ម្ចាស់កសិដ្ឋានចិញ្ចឹមត្រីC.A.N ខេត្តព្រៃវែងបានប្រមូលទិញត្រីអណ្តែងពីប្រជា កសិករចន្លោះពី៥តោន ទៅ ១០តោនជារៀងរាល់ថ្ងៃ ដើម្បីយកទៅលក់បន្ត និងបំពេញតម្រូវការទីផ្សាក្នុងស្រុក នេះបើយោងតាមការចុះផ្សាយរបស់ក្រសួងព័ត៌មាន។ លោក ផន រ៉ានី ម្ចាស់កសិ ដ្ឋាន C.A.N ស្ថិតនៅឃុំជ្រេះ ស្រុកមេសាង ខេត្តព្រៃវែង បានប្រាប់វិទ្យុជាតិកម្ពុជាថា ក្រៅពីបានបង្កើតកសិដ្ឋានចិញ្ចឹមត្រីខ្លួនឯង អស់រយៈ ពេលជាង២ឆ្នាំមកហើយ ពេលនេះលោកក៏បានទទួលទិញត្រីអណ្ដែងវិញ ពីប្រជា កសិករទូទាំងប្រទេសផងដែរ។

លោកបញ្ជាក់ថា ការប្រមូលទិញនេះ ដោយសារតែប្រជាជនកម្ពុជាកាន់តែច្រើន ចូលចិត្តបរិភោគត្រីក្នុងស្រុកជាងត្រីនាំចូល។ម្យ៉ាងវិញទៀត ការជួយទិញត្រីនេះ ក៏ជាកាលើក ទឹកចិត្ត និងបង្កើតការងារជូនពួកគាត់ក្នុងរដូវកាលកូវីដនេះ ជាពិសេសកាត់បន្ថយការធ្វើចំណាកស្រុក។

ជាមួយគ្នានេះ លោកបានអំពាវនាវដល់ប្រជាពលរដ្ឋបន្តជួយគាំទ្រ ត្រីចិញ្ចឹមក្នុងស្រុកឱ្យបានច្រើន ដើម្បីលើកទឹក ចិត្តដល់ប្រជាកសិករឱ្យមានកម្លាំងចិត្តចិញ្ចឹមបន្តទៀត។ សូមបញ្ជាក់ថា កសិដ្ឋានចិញ្ចឹមត្រី C.A.N នេះ បានបង្កើតតាំងពីឆ្នាំ២០១៨ លើផ្ទៃដី២ហិកតា មានស្រះមេពូជចំនូន៤០ស្រះ និងអាង ចិញ្ចឹមត្រីធម្មតាចំនួន១០០ អាង ដែលមានប្រភេទត្រីរួមមាន ត្រីអណ្ដែង, ត្រីផ្ទក់, ត្រីឆ្ពិន, ត្រីក្រាញ់, និងត្រីទីឡាព្យា៕

ប្រភព៖ ក្រសួងព័ត៌មាន