ក្រុមហ៊ុន Microsoft Corp ត្រៀមចាយលុយ ៦៨.៧ ពាន់លានដុល្លារ ទិញក្រុមហ៊ុន Activision Blizzard (ATVI.O) ដែលជាក្រុមហ៊ុនផលិតហ្គេម “Call of Duty” នេះបើយោងតាមការចុះផ្សាយរបស់សារព័ត៌មាន vnexpress។ តាមសារព័ត៌មានដដែលបានឱ្យដឹងថា ការទិញរបស់ Microsoft គឺកិច្ចព្រមព្រៀងឧស្សាហកម្មហ្គេមដ៏ធំបំផុតក្នុងប្រវត្តិសាស្ត្រ ខណៈក្រុមហ៊ុនបច្ចេកវិទ្យាយក្សនៅលើសកលលោកនាពេលបច្ចុប្បន្ននេះ កំពុងងាកទៅរកបច្ចេកវិទ្យាអនាគតនិម្មិត (virtual future)។
កិច្ចព្រមព្រៀងមួយ ដែលបានប្រកាសដោយក្រុមហ៊ុន Microsoft កាលពីថ្ងៃអង្គារ ថ្មីៗនេះ ត្រូវបានចាត់ទុកថា ជាការទិញដ៏ធំបំផុតមិនធ្លាប់មាន និងការចំណាយប្រាក់ដ៏ច្រើនលើសលប់ ដើម្បពង្រឹងខ្លួន និងក្ដោបក្ដាប់ក្នុងទីផ្សារវីដេអូហ្គេមដែលកំពុងរីកចម្រើនរបស់ក្រុមហ៊ុនអាមេរិកមួយនេះ ប្រកួតប្រជែងជាមួយ Tencent និង Sony ។
នាយកប្រតិបត្តិក្រុមហ៊ុន Microsoft លោក Satya Nadella បាននិយាយថា “ការលេងហ្គេម គឺជាផ្នែកនៃការកម្សាន្តនៅទូទាំងវេទិកាទាំងអស់នាពេលបច្ចុប្បន្ននេះ ដែលមានឥទ្ធិពល និងគួរឱ្យរំភើបបំផុត ហើយនឹងដើរតួយ៉ាងសំខាន់ក្នុងការអភិវឌ្ឍន៍វេទិការ metaverse” ។
ជាមួយគ្នានេះដែរ ហ្គេមរបស់ Activision នឹងផ្តល់ឱ្យវេទិកាហ្គេម Xbox របស់ Microsoft កាន់តែលេចធ្លោជាងវេទិការហ្គេម Playstation របស់ Sony ដែលមានអស់រយៈពេលជាច្រើនឆ្នាំបានមកហើយនោះ។ គួរបញ្ជាក់ថា កិច្ចព្រមព្រៀងទិញរបស់ Microsoft បានកើតឡើងនៅពេលដែលក្រុមហ៊ុន Activision ដែលជាអ្នកបង្កើតហ្គេមដូចជា “Overwatch” និង “Candy Crush” ធ្លាក់ចុះការដោយសារការចោទប្រកាន់ពីការបៀតបៀនផ្លូវភេទលើបុគ្គលិក និងការប្រព្រឹត្តខុសដោយអ្នកគ្រប់គ្រងកំពូលមួយចំនួន៕
អត្ថបទ៖ លីនី
ប្រភព៖ vnexpress