យោងតាមការចុះផ្សាយរបស់ក្រសួងព័ត៌មាន​បានឱ្យដឹងថា របរចិញ្ជឹមមាន់ខ្មៅលក់របស់ប្រជាកសិករនៅខេត្តកំពត កំពុងមានទីផ្សារល្អ ហើយអាចរកចំណូលបាន ជាង ១៥០០ដុល្លារ ក្នុងមួយខែ ដែលអាចជួយសម្រួលដល់ជីវភាពប្រចាំថ្ងៃបាន។ អ្នកស្រី ណាន់ បូរ៉ា ជាកសិកចិញ្ចឹមមាន់ រស់នៅស្រុកឈូក ខេត្តកំពត បានឲ្យដឹងថា អ្នកស្រី បានផ្លាស់ប្តូរពីការចិញ្ចឹមមាន់ខ្មែរ មកជាការចិញ្ចឹមមាន់ខ្មៅវិញ ដោយសារមានលក្ខណៈងាយស្រួលក្នុងការចិញ្ចឹម ដូចមាន់ស្រែធម្មតា ជាពិសេស គឺទទួលបាន តម្លៃថ្លៃជាងមាន់ធម្មតា។

អ្នកស្រីបន្តថា ដំបូងឡើយអ្នកស្រី មានការព្រួយបារម្ភចំពោះការទិញពូជមាន់ខ្មៅមកចិញ្ចឹម ពីព្រោះវាមានតម្លៃថ្លៃ ដោយមេ បា មាន់ខ្មៅ មួយមានតម្លៃ២០០ដុល្លារឡើងទៅ និងកូនមាន់អាយុមួយខែមានតម្លៃថ្លៃចាប់ពី១០ដុល្លាររហូតដល់៣០ដុល្លារក៏មាន ប៉ុន្តែមកដល់ពេលបច្ចុប្បន្ននេះ ទីផ្សារមាន់ខ្មៅ គឺមានតម្រូវការច្រើន ទាំងសាច់ ទាំងមេពូជ ទាំងកូនមាន់ មានអ្នកមកទិញច្រើន ធ្វើឲ្យការ ចិញ្ចឹមទទួលបានចំណូលច្រើន។ អ្នកស្រីបានបញ្ជាក់ថា សព្វថ្ងៃអ្នកស្រីបាន ភ្ញាស់កូនមាន់លក់ សឹងតែមិនទាន់អ្នកទិញនោះទេ ។

សំឡេង៖ ខ្ញុំលក់បានតែ១៥០០ដុល្លារទៅ ១៦០០ដុល្លារក្នុងមួយខែ គឺខ្ញុំលក់បានគ្រប់ខេត្តក្រុង លក់ដាច់ច្រើនជាងគេទៅ ខាងខេត្ត បាត់ដំបង ពោធិ៍សាត់ សឹងផ្គត់ផ្គង់ឲ្យភ្ញៀវមិនគ្រាន់នៅក្នុងមួយខែៗ អ្នកទិញគាត់រកមាន់អាយុមួយខែ យើងចាប់ផ្ដើមភ្ញាស់បន្តទៀត ដើម្បីលក់ជូនភ្ញៀវ បន្តរហូតចឹងទៅ ភាគច្រើនគាត់ទិញទៅធ្វើពូជបន្ត គឺអត់សូវមានអ្នកទិញយកទៅបរិភោគនោះទេព្រោះវាមានតម្លៃថ្លៃ។

អ្នកស្រីបន្ថែមថា មាន់ខ្មៅមានលក្ខណៈងាយស្រួលចិញ្ចឹម ដូចមាន់ស្រែធម្មតា ប៉ុន្តែវាឆាប់ធំលឿនជាងមាន់ស្រែ ហើយការបរិភោគសាច់ គឺជួយប៉ូវកម្លាំង មានរសជាតិឆ្ងាញ់ និងជួយឲ្យមានសុខភាពល្អ ជាងមាន់ធម្មតា ដូច្នោះសូមបងប្អូនប្រជាកសិករ ដែលមានបំណងចង់ ចិញ្ចឹមមាន់ខ្មៅ សូមកុំមានការព្រួយបារម្ភរឿងទីផ្សារ។

សូមបញ្ជាក់ថា បច្ចុប្បន្នអ្នកស្រីណាន់ បូរ៉ា បានចិញ្ចឹមមេពូជមាន់ខ្មៅជាង ១០០ក្បាល និងភ្ញាស់កូនមាន់ខ្មៅ បានរាប់ពាន់ក្បាល ដោយមានលក់ពូជមាន់ម៉ុងហ្គោល ពូជយូណាន និងពូជម៉ុងហ្គោលកត្មាត ដោយកូនមាន់មួយក្បាលលក់បានពី ៣ដុល្លារដល់១៥ដុល្លារ ចំពោះមាន់មេពូជលក់បានមួយក្បាលពីតម្លៃ១៨០ដុល្លារឡើងទៅ ៕

អត្ថបទ៖ ក្រសួងព័ត៌មាន