យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា មុខរបរបណ្ដុះផ្សិតអំបោះ កំពុងមានតម្រូវការទីផ្សារនាពេលបច្ចុប្បន្ន និងទៅអនាគត ខណៈផ្សិតអំបោះមានរសជាតិឆ្ងាញ់សម្រាប់អ្នកបរិភោគ និងមានតម្លៃល្អ។

លោក ឡាយ សសាវរី ម្ចាស់កសិដ្ឋានបណ្ដុះផ្សិតមួយកន្លែងក្នុងរាជធានីភ្នំពេញបានប្រាប់វិទ្យុជាតិកម្ពុជាឱ្យដឹងថា លោកបានចាប់យកកសិកម្មផ្នែកបណ្ដុះផ្សិតនេះអស់រយៈ ពេលជិត៧ឆ្នាំមកហើយ សម្រាប់ផ្គត់ផ្គង់ទីផ្សារផ្សិតក្នុងរាជធានីភ្នំពេញនិងតាមបណ្តាខេត្ត។

លោកបានបន្តថា សម្រាប់ផ្សិតដែលកសិដ្ឋានកំពុងបណ្តុះនិងលក់នៅលើទីផ្សារ គឺជាប្រភេទផ្សិតអំបោះសនិងផ្សិតអំបោះខ្មៅ ហើយសម្រាប់ការបណ្ដុះនេះផងដែរ គឺលោកបានសិក្សារៀនសូត្រផ្នែកកសិកម្មពីសាលាកសិកម្ម និងបានស្រាវជ្រាវបន្តតាមប្រព័ន្ធអ៊ីនធើណិតផង ដើម្បីឱ្យកាន់ តែច្បាស់ពីបច្ចេកទេសក្នុងការបណ្ដុះឱ្យត្រូវតាមស្ដង់ដារ។លោកបានបន្ថែមថា បច្ចុប្បន្នកសិដ្ឋានលោកកំពុងបណ្ដុះផ្សិតអំបោះស និងខ្មៅប្រមាណជា ៣០០០០កញ្ចប់ ដែលអាចប្រមូលផលបានក្នុង១ថ្ងៃ ១៥០គីឡូក្រាមហើយអាចប្រមូលផលបានជារៀងរាល់ថ្ងៃក្នុងរយៈពេលបីខែ។

លោកបានបញ្ជាក់ថា មូលហេតុដែលលោកជ្រើសផ្នែកកសិកម្មបណ្ដុះផ្សិតនេះ ដោយសារតែលោកផ្ទាល់ជានិស្សិតដែលរៀនចប់ផ្នែកកសិកម្មផង ណាមួយលោកមើលឃើញថា សព្វថ្ងៃទីផ្សារផ្សិតនៅក្នុងស្រុកនៅមានការខ្វះខាតនៅឡើយ ដោយសារតែតម្រូវការអ្នកបរិភោគមានការកើនឡើងនិងមានតម្លៃល្អ ប៉ុន្តែខ្វះអ្នកផលិតទើបលោកសម្រេចចិត្តចាប់យកផ្នែកខាងបណ្ដុះផ្សិតឲ្យត្រូវតាមទីផ្សារបច្ចុប្បន្ន និងទៅអនាគត។

(ដោយសារតែយើងមើលឃើញពីទីផ្សារអនាគត ថាប្រទេសយើងអត់ទាន់មានអ្នកចាប់ផ្តើមធ្វើរបរហ្នឹងច្រើន អ៊ីចឹងវាជាឱកាសមួយសម្រាប់យើង ក្នុងការធ្វើក្នុងវិស័យហ្នឹង យើងមើលឃើញថាវិស័យផ្សិតនៅខ្វះខាតនៅលើទីផ្សារ ទៅពេលអនាគត អ៊ីចឹងពេលយើងចាប់ផ្ដើមពីឥឡូវទៅគឺល្អបំផុត ព្រោះបើតាមសមាគមផ្សិតនៅលើពិភពលោកស្រាវជ្រាវ តម្រូវការផ្សិតនឹងកើនឡើង ក្នុងមួយឆ្នាំ៩.៣ភាគរយ ទីផ្សារផ្សិតនិងខ្វះខាតនៅលើតំបន់អាស៊ីប៉ាស៊ីហ្វិក វាជាឱកាសយើងមួយដែរសម្រាប់ជ្រៀតចូលទីផ្សារដោយសារ តែបច្ចេកទេសក្នុងការធ្វើផ្សិត បើយើងចង់ស៊ីជម្រៅលើវា គឺយើងត្រូវការពេលវេលាយូរនេះគឺជាឱកាសយើងក្នុងការស្វែងយល់វា ហើយវាក៏មិន មែនជាមុខរបរងាយស្រួលដែរក្នុងវិស័យកសិកម្ម)។

ម្ចាស់កសិដ្ឋានរូបនេះ បានអំពាវនាវដល់កសិករទាំងអស់អាចងាកមកចាប់អារម្មណ៍ លើមុខរបរបណ្ដុះផ្សិតនេះបាន ដោយមិនត្រូវការចំណាយផ្ទៃដីធំ ចំណាយថវិកាច្រើន និងពេលវេលាច្រើនទេ ប៉ុន្តែអាចរកចំណូលបានច្រើន ណាមួយមិនប៉ះពាល់ដល់សុខភាពខ្លួនឯង និងអ្នកបរិភោគឡើយ។ សូមបញ្ជាក់ថា កសិដ្ឋានបណ្ដុះផ្សិត NC កម្ពុជា ស្ថិតនៅភូមិខ្វា សង្កាត់ដង្កោ ខណ្ឌ ដង្កោ រាជធានីភ្នំពេញ បានបង្កើតឡើងនៅឆ្នាំ ២០១៥ មានសមាជិក២៥នាក់ ហើយមានបណ្ដុះផ្សិតអំបោះស និងផ្សិតអំបោះខ្មៅ ដែលមានតម្លៃក្នុង ១គីឡូក្រាម ១៥០០០រៀល៕

ប្រភព៖ ក្រសួងព័ត៌មាន