ក្រសួងឧស្សាហកម្មជប៉ុនបាននិយាយថា កម្មវិធីថ្មីរបស់រដ្ឋាភិបាលដើម្បីផ្ដល់ជាសាច់ប្រាក់រហូតដល់ ៤០០,០០០ យ៉េន (ប្រមាណជិត ៤ពាន់ដុល្លារ) ក្នុងមួយក្រុមហ៊ុន សម្រាប់ក្រុមហ៊ុនតូចៗ ដែលរងផលប៉ះពាល់ដោយសារជំងឺរាតត្បាត មិនត្រឹមតែផ្ដល់ដល់អាជីវកម្មម្ហូបអាហារ និងភេសជ្ជៈប៉ុណ្ណោះទេ តែក្នុងនោះក៏មានផ្ទះសំណាក់ និងប្រតិបត្តិករតាក់ស៊ីផងដែរ។ យោងតាមការចុះផ្សាយរបស់សារព័ត៌មាន Japan Time បានឲ្យដឹងថា កម្មវិធីនេះត្រូវបានបង្កើតឡើង បន្ទាប់ពីសេចក្តីប្រកាសរបស់រដ្ឋាភិបាលអំពីភាពអាសន្នថ្មីនៃវីរុស Covid-19 ដែលឥឡូវនេះបានគ្របដណ្តប់លើទីក្រុងតូក្យូ និងខេត្តចំនួន ១០ ផ្សេងទៀត។

ជាមួយការបង្កើតកម្មវិធីនេះ រដ្ឋាភិបាលសង្ឃឹមថានឹងចាប់ផ្តើមការទូទាត់ប្រាក់ឱ្យបានឆាប់បំផុតនៅខែមីនាបន្ទាប់ពីរកឃើញប្រតិបត្តិករអាជីវកម្ម ដើម្បីប្រើការនៅក្នុងគម្រោង និងបង្កើតប្រព័ន្ធពាក់ព័ន្ធ។ ក្នុងនោះផងដែរ អាជីវកម្មដែលមានសិទ្ធិទទួលបាន គឺជាប្រភេទងអាជិវកម្មដែលមានការលក់់ធ្លាក់ចុះ ៥០% ឬ ច្រើនជាងនេះ នៅក្នុងខែមករា ឬ ខែកុម្ភៈ ពីកម្រិតនៃការលក់ឆ្នាំមុន។ គ្រោងការណ៍ផ្តល់ជំនួយនេះនឹងផ្តល់ឱ្យក្រុមហ៊ុនតូចនិងតូចរហូតដល់ ៤០០,០០០ យ៉េន និងប្រជាជនដែលរកស៊ី ដោយខ្លួនឯងហូតដល់ ២០០,០០០ យ៉េន។

ជាងនេះទៅទៀត គ្រោងការណ៍ផ្ដល់ជំនួយនេះនឹងគ្របដណ្តប់អ្នកផ្គត់ផ្គង់នៅទូទាំងប្រទេស ដែលទាក់ទងដោយផ្ទាល់ ឬ ដោយប្រយោលជាមួយភោជនីយដ្ឋាន និងបារនៅតាមតំបន់នានាដែលស្ថិតនៅក្រោមការប្រកាសអាសន្ន។ មិនតែប៉ុណ្ណោះទេ ប្រតិបត្តិករអាជីវកម្មនៅក្នុងតំបន់បែបនេះ ដែលរងផលប៉ះពាល់ដោយការរឹតត្បិតដោយស្ម័គ្រចិត្ត ក្នុងការចេញទៅក្រៅ ក៏នឹងមានសិទ្ធិទទួលបានកម្មវិធីអត្ថប្រយោជន៍ថ្មីផងដែរ។ ប៉ុន្តែទោះជាយ៉ាងណាក៏ដោយ ក្រសួងគ្រោងនឹងស្នើសុំឱ្យបេក្ខជនដាក់ពាក្យសុំរបាយការណ៍ពន្ធលើប្រាក់ចំណូលឆ្នាំមុន ច្បាប់ចម្លងនៃសៀវភៅលក់សម្រាប់ខែនេះ ឬ ខែក្រោយ និងឯកសារដែលបញ្ជាក់ថា រយៈពេលប្រតិបត្តិការខ្លីជាងមុន និងការរឹតត្បិតដោយស្ម័គ្រចិត្តដែលស្ថិតក្រោមភាពអាសន្ន កំពុងប៉ះពាល់ដល់ពួកគេ៕

អត្ថបទ៖ លីនី
ប្រភព៖ japantimes