(ថៃ)៖ ចែ Maew ដែលជាម្ចាស់ទឹកប្រហុកម៉ាក Mae Tuk បានផ្តល់បទសម្ភាសន៍ដល់កម្មវិធី Sentangsedtee ឬ ផ្លូវនៃមហាសេដ្ឋីអនឡាញថា កាលពីមុន ចែ Maew ក្រីក្រណាស់ គឺគាត់បានធ្វើ​ការ​ជា​បុគ្គលិក​ច្រកទឹក​ប្រហុក។ ស្រាប់តែថ្ងៃមួយក៏យល់ឃើញថា វាជាផលិតផលដែលអាចលក់បានគ្រប់ពេល មិនថាជា អតិថិជនថ្មី ឬអតិថិជនចាស់ តែងទិញរហូត ដូច្នេះចែ Maew ព្យាយាមប្រមូលបទពិសោធន៍ និងការកត់សម្គាល់ទាំងក្លិន និងរសជាតិ​បែប​ណា​ដែលលក់​ដាច់ ហើយអតិថិជន​ចូល​ចិត្ត​ ដោយការខិតខំ​សន្សំទាំង​លុយ និងបទពិសោធន៍ក្នុងការធ្វើ​រហូត​ចេញ​មក​ជួល​តូប​បើកលក់ ទឹកប្រហុកនៅ​ផ្សារដែលមានឈ្មោះថា ​«សុីម៉ុមមឿង»

ចំពោះ​ចំណុច​លេចធ្លោ​របស់​ហាងចែ Maew បាននិយាយថា វា​ជា​ទឹកប្រហុកដែល​ជា​រូបមន្ត​របស់​ហាង​ផ្ទាល់​ ហើយរូបមន្តនេះគឺបានមកពីបទពិសោធន៍ជាង ៤០ ឆ្នាំនៃការលក់ទឹកប្រហុក ដែលមានជាតិឈ្ងុយឆ្ងាញ់ ជាមួយនឹងការយកមកកែលម្អវាឱ្យត្រូវនឹងតម្រូវការរបស់អតិថិជន ថែមទាំងទទួល​បាន​មតិ​ពី​អតិថិជន​រហូត​ដល់​ទឹក​ប្រហុកនៅហាងឈ្ងុយឆ្ងាញ់ត្រូវមាត់ រហូតក្លាយទៅជាហាង​ល្បី​ និង​ពេញ​និយម​នៅលើ​ទីផ្សារប្រទេសថៃ។ ហើយនេះគឺជា មូលហេតុដែលនាំអោយអាជីវកម្មរបស់ចែ Maew កំពុងរីកចម្រើនយ៉ាងឆាប់រហ័ស ព្រោះអតិថិជនប្រាប់តៗគ្នា ក្រោយមក គាត់បានសម្រេចចិត្តបង្កើតទីកន្លែងផលិតទឹកប្រហុកផ្ទាល់ខ្លួនហើយរោងចក្រនេះមានទីតាំងនៅខេត្តប៉ាធុមថានី ក្រោមម៉ាកយីហោ “Mae Tuk”។

បច្ចុប្បន្នបន្ទាប់ពីទឹកប្រហុកទទួលបានការគាំទ្រយ៉ាងខ្លាំងនោះ ចែ Maew ក៏បានបំបែក ផលិតផលចេញជាច្រើនទៀតផងដែរ ដើម្បីឆ្លើយតបទៅកាន់តម្រូវការទីផ្សារ ដូចជា បុកល្ហុងកក តាមបច្ចេកវិទ្យាថ្មីដើម្បីរក្សាទុកបានយូរ ត្រពាំងក្រៀម ទឹកក្រូចឆ្មា។ល។ រាល់ផលិតផលទាំងអស់នេះត្រូវបាននាំចេញទៅលក់ផ្តាច់មុខនៅបណ្តាប្រទេសនានាប៉ែកខាងអឺរ៉ុប សហរដ្ឋអាមេរិក និង បណ្តាប្រទេសជាច្រើននៅខាងអាសុីយើងផងដែរ។ ចំណែកប្រាក់ចំណូលវិញ ចែ Maew ទទួលបានប្រាក់ចំណូលពីការទឹកទឹកប្រហុកក្នុងមួយខែមិនក្រោម ៣មុឺនដុល្លារអាមេរិកឡើយ៕

អត្ថបទ៖ Bee
ប្រភព៖ sentangsedtee