កំពូលអ្នកឡាយលក់ទំនិញតាមអនឡាញរបស់ប្រទេសចិនឈ្មោះថា Ping Rong ត្រូវបានរងពិន័យជាប្រាក់ចំនួន ៦២លានយ័ន (ប្រមាណ ៩.៨លានដុល្លារ) សម្រាប់ការគេចពន្ធ ខណៈដែលប្រទេសចិនបន្តការបង្ក្រាបរបស់ខ្លួនលើឧស្សាហកម្មឡាយលក់ទំនិញដែលកំពុងរីកចម្រើន។ នារីវ័យ ២៩ឆ្នាំ ដែលជាអ្នកល្បីល្បាញលើអ៉ីនធឺណេត និងមានអ្នកតាមដាន (follower) ២៤លាននាក់ នៅលើវេទិកាវីដេអូខ្លី Kuaishou ត្រូវបានអាជ្ញាធរពន្ធរបស់ប្រទេសចិនចោទប្រកាន់ពីបទលាក់បាំងចំណូលរបស់នាងក្នុងឆ្នាំ២០១៩ និង២០២០។
ជាមួយគ្នានេះ កាលពីឆ្នាំមុន ម្ចាស់ហាងលក់ទំនិញតាមប្រព័ន្ធអេឡិចត្រូនិករូបនេះ ត្រូវបានជាប់ពាក់ព័ន្ធនឹងរឿងអាស្រូវមួយ ហើយបច្ចុប្បន្ននេះ កំពូលអ្នកឡាយលក់តាមអនឡាញជាអ្នកចុងក្រោយបំផុតដែលត្រូវបានពិន័យយ៉ាងធ្ងន់ធ្ងរចំពោះបញ្ហាទាក់ទងនឹងពន្ធក្នុងរយៈពេលប៉ុន្មានខែថ្មីៗនេះ។
ជាក់ស្ដែង នៅក្នុងខែវិច្ឆិកា កំពូលអ្នកឡាយលក់មានមូលដ្ឋាននៅទីក្រុង Hangzhou ពីរនាក់ត្រូវបានពិន័យជាប្រាក់ចំនួន ១៥ លានដុល្លារសម្រាប់ការកក់ប្រាក់ដោយខុសច្បាប់ជាប្រាក់ចំណូលអាជីវកម្ម នេះបើយោងតាម Bloomberg ។ ហើយនៅក្នុងខែធ្នូ កំពូលអ្នកឡាយ Viya ត្រូវបានពិន័យជាប្រាក់ចំនួន ២១០លានដុល្លារសម្រាប់ការគេចវេស និងបង់ពន្ធតិចជាងមុនរាប់លាន។
ហើយនៅក្នុងខែដដែលនោះ អ្នកឡាយលក់ទំនិញជាង ១,០០០នាក់ បានប្រញាប់ប្រញាល់ដើម្បីទូទាត់ពន្ធឱ្យបានមុនចុងឆ្នាំ ២០២១ នេះបើយោងតាមសារព័ត៌មាន Insider ។ យ៉ាងណាមិញបើយោងតាមការប៉ាន់ប្រមាណដោយក្រុមហ៊ុនប្រឹក្សា KPMG ទីផ្សារផ្សាយផ្ទាល់ដែលរកកម្រៃបានរបស់ប្រទេសចិនមានតម្លៃប្រហែល ១ទ្រីនយ័នក្នុងឆ្នាំ២០២០ (១៥៦ ពាន់លានដុល្លារ)៕
អត្ថបទ៖ លីនី
ប្រភព៖ insider