(ថៃ)៖ បុរសជនជាតិថៃម្នាក់ ប្រែក្លាយទៅជាអាជីវករលក់បន្លែពីផ្សារស៊ីមុំមឿង ប្រែក្លាយជាហាងលក់បន្លែបោះដុំធំនៅផ្សារ Khlong Toei ពីប្រាក់ចំណូលដែលរកបានប្រចាំថ្ងៃ ១៥០០បាត ឬ ៥០ដុល្លាក្នុងមួយថ្ងៃ រហូតដល់បច្ចុប្បន្នទទួលបានប្រាក់ចំណូល ១០,០០០-១៥,០០០បាត ឬជាង ៥០០ដុល្លាក្នុងមួយថ្ងៃ។
ក្នុងវ័យ ៧៥ឆ្នាំ លោកអ៊ុំរូបនេះ បានរៀបរាប់ប្រាប់កម្មវិធី Sentangsedtee ឬកម្មវិធីផ្លូវមហាសេដ្ឋីតាមអ៊ីនធឺណិតថា គាត់មកពីខេត្ត Udon Thani ដើមឡើយគាត់មានអាជីពបើកយានដ្ឋានតូចៗមួយកន្លែង ប៉ុន្តែទទួលប្រាក់ចំណូលមិនបានគ្រប់គ្រាន់ ហើយនៅសម័យនោះ មនុស្សនិយមធ្វើដំណើរទៅធ្វើការនៅបរទេស ដូច្នេះគាត់ទៅខ្ចីលុយគេរហូតអាចធ្វើដំណើរទៅធ្វើការនៅបរទេសបានផងដែរ គឺលោកបានទៅធ្វើការនៅអារ៉ាប៊ីសាអូឌីត និងជប៉ុន។
លុះក្រោយមកទៀតលោកអ៊ុំ ក៏សន្សំលុយបានមួយចំនួនទើប ត្រឡប់ទៅប្រទេសថៃវិញ។ ដោយពីដំបូង លោក មិនដឹងថាត្រូវធ្វើអ្វីនោះទេ ហើយដល់ពេលមានមិត្តភ័ក្តិបបួលទៅលេងផ្សារសុីម៉ុមមឿងនៅក្នុងក្រុង ដោយមិត្តម្នាក់នោះប្រកបរបរចិញ្ចឹមជីវិតដោយទទួលបន្លែទៅលក់។ ដូច្នេះមិត្តម្នាក់នោះក៏បានហៅឱ្យខ្លួនមក សាកល្បងលក់ទៅ បន្ទាប់ពីបានសាកល្បងលក់រួច លោកឃើញថា អាចរកចំណូលបានល្អគួរសម ទើបគាត់ងាកមកចាប់អាជីពនេះយ៉ាងពេញដៃពេញជើងតែម្តង។
គួរបញ្ជាក់អោយដឹងផងដែរថា បុរសវ័យចំណាស់រូបនេះចាប់ផ្តើមដឹកបន្លែទៅអោយអតិថិជននៅតូបលក់បន្លែនៅផ្សារ Khlong Toei ក្រោយមកក៏មានឱកាសបើកលក់បន្លែនៅផ្សារ Khlong Toei។ លោកបានបន្តទៀតថា «ចាប់តាំងពីឱកាសបានមកដល់ដៃខ្ញុំ ខ្ញុំមិនបង្អង់យូរទេ» ដោយពេលនោះដែរ លោកអ៊ុំចាប់លក់បន្លែតាំងពីឆ្នាំ១៩៩៤ រហូតមកដល់ពេលនេះមានអាយុកាលជាង ២៨ ឆ្នាំហើយ។ ដោយបន្លែដែលលក់មានដូចជា ស្លឹកខ្ទឹម ស្ពៃក្តោប ស្ពៃតឿ ត្រសក់ ម្ទេស និងក្រូចឆ្មា ក៏ដូចជា បន្លែបរទេសមួយចំនួនទៀត។ លោកអ៊ុំបន្ថែមថា សម្រាប់គន្លឹះទាក់ទាញអតិថិជនរបស់អាជីវករលក់បន្លែតាមរដូវ គឺជាការជ្រើសរើសបន្លែដែលមានគុណភាព ស្មោះត្រង់នឹងអតិថិជន និងមិនកេងចំណេញច្រើន៕
អត្ថបទ៖ Bee
ប្រភព៖ sentangsedtee