ក្រុមហ៊ុន Apple Inc បានឈប់លក់កាស និងឧបករណ៍បំពងប្រភេទ wireless ពីក្រុមហ៊ុន Sonos Inc, Bose Corp និង Logitech International SA ខណៈ Apple ត្រៀមបើកដំណើរការផលិតផលអូឌីយ៉ូថ្មីរបស់ខ្លួន។ ក្រុមហ៊ុនបច្ចេកវិទ្យាយក្សដែលមានមូលដ្ឋាននៅទីក្រុង Cupertino រដ្ឋ California បានលក់គ្រឿងបន្លាស់របស់ភាគីទីបីជាយូរមកហើយ នៅលើគេហទំព័ររបស់ខ្លួនដែលជាប្រតិបត្តិការពាណិជ្ជកម្មអេឡិចត្រូនិចធំបំផុតមួយនៅលើពិភពលោក។

យោងតាមការត្រួតពិនិត្យរបស់ Bloomberg កាសនិងឧបករណ៍បំពងសម្លេងទាំងអស់ពី Bose ឧបករណ៍បំពងសំលេងពី Logitech និងឧបករណ៍បំពងសម្លេងចុងក្រោយបំផុតរបស់ Sonos មិនឃើញមានដាក់លក់នៅលើ Apple’s online store ទៀតេកាលពីចុងខែមុននេះ។ ជាមួយគ្នានេះ និយោជិកនៅទីតាំងលក់រាយរបស់ Apple ក៏ត្រូវបានណែនាំឱ្យដកផលិតផលសម្រាប់លក់នៅតាមហាងក្នុងប៉ុន្មានថ្ងៃថ្មីៗនេះដែរ។

ការផ្លាស់ប្តូរនេះកើតឡើងនៅពេលដែលក្រុមហ៊ុន Apple អភិវឌ្ឍផលិតផលថ្មីជាច្រើន ដើម្បីពង្រីកយុទ្ធសាស្ត្រសម្លេងរបស់ខ្លួន។ យោងតាមទីភ្នាក់ងារព័ត៌មាន Bloomberg បានរាយការណ៍ថា កាសស្តាប់ត្រចៀក (over-ear headphones) ដែលមានយីហោ Apple ដំបូងគេអាចត្រូវបានប្រកាសនៅដើមឆ្នាំនេះ។ ក្រុមហ៊ុនក៏បានធ្វើការលើឧបករណ៍បំពងសំឡេងឆ្លាតវៃ HomePod ស៊េរីតូចជាងមុនផងដែរ។

គួរបញ្ជាក់ផងដែរថា នៅឆ្នាំ២០១៤ Apple បានឈប់លក់នាឡិកាដៃម៉ាក Fitbit បន្ទាប់ពីប្រកាសបង្ហាញ Apple Watch ។ ក្រុមហ៊ុនបានដកផលិតផលម៉ាក Bowers & Wilkins កាលពីប៉ុន្មានឆ្នាំមុន ហើយបានដកឧបករណ៍ Bang & Olufsen ចេញពីធ្នើរហាងកាលពីដើមឆ្នាំនេះ។ Apple បានផ្តល់ផលិតផលពី Bose និង Logitech អស់រយៈពេលជាច្រើនឆ្នាំ ប៉ុន្តែបានបញ្ឈប់ការលក់គ្រឿងបន្លាស់ Bose ជាបណ្តោះអាសន្នក្នុងឆ្នាំ២០១៤ បន្ទាប់ពីលោក Bose បានប្តឹងក្រុមហ៊ុន Beats ដែលជាកម្មសិទ្ធិរបស់ Apple ពីបទរំលោភប៉ាតង់។

យ៉ាងណាមិញគិតត្រឹមថ្ងៃច័ន្ទនេះ មានតែកាសមួយដែលផ្តល់ដោយក្រុមហ៊ុនអេបផលគឺ AirPods និង AirPods Pro ពីផលិតផលពីក្រុមហ៊ុនបុត្រសម្ព័ន្ធ Beats ប៉ុណ្ណោះដែលដាក់លក់នៅ Apple។ ហើយឧបករណ៍បំពងសម្លេងឆ្លាតវៃតែមួយគត់ដែលមានលក់់នៅលើគេហទំព័ររបស់ Apple គឺឧបករណ៍បំពងសំឡេង HomePod និង Beats Pill +៕

អត្ថបទ៖ លីនី
ប្រភព៖ bangkokpost