យោងតាមការចុះផ្សាយរបស់សារព័ត៌មាន The Nation បានឱ្យដឹងថាក្រុមហ៊ុនផលិតរថយន្តកំពូលចំនួនបួនគឺ Toyota, Nissan, Honda និង AutoAlliance ដែលដំឡើងរថយន្ត Ford និង Mazda បានប្រកាសថា ពួកគេនឹងចាប់ផ្តើមផលិតរថយន្តអគ្គិសនី (EVs) នៅក្នុងប្រទេសថៃ។

គណៈប្រតិភូ AThai ដឹកនាំដោយរដ្ឋមន្រ្តីថាមពល Supattanapong Punmeechaow បានធ្វើដំណើរទៅប្រទេសជប៉ុនកាលពីខែមេសាដើម្បីទាក់ទាញអ្នកវិនិយោគពីឧស្សាហកម្មគោលដៅដូចជា រថយន្ត អេឡិចត្រូនិក និងវេជ្ជសាស្ត្របាននិយាយថា វិនិយោគិនភាគច្រើនមានទំនុកចិត្តនៅក្នុងប្រទេសថៃ ហើយចាត់ទុកថា ប្រទេសថៃជាទីតាំងដ៏ល្អសម្រាប់សាងសង់មូលដ្ឋានរបស់ពួកគេក្នុងតំបន់។

លោក​បាន​បន្ថែម​ថា ក្រុមហ៊ុន​ជា​ច្រើន​បាន​បង្ហាញ​ការ​ចាប់​អារម្មណ៍​ខ្លាំង​ក្នុង​ការ​វិនិយោគ​នៅ​ប្រទេស​ថៃ ជាពិសេស​ក្នុង​វិស័យ​រថយន្ត និង​អេឡិចត្រូនិក។ លើសពីនេះក្រុមហ៊ុនទាំងនេះ ក៏មានគោលបំណងសម្រេចបាននូវអព្យាក្រឹត្យកាបូន ដែលស្របតាមគោលនយោបាយរបស់រដ្ឋាភិបាលថៃ។

ទន្ទឹមនឹងនោះដែរ លោក Supattanapong ក៏បាននិយាយផងដែរថា ក្រុមហ៊ុនអេឡិចត្រូនិចរបស់ជប៉ុនមើលឃើញថាប្រទេសថៃគឺជាមូលដ្ឋានផលិតកម្មដ៏រឹងមាំ ហើយពួកគេក៏ជឿថាប្រទេសថៃមានសក្តានុពលក្នុងការអភិវឌ្ឍទៅជាក្រុមហ៊ុនផលិតឧបករណ៍ពាក់កណ្តាលចរន្ត ដើម្បីកសាងកម្លាំងការងារដ៏រឹងមាំនៅក្នុងវិស័យនេះ។

គួរបញ្ជាក់ថា ក្រុមហ៊ុនតូយ៉ូតាត្រូវបានអនុម័តនៅថ្ងៃទី០៧ ខែមករា ឆ្នាំ២០២០ លើគម្រោងផលិតរថយន្ត BEV និង PHEV ។ យានជំនិះទាំងនោះត្រូវបានគេរំពឹងថានឹងចេញលក់នៅលើទីផ្សារនៅឆ្នាំ២០២៣។ ដោយឡែក Nissan ត្រូវបានអនុម័តនៅថ្ងៃទី២៨ ខែកក្កដា ឆ្នាំ ២០១៨ លើគម្រោងរបស់ខ្លួនក្នុងការផលិតរថយន្ត HEV និងអាគុយ EV ។ ក្រុមហ៊ុនផលិតរថយន្តបានវិនិយោគចំនួន ១០.៩៦ ពាន់លានបាតក្នុងគម្រោងនេះ។

ទន្ទឹមនឹងនេះក្រុមហ៊ុន Honda ត្រូវបានអនុម័តលើការពង្រីកទំហំទឹកប្រាក់ ៥.៨២ ពាន់លានបាតរបស់ក្រុមហ៊ុនទៅក្នុងការផលិតរថយន្ត HEV និងអាគុយ EV នៅថ្ងៃទី 28 ខែកក្កដា ឆ្នាំ 2018 ខណៈ AutoAlliance គម្រោងផលិតរថយន្ត PHEV និង BEV ត្រូវបានអនុម័តនៅថ្ងៃទី៤ ខែវិច្ឆិកា ឆ្នាំ២០២០។ ក្រុមហ៊ុនផលិតរថយន្តនេះបានវិនិយោគ ៣.២៥ ពាន់លានបាត ហើយរំពឹងថានឹងផលិតរថយន្ត PHEV ៥,០០០គ្រឿង និង BEV ១,០០០គ្រឿង ជារៀងរាល់ឆ្នាំសម្រាប់ទីផ្សារក្នុងស្រុក៕

អត្ថបទ៖ លីនី
ប្រភព៖ nationthailand