ដំណាំត្រសក់ស្រូវផ្អែម ពូជជប៉ុនដែលដាំក្នុងកសិដ្ឋានមួយនៅស្រុកឈូក ខេត្តកំពត កំពុងទទួលបាន ការគាំទ្រខ្លាំងពីអតិថិជនព្រោះវាមានរសជាតិផ្អែមឆ្ងាញ់ និងផ្តល់អត្ថប្រយោជន៍ច្រើនដល់សុខភាពអ្នកបរិភោគ។ លោក គឹម ម៉ារិទ្ធ នាយកគ្រប់គ្រងកសិដ្ឋាន អាគ្រីអន បានប្រាប់វិទ្យុជាតិកម្ពុជាថា លោកបានចាប់ផ្ដើមបើកកសិដ្ឋានដំណាំសុវត្ថិភាពត្រសក់ផ្អែមនេះ អស់រយៈពេល១ឆ្នាំមកហើយ លើផ្ទៃដីជាង ១ហិកតា ដោយមួយថ្ងៃអាចលក់បាន ៥០ផ្លែ ហើយក្នុង១គីឡូក្រាមតម្លៃប្រមាណ ១៥ដុល្លារ។
លោកបញ្ជាក់ថា ដំណាំប្រភេទនេះ អាចប្រមូលផលបានរាល់ថ្ងៃក្នុងរង្វង់ ៣ខែ ហើយ១ឆ្នាំអាចដាំបាន ៤ដង ក្នុងលក្ខខណ្ឌ ដាំជាលក្ខណៈបច្ចេកទេសត្រឹមត្រូវ។ ត្រសក់ផ្អែមដែលដាំបានរាល់ថ្ងៃនេះ គឺ លក់ជូនដល់ប្រជាពលរដ្ឋក្នុងស្រុកទិញយកទៅបរិភោគ ។
លោកគឹម ម៉ារិទ្ធ បញ្ជាក់ថា ត្រសក់ផ្អែមប្រភេទនេះ មានអត្ថប្រយោជន៍ច្រើនណាស់សម្រាប់ជួយដល់សុខភាពអ្នកបរិភោគ ដោយបានជួយបន្ថែមជាតិទឹកដល់សុខភាពទាំងមនុស្សចាស់ និងកូនក្មេង ។ កសិដ្ឋានរបស់លោក ក៏បានបណ្តុះបណ្តាលបច្ចេក ទេសដាំដល់កសិករនៅក្បែរនោះផងដែរ ពីរបៀបដាំត្រសក់ស្រូវ និងដំណាំផ្សេងៗទៀត ដើម្បីជួយលើកកម្ពស់ជីវភាពប្រជាពលរដ្ឋដែលស្រឡាញ់មុខរបរនេះផងដែរ៕
ប្រភព៖ ក្រសួងព័ត៌មាន