Hermès និង Chanel ជាយីហោដ៏ល្បីល្បាញយូរលង់ណាស់មកហើយរបស់ប្រទេសបារាំង ដែលមានលក់ផលិតផលជាច្រើនមុខរាប់ចាប់ពីគ្រឿងសម្អាង សម្លៀកបំពាក់ កាបូប គ្រឿងអលង្ការ ទឹកអប់ និងរបស់របរប្រើប្រាស់ជាច្រើនមុខទៀត។ ក្នុងចំណោមផលិតផលទាំងនោះយីហោ Hermès មានភាពល្បីល្បាញខ្លាំងដោយសារកូតាលើការទិញកាបូប ហើយឥឡូវនេះ Chanel ក៏កំពុងធ្វើដូចគ្នា ហើយបានបង្កើនតម្លៃ ដើម្បីជៀសវាងការក្លាយជាម៉ាកយីហោដែលមានទីផ្សារធំ។
បើយោងតាមការចុះផ្សាយរបស់សារព័ត៌មាន scmp បានឱ្យដឹងថា យីហោលំដាប់ពិភពលោកទាំង ២នេះ ប្រើយុទ្ធសាស្រ្តកំណត់ក្នុងការទិញកាបូបសម្រាប់អតិថិជន ដើម្បីភាពផ្ដាច់មុខ និងធ្វើឱ្យកាបូបរបស់ពួកគេក្លាយជាទំនិញដែលមានអ្នកចង់បានច្រើនបំផុត។ ប្រភពដដែលបានឱ្យដឹងថា កាបូប Hermès និង Chanel មិនសូវមានច្រើននៅលើទីផ្សារ ជាពិសេសទំនិញស្បែក ឬ ទំនិញប្រណិតមិនមែនដោយសារបញ្ហា កូវីដ-១៩ ឬរឿងអ្វីផ្សេងឡើយ តែវាជាភាពផ្ដាច់មុខ និងវិធីដែលធ្វើឱ្យកាបូបទាំងនោះកាន់តែមានតម្លៃ។
ជាក់ស្ដែងកាសែត Korea Times បានរាយការណ៍កាលពីចុងឆ្នាំមុនថា ម៉ាក Chanel បានអនុម័តគោលការណ៍ថ្មីមួយនៅក្នុងប្រទេសកូរ៉េខាងត្បូង ដោយអនុញ្ញាតឱ្យអតិថិជនម្នាក់ៗអាចទិញម៉ូដែលគ្រឿងបន្លាស់ស្បែក និងកាបូបតែមួយមុខប៉ុណ្ណោះក្នុងមួយឆ្នាំ។ ជាឧទាហរណ៍ ច្បាប់នេះមានន័យថា អតិថិជនមិនអាចទិញកាបូបទំហំ 2.55 (គ្រប់ម៉ូដ) ដែលមានពណ៌ទឹកប៊ិច និងខ្មៅ ចំនួន ២ បានទេ ប៉ុន្តែសម្រាប់ម៉ូដផ្សេងអាចទិញបានចំនួន ២ ដែលមានពណ៌ដូចគ្នា។
គួរឱ្យដឹងថា Hermès ជាយីហោដ៏ប្រណិតរបស់បារាំងដែលបានបង្កើតឡើងក្នុងឆ្នាំ ១៨៣៧ ដែលមានផលិតផលស្បែក គ្រឿងប្រើប្រាស់សម្រាប់រស់នៅ គ្រឿងសង្ហារឹមក្នុងផ្ទះ ទឹកអប់ គ្រឿងអលង្ការ នាឡិកា និងសំលៀកបំពាក់ជាដើម។ ដោយឡែក គឺយីហោដ៏ប្រណិតរបស់បារាំងដូចគ្នា ដែលត្រូវបានបង្កើតឡើងដោយ couturière Coco Chanel ក្នុងឆ្នាំ១៩១០។ វាផ្តោតលើសម្លៀកបំពាក់ដែលត្រៀមរួចជាស្រេចសម្រាប់ស្ត្រី ទំនិញប្រណិត និងគ្រឿងបន្លាស់សម្រាប់កាបូប។ បច្ចុប្បន្នក្រុមហ៊ុននេះត្រូវបានគ្រប់គ្រងដោយ Alain Wertheimer និង Gérard Wertheimer ដែលជាចៅប្រុសរបស់លោក Pierre Wertheimer ដែលជាដៃគូអាជីវកម្មដំបូងរបស់ Coco Chanel៕
អត្ថប៖ លីនី
ប្រភព៖ scmp.