ភោជនីយដ្ឋានជាង ១១ ម៉ឺនកន្លែងត្រូវបានបិទជាអចិន្ត្រៃយ៍ ឬយូរអង្វែងនៅទូទាំងសហរដ្ឋអាមេរិក ដោយសារឧស្សាហកម្មនេះទទួលរងផលប៉ះពាល់ពីជំងឺរាតត្បាត Covid-19 ។ លោក Sean Kennedy អនុប្រធានប្រតិបត្តិកិច្ចការសាធារណៈនៃសមាគមបាននិយាយនៅក្នុងលិខិតមួយទៅកាន់សភាថា « ឧស្សាហកម្មភោជនីយដ្ឋាន មិនអាចរង់ចាំការធូរស្បើយបានទៀតទេ អ្វីដែលបានរកឃើញទាំងនេះបញ្ជាក់កាន់តែច្បាស់នោះគឺថា ភោជនីយដ្ឋានគ្រប់ប្រភេទជាង ៥០០,០០០ ភោជនីយដ្ឋានស្ថិតក្នុងការធ្លាក់ចុះសេដ្ឋកិច្ច។

លោកបន្តថា « ខណៈពេលដែលប្រជាជននៅតែបន្តស្នាក់នៅ និងញ៉ាំនៅផ្ទះ និងបំរាមបរិភោគអាហារក្នុងហាងនៅពេលថ្មីៗនេះត្រូវបានដាក់ចេញពាសពេញសហរដ្ឋអាមេរិក ភោជនីយដ្ឋានបានខិតខំរក្សាការលក់នៅក្នុងតំបន់ដែលរងគ្រោះច្រើនជាងគេដូចជានៅទីក្រុង New York និងរដ្ឋ Illinois ដោយស្ទើរតែ ៩០% នៃសេវាកម្មរបស់ភោជនីយដ្ឋាននៅក្នុងការស្ទង់មតិបានរាយការណ៍ថា មានការធ្លាក់ចុះ ដោយប្រាក់ចំណូលបានធ្លាក់ចុះជាមធ្យម ៣៦% ។

យោងតាមការស្ទង់មតិបានឱ្យដឹងថា ប្រតិបត្តិករចំនួន ៣៧% និយាយថា ភោជនីយដ្ឋានរបស់ពួកគេនៅតែមិនអាចធ្វើជំនួញបានរយៈ ៦ ខែទៀត ប្រសិនបើមិនមានកញ្ចប់ជំនួយបន្ថែមរបស់រដ្ឋាភិបាលទេនោះ។ ប្រតិបត្តិករជាច្រើន កំពុងពិចារណាបិទជាបណ្តោះអាសន្នរហូតដល់មានលក្ខខណ្ឌប្រសើរឡើង។

គួរឱ្យដឹងផងដែរថា ជាមួយនឹងករណីនៃការកើនឡើងនេះរដ្ឋាភិបាលញូវយ៉កបាននិយាយថា ការបរិភោគអាហារក្នុងហាងនឹងត្រូវបិទនៅក្នុងទីក្រុង New York និងកាត់បន្ថយទូទាំងរដ្ឋប្រសិនបើអត្រាមន្ទីរពេទ្យក្នុងតំបន់មិនមានស្ថេរភាពបន្ទាប់ពី ៥ ថ្ងៃ៕

អត្ថបទ៖ នីតា
ប្រភព៖ nationthailand