ក្រុមហ៊ុនបច្ចេកវិទ្យាយក្សរបស់កូរ៉េខាងត្បូង Samsung Electronics បាននិយាយថា ខ្លួននឹងសាងសង់រោងចក្រផលិតបន្ទះឈីប ថ្មីមួយនៅសហរដ្ឋអាមេរិក ចំពេលមានការខ្វះខាតជាសកលនៃបន្ទះឈីបកុំព្យូទ័រ។ ក្រុមហ៊ុនលំដាប់អន្តរជាតិមួយនេះ បានប្រកាសកាលពីថ្ងៃពុធថា ខ្លួននឹងវិនិយោគទឹកប្រាក់ប្រមាណ ១៧ពាន់លានដុល្លារនៅក្នុងរោងចក្រ ដែលនឹងជំរុញការផលិតឧបករណ៍អេឡិចត្រូនិកកម្រិតខ្ពស់ ដោយរោងចក្រថ្មីនេះ នឹងមានទីតាំងនៅ Taylor រដ្ឋ Texas។
ការសាងសង់នឹងចាប់ផ្ដើមនៅឆមាសទីមួយឆ្នាំក្រោយ ដោយមានគោលបំណងចាប់ផ្តើមផលិតកម្មនៅពាក់កណ្តាលចុងឆ្នាំ ២០២៤។ រោងចក្របន្ទះឈីបថ្មីនេះ នឹងក្លាយជាកន្លែងទីពីររបស់ក្រុមហ៊ុន Samsung នៅសហរដ្ឋអាមេរិក ហើយត្រូវបានគេរំពឹងថានឹងបង្កើតការងារប្រហែល ២០០០ កន្លែងសម្រាប់កម្មករដែលមានជំនាញបច្ចេកវិទ្យាខ្ពស់។
លោក Kim Ki-nam អនុប្រធាន Samsung បាននិយាយថា៖ ជាមួយនឹងសមត្ថភាពផលិតកាន់តែច្រើន យើងនឹងអាចបម្រើតម្រូវការរបស់អតិថិជនបានកាន់តែប្រសើរឡើង និងរួមចំណែកដល់ស្ថិរភាពនៃខ្សែសង្វាក់ផ្គត់ផ្គង់បន្ទះឈីបសកលលោក »។
យ៉ាងណាមិញរដ្ឋបាល Biden បានស្វាគមន៍ចំពោះផែនការនេះ ដោយប្រធានក្រុមប្រឹក្សាសេដ្ឋកិច្ចជាតិ និងជាទីប្រឹក្សាសន្តិសុខជាតិបាននិយាយនៅក្នុងសេចក្តីថ្លែងការណ៍មួយថា រោងចក្រថ្មីនេះនឹងជួយការពារខ្សែសង្វាក់ផ្គត់ផ្គង់របស់សហរដ្ឋអាមេរិក និងធ្វើឱ្យប្រាកដថាប្រទេសនេះនឹងមិនប្រឈមមុខនឹងការខ្វះខាតឈីបម្តងទៀតឡើយ៕
អត្ថបទ៖ លីនី
ប្រភព៖ nhk