Samsung និង Apple គឺជាក្រុមហ៊ុនបច្ចេកវិទ្យាដ៏ធំនៅលើពិភពលោក ដែលទទួលបានភាពល្បីល្បាញខ្លាំងទៅលើផលិតផលស្មាតហ្វូន។ បើយោងតាមការចុះផ្សាយរបស់សារព័ត៌មាន vietnaminsider កាលពីពេលថ្មីៗនេះ ក្រុមហ៊ុន Samsung បានសហការជាមួយក្រុមហ៊ុន Minh Tuan Mobile និង ShopDunk ដើម្បីបើកប្រព័ន្ធ Premium Store ចំនួនពីរនៅក្នុងប្រទេសវៀតណាម បន្ទាប់ពីក្រុមហ៊ុន Apple។

សារព័ត៌មានដដែលបានឱ្យដឹងថា​ បើទោះបីជា Samsung និង Apple បើកហាងលក់រាយផ្ទាល់ខ្លួនមែន តែត្រូវបើកដោយសហការជាមួ យក្រុមហ៊ុនក្នុងស្រុកវៀតណាម។ ជាក់ស្ដែង ពីមុនម៉ូដែល Apple mono store ត្រូវបានបង្កើតឡើងក្នុងឆ្នាំ២០២១ ជាមួយនឹងហាងដែលបើកដោយ Mobile World (TopZone) ឬ ShopDunk។

យ៉ាងណាមិញ បើតាមអ្នកវិភាគ Glen Cardoza មកពី Counterpoint Research មូលហេតុដែលក្រុមហ៊ុនយក្សទាំងពីរនេះ ជ្រើសរើសបើកហាងលក់រាយផ្ទាល់ខ្លួននៅប្រទេសវៀតណាម គឺដោយសារ វិស័យលក់រាយផ្ទាល់នៅតែមានសក្ដានុពលច្រើននៅក្នុងប្រទេសវៀតណាម។ យោងតាមអ្នកជំនាញនេះ ទីផ្សារលក់រាយតាមអនឡាញក្នុងប្រទេសវៀតណាមមានការកើនឡើង ប៉ុន្តែមិនច្រើនដូចនៅប្រទេសដទៃនោះទេ នោះហើយជាមូលហេតុដែលម៉ាកយីហោនៅតែយកចិត្តទុកដាក់ចំពោះការបើកហាងលក់ផ្ទាល់។ ទន្ទឹមនឹងនេះ យោងតាមអ្នកលក់រាយ ម៉ូដែលហាងផ្តាច់មុខម៉ាកយីហោ (Mono Store – ឬហាងឯកទេស) គឺជាទម្រង់អាជីវកម្មថ្មីនៅក្នុងប្រទេសវៀតណាម ប៉ុន្តែបានដំណើរការនៅក្នុងប្រទេសជាច្រើនរួចទៅហើយ៕

អត្ថបទ៖ លីនី
ប្រភព៖ vietnaminsider