ការិយាល័យផ្សព្វផ្សាយពាណិជ្ជកម្មបរទេសនៅស្ថានទូតថៃប្រចាំទីក្រុងភ្នំពេញបានរាយការណ៍ថា Siam Makro នឹងបើកផ្សារទំនើប Makro ពីរបន្ថែមទៀតនៅក្នុងប្រទេសកម្ពុជា ដោយបន្ថែមលើផ្សារ Makro ទាំងពីរដែលបានដំណើរការរួចហើយក្នុងនោះមួយនៅទីក្រុងភ្នំពេញ និងមួយទៀតនៅក្នុងខេត្តសៀមរាប។

ការិយាល័យនេះបាននិយាយថា សេដ្ឋកិច្ចរបស់កម្ពុជាកំពុងរីកចម្រើនយ៉ាងឆាប់រហ័ស ដោយសារតែរបៀបរស់នៅរបស់ប្រជាជនកម្ពុជាកំពុងមានការផ្លាស់ប្តូរគួរឱ្យកត់សម្គាល់ ដោយសារអំណាចទិញកាន់តែខ្ពស់។ ការិយាល័យបានបន្តថា ជាផ្នែកនៃការផ្លាស់ប្តូររបៀបរស់នៅ ប្រជាជនកម្ពុជាកាន់តែច្រើនបានទិញទំនិញនៅក្នុងផ្សារទំនើប និងផ្សារទំនើបធំៗ។

លោកស្រី Suchada Ithijarukul នាយកប្រតិបត្តិនៃក្រុមហ៊ុន Makro Group បានបញ្ជាក់ពីគម្រោងសាងសង់ហាងចំនួនពីរបន្ថែមទៀតនៅក្នុងប្រទេសកម្ពុជា។ លោកស្រីបានបន្ថែមថា ហាងទាំងពីរនេះនឹងស្ថិតក្នុងចំណោមហាងបរទេសចំនួនប្រាំ ដែលនឹងបើកដោយ Makro នៅឆ្នាំនេះ ដោយហាង Makro បរទេស​បី​ផ្សេង​ទៀត​នឹង​ត្រូវ​បើក​ក្នុង​ប្រទេស​ឥណ្ឌា។

លោកស្រីក៏បានបន្ថែមផងដែរថា Makro នឹងចំណាយប្រាក់ ១១ពាន់លានដុល្លារ ដើម្បីពង្រីកសាខាចំនួន ៣០នៅឆ្នាំនេះ រួមទាំងហាងនៅបរទេសចំនួន ៥ផងដែរ។ បន្ទាប់ពីការពង្រីកនេះ Makro នឹងមាន ១៨៤សាខា — ១៧២នៅក្នុងប្រទេសថៃ ៤សាខានៅប្រទេសកម្ពុជា ១សាខានៅមីយ៉ាន់ម៉ា ៦សាខានៅឥណ្ឌា និង ១សាខានៅប្រទេសចិន។

គួរឱ្យដឹងថា បើតាមការិយាល័យពាណិជ្ជកម្ម បច្ចុប្បន្នមានផ្សារទំនើបដែលគ្រប់គ្រងដោយជនបរទេសជាច្រើននៅក្នុងរាជធានីភ្នំពេញ រួមមាន ផ្សារទំនើបអ៊ីអន១ ផ្សារទំនើបអ៊ីអន២ ផ្សារទំនើប Exchange Square, TK Avenue , Global House និង SCG Home Village ។ ហើយក៏មានផ្សារទំនើបដែលគ្រប់គ្រងដោយជនបរទេសជាច្រើននៅក្នុងខេត្តព្រះសីហនុផងដែរ រួមមាន Prince Mall, Furi Time Square និង Aeon Mall 3៕

អត្ថបទ៖ លីនី
ប្រភព៖ nationthailand