្រកាសបង្កើតមជ្ឈមណ្ឌលទិន្នន័យទី៣ របស់ខ្លួននៅប្រទេសឥណ្ឌូនេស៊ី និងការបង្កើតសម្ព័ន្ធភាពប្រព័ន្ធអេកូឡូស៊ី Cloud នៅហ្វីលីពីន។ លោកស្រី Selina Yuan ប្រធានក្រុមហ៊ុន Alibaba Cloud Intelligence International បានមានប្រសាសន៍ថា ក្រុមហ៊ុន Alibaba Cloud បានក្លាយជាក្រុមហ៊ុនផ្តល់សេវាកម្ម Cloud ធំជាងគេនៅក្នុងទីផ្សារក្នុងតំបន់រួមមាន ប្រទេសម៉ាឡេស៊ី និងឥណ្ឌូនេស៊ី។

ទន្ទឹមនឹងនេះដែរការពង្រីកអាជីវកម្មនៅក្នុងប្រទេសឥណ្ឌូនេស៊ីនេះ បានកើតឡើងបន្ទាប់ពីក្រុមហ៊ុន បានសាងសង់មជ្ឈមណ្ឌលទិន្នន័យដំបូងរបស់ខ្លួនក្នុងប្រទេសនេះនៅក្នុងឆ្នាំ២០១៨ ដោយមជ្ឈមណ្ឌលទី២ នេះទៀតសោតត្រូវបានសាងសង់កាលពីឆ្នាំមុន។

បច្ចុប្បន្នក្រុមហ៊ុន Alibaba Cloud មានដៃគូក្នុងស្រុកជាង ២០ នាក់មកពីឧស្សាហកម្មផ្សេងៗគ្នាក្នុងប្រទេសហ្វីលីពីន ហើយគ្រោងនឹងជួយអាជីវកម្មក្នុងស្រុកចំនួន ៥០០០ អាជីកម្មក្នុងការធ្វើពង្រីកវិសាលភាពឌីជីថលរបស់ពួកគេ និងបណ្តុះបណ្តាលអ្នកជំនាញក្នុងស្រុកចំនួន ៥ ម៉ឺននាក់ក្នុងរយៈពេលបីឆ្នាំខាងមុខ។ យោងតាមក្រុមហ៊ុនស្រាវជ្រាវ និងប្រឹក្សាពិភពលោក Gartner បានឱ្យដឹងថា ក្រុមហ៊ុននេះជាប់ចំណាត់ថ្នាក់លេខ១ នៅតំបន់អាស៊ីប៉ាស៊ីហ្វិកដែលមានចំណែកទីផ្សារ ២៨.២% ក្នុងឆ្នាំ ២០១៩ កើនឡើង ២.២% បើធៀបនឹងឆ្នាំមុន៕

អត្ថបទ៖ លីនី
ប្រភព៖ nationthailand