សមាគមអ្នកលក់រាយថៃ (TRA) បាននិយាយថា​ ហាងប្រហែល ១០០,០០០ អាចនឹងបិទទ្វារដោយសារតែវិធានការបិទខ្ទប់ប្រទេស ក្នុងប្រទេសថៃ ហើយការបិទនេះនឹងធ្វើឱ្យបុគ្គលិកបាត់បង់ការងារ។ អនុប្រធានសមាគមអ្នកលក់រាយថៃ (TRA) លោក Chatrchai Toungratanaphan បានបង្ហាញថា ការស្ទង់មតិលើសន្ទស្សន៍អារម្មណ៍អ្នកលក់រាយ (RSI) ក្នុងខែកក្កដា បានបង្ហាញថា អាជីវកម្មលក់រាយកំពុងប្រឈមនឹងវិបត្តិដោយសារ (RSI) ស្ថិតនៅកម្រិតទាបបំផុតគឺ ១៦.៤ពិន្ទុ ក្នុងរយៈពេល ១៦ខែ។

លោកបាន​បន្ថែមថា ចំណូលពីវិស័យលក់រាយអាចថយចុះចំនួន ២៧០ពាន់លានបាត ហើយហាងប្រហែល ១០០,០០០ ទំនងជានឹងឈប់ដំណើរការ។ លើសពីនេះ សន្ទស្សន៍អារម្មណ៍អ្នកលក់រាយ (RSI) ក្នុងរយៈពេលបីខែខាងមុខនេះ ត្រូវបានគេប៉ាន់ប្រមាណថា មានប្រហែល ២៧.៦ពិន្ទុ ដោយសារតែការពន្យាពេលក្នុងការចាក់វ៉ាក់សាំង និងកង្វះវិធានការសង្គ្រោះពីរដ្ឋាភិបាល។

គួរឱ្យដឹងថា សន្ទស្សន៍អារម្មណ៍អ្នកលក់រាយ (RSI) បានធ្លាក់ចុះយ៉ាងខ្លាំងនៅក្នុងគ្រប់ប្រភេទសេវាកម្មលក់រាយ ជាពិសេសផ្សារទំនើបនិងភោជនីយដ្ឋាន។ ការលក់របស់ពួកគេត្រូវបានប៉ះពាល់ដោយផ្ទាល់ពីវិធានការបិទខ្ទប់ ហើយបានធ្លាក់ចុះពី ៨០ ទៅ ៩០% ចាប់តាំងពីខែមិថុនាមក។

ក្នុងនោះ ហាងលក់ទំនិញងាយស្រួល ត្រូវបានរងផលប៉ះពាល់ដោយបំរាមគោចរពីម៉ោង ៩យប់ ដល់ ៤ព្រឹក ដែលធ្វើឱ្យការលក់របស់ពួកគេបានធ្លាក់ចុះពី ២០ ទៅ ២៥% ដោយសារពួកគេមិនអាចលក់បាននៅពេលយប់ ដែលជាម៉ោងធ្វើការដ៏មមាញឹកបំផុតរបស់ពួកគេ ហើយ ៤០% នៃហាងងាយស្រួលទាំងនោះ ស្ថិតនៅក្នុងតំបន់“ ក្រហមក្រម៉ៅ”៕

អត្ថបទ៖ លីនី
ប្រភព៖ nationthailand