ចៅក្រមសហរដ្ឋអាមេរិកកាលពីដើមសប្ដាហ៍កន្លងទៅនេះ បានយល់ព្រមលើកិច្ចព្រមព្រៀងមួយ ដើម្បីជួយសង្រ្គោះក្រុមហ៊ុនលក់រាយ JC Penney ពីការក្ស័យធនដែលបណ្ដាលមកពីជំងឺ Covid-19។ នៅក្នុងសេចក្ដីថ្លែងការណ៍មួយក្រុមហ៊ុនបាននិយាយថា តុលាការក្ស័យធនសហរដ្ឋអាមេរិកសម្រាប់តំបន់ភាគខាងត្បូងនៃរដ្ឋតិចសាស់បានយល់ព្រមលើកិច្ចព្រមព្រៀងនេះ ដែលនឹងអនុញ្ញាតឱ្យក្រុមហ៊ុនលក់រាយអាយុកាល ១១៨ឆ្នាំនេះ អាចរួចផុតពីភាពក្ស័យធនមុនរដូវឈប់សម្រាកខាងមុខនេះ ហើយកិច្ចព្រមព្រៀងជួយសង្គ្រោះត្រូវបានគេរំពឹងថានឹងជួយរក្សាការងារបានប្រមាណ ៦ ម៉ឺននាក់។
ប្រភពដដែលបានឲ្យដឹងបន្ថែមថា កិច្ចព្រមព្រៀងនេះត្រូវបានធ្វើឡើងក្នុងដោះដូរជាច្រើន ដូចជា ក្រុមហ៊ុន H/2 Capital Partners ដែលផ្ដល់ប្រាក់កម្ចីនឹងលើកលែងទោសបំណុលចំនួន ១ ពាន់លានដុល្លារជាថ្នូរនឹងទ្រព្យសម្បត្តិ ១៦០ និងមជ្ឈមណ្ឌលចែកចាយចំនួន ៦ ។ ប្រតិបត្តិករផ្សារទំនើប Simon Property Group និង Brookfield Property Partners នឹងទទួលបានប្រតិបត្តិការលក់រាយដែលបានធ្លាក់ចុះរបស់ក្រុមហ៊ុនក្នុងតម្លៃ ១.៧៥ ពាន់លានដុល្លារជាសាច់ប្រាក់ និងបំណុល។

ការយល់ព្រមលើការលក់នេះធ្វើឡើងមួយសប្តាហ៍បន្ទាប់ពីក្រុមមេធាវី JC Penney បានប្រកាសអំពីការដោះស្រាយជាមួយក្រុមម្ចាស់បំណុលរបស់ខ្លួនស្ទើរតែទាំងអស់ដែលបានគាំទ្រដល់ការលក់ ហើយបានកត់សម្គាល់ចំណុចរបត់មួយនៅក្នុងករណីក្ស័យធនដែលត្រូវបានសម្គាល់ដោយការប្រកែកគ្នារវាងម្ចាស់បំណុល។ ទោះយ៉ាងណាក្រុមអ្នកកាន់ភាគហ៊ុនមួយក្រុមដែលការវិនិយោគនឹងត្រូវលុបចោលនៅតែប្រឆាំងនឹងកិច្ចព្រមព្រៀងនេះ។

គួរឲ្យដឹងផងដែរថា JC Penney បានដាក់ពាក្យសុំក្ស័យធនកាលពីខែឧសភាជាមួយនឹងបំណុលជិត ៥ ពាន់លានដុល្លារ ក្រុមហ៊ុននេះ គឺជាក្រុមហ៊ុនលក់រាយមួយក្នុងចំណោមក្រុមហ៊ុនលក់រាយជាច្រើនរួមមានក្រុមហ៊ុន J Crew Group, Neiman Marcus និង Brooks Brothers ដែលបានស្វែងរកការការពារជំពូកទី១១ ចំពេលដែលជំងឺរាតត្បាតឆ្លងរាលដាល។ លោក James Cash Penney បានបើកក្រុមហ៊ុននៅឆ្នាំ១៩០២ ដោយបើកហាងដំបូងនៅ Wyoming ។ JC Penney បានផ្សព្វផ្សាយជាសាធារណៈនៅឆ្នាំ១៩២៩ ហើយក្នុងរយៈពេលជាច្រើនទសវត្សក្រោយមកទៀតបានក្លាយជាកន្លែងល្បីទូទាំងសហរដ្ឋអាមេរិក៕

អត្ថបទ៖ លីនី
ប្រភ​ព៖ cnbc