ក្រុមហ៊ុនផលិតឱសថ Pfizer របស់សហរដ្ឋអាមេរិក បានបង្កើតកម្មវិធីចែកចាយសាកល្បងសម្រាប់វ៉ាក់សាំងការពារជំងឺ COVID-19 ពិសោធរបស់ខ្លួនក្នុងរដ្ឋចំនួន ៤ នៅអាមេរិក។ វ៉ាក់សាំងរបស់ Pfizer ដែលត្រូវបានបង្ហាញថា មានប្រសិទ្ធភាពជាង ៩០% ក្នុងការការពារជំងឺ Covid-19 ដោយផ្អែកលើទិន្នន័យដំបូង ដែលតម្រូវឱ្យដឹកជញ្ជូន និងរក្សាទុកក្នុងសីតុណ្ហភាព -៧០ អង្សាសេ ពោលគឺទាបជាងកំរិតវ៉ាក់សាំងវ៉ាក់សាំងដទៃទៀតដែលរក្សាទុកក្នុងសីតុណ្ហភាពពី ២ ទៅ ៨ អង្សាសេ។

Pfizer បាននិយាយនៅក្នុងសេចក្តីថ្លែងការណ៍មួយថា « យើងសង្ឃឹមថា លទ្ធផលដែលទទួលបានពីអ្នកសាកល្បងការចាក់វ៉ាក់សាំងនេះ នឹងក្លាយជាគំរូមួយសម្រាប់សហរដ្ឋអាមេរិក និងរដ្ឋាភិបាលអន្តរជាតិនៅពេលពួកគេត្រៀមអនុវត្តកម្មវិធីវ៉ាក់សាំងការពារជំងឺ Covid-19 »។

ទន្ទឹមនឹងនេះ Pfizer បានជ្រើសរើសយករដ្ឋ Mexico, Rhode Island, Tennessee និង Texas សម្រាប់កម្មវិធីនេះ បន្ទាប់ពីពិចារណាលើភាពខុសគ្នារបស់ពួកគេលើទំហំទូទៅ ភាពចម្រុះនៃប្រជាជន ហេដ្ឋារចនាសម្ព័ន្ធនៃការចាក់ថ្នាំបង្ការ នឹងតម្រូវឱ្យដល់បុគ្គលម្នាក់ៗនៅតាមទីប្រជុំជន និងជនបទ។

Pfizer និងដៃគូរបស់ខ្លួនក្រុមហ៊ុន BioNTech មានកិច្ចព្រមព្រៀងចំនួន ១.៩៥ ពាន់លានដុល្លារដើម្បីផ្គត់ផ្គង់វ៉ាក់សាំងចំនួន ១០០ លានដូសដល់រដ្ឋាភិបាលអាមេរិក ដែលមានជម្រើសក្នុងការទទួលយកនូវថ្នាំបន្ថែមចំនួន ៥០០ លានដូស។

គួរឱ្យដឹងផងដែរថា កាលពីថ្ងៃទី ១៦ ខែវិច្ឆិកា គូប្រជែងរបស់ Pfizer គឺ Moderna ក៏បានប្រកាសថា វ៉ាក់សាំងពិសោធន៍របស់ខ្លួនមានប្រសិទ្ធភាព ៩៤.៥% ក្នុងការការពារជំងឺ Covid-19 ដោយផ្អែកលើទិន្នន័យបណ្តោះអាសន្នពីការសាកល្បងដំណាក់កាលចុងក្រោយ ដោយជំរុញក្តីសង្ឃឹមថាវ៉ាក់សាំងប្រឆាំងនឹងជំងឺរាតត្បាតនេះអាចត្រៀមសម្រាប់ប្រើប្រាស់ក្នុងពេលឆាប់ៗនេះ៕

អត្ថបទ៖ នីតា
ប្រភព៖ channelnewsasia