លោក Dan Lok ដែលជាមហាសេដ្ឋី និងជាសហគ្រិនដ៏ជោគបំផុតម្នាក់ធ្លាប់បានសរសេរថា៖ អ្នកលក់ភាគច្រើនឮពាក្យថា “ទេ” ច្រើនជាង “បាទ/ចាស” ពីព្រោះពួកគេធ្វើខុសរឿងជាច្រើន ហើយកំហុសទាំងនោះគឺមានជាទូទៅតែម្ដង។ ដូច្នេះដើម្បីការលក់របស់អ្នកចម្រើនទៅបានលុះត្រាតែអ្នកកែកំហុងទាំង ៧យ៉ាង ដែលរៀបរាប់ខាងក្រោមនេះ៖

១. មានផ្នត់គំនិតខ្លួនឯងនៅក្នុងការលក់៖ វាជាបញ្ហាដែលអ្នកគិតស្មានមិនដល់ ប៉ុន្តែក្នុងនាមជាអ្នកលក់សូមកុំតោងទាមអ្នកទិញ។ ត្រូវទាក់ទាញអតិថិជនរបស់អ្នកក្នុងនាមអ្នកជាអ្នកផ្គត់ផ្គង់តម្រូវការ ព្រោះថាអតិថិជនត្រូវការទិញរបស់ពីអ្នក មិនមែនខ្លួនអ្នកទៅទិញរបស់ពីអតិថិជនវិញនោះទេ។ សម្ដីរបស់អ្នកលក់គឺសំខាន់ខ្លាំងណាស់ បើនិយាយទៅដូចជាទាមទារការទិញខ្លាំងពេក វាប្រៀបដូចជាដុកទ័រព្យាយាមធ្វើរោគវិនិច្ឆ័យ ប៉ុន្តែអ្នកជំងឺដឹងគុណថ្នាំច្រើនជាង។

២. បង្ខំចិត្តអតិថិជនពេក៖ អ្នកលក់ជាច្រើនតែងព្យាយាមចង់ឱ្យអតិថិជនត្រូវតែទិញ ដែលជាលទ្ធផលវាដូចជាការអង្វរឱ្យគេទិញ។ ធ្វើបែបនេះអ្នកទិញគ្មានអារម្មណ៍ល្អជាមួយឡើយ ហើយក៏មិនហ៊ានណែនាំអ្នកផ្សេងទៀតដែរ។ ក្នុងនាមជាអ្នកលក់អ្នកត្រូវសួរពីបញ្ហា​ ឬចំណូលចិត្តរបស់អ្នកទិញ ហើយដោះស្រាយបញ្ហារបស់អ្នកទិញយ៉ាងមានប្រសិទ្ធភាព ដើម្បីឱ្យគេជ្រើសរើសខ្លួនឯងថា តើគួរឬមិនគួរទិញពីអ្នក។

៣. បោះបង់ការគ្រប់គ្រង៖ ជាលទ្ធផលនៃការអស់សង្ឃឹមក្នុងការលក់ អ្នកលក់ជាច្រើនតែងតែអស់ការគ្រប់គ្រង និងយល់ព្រមតាមតែអ្នកដែលព្រមទិញ។ ទោះបីជាការធ្វើបែបនេះអាចធ្វើឱ្យការព្រមព្រៀងបញ្ចប់ទៅបានមួយគ្រា ប៉ុន្តែទីបំផុតអ្នកលក់នឹងទាមទារការទិញពីអតិថិជនដែលគេមិនបានពេញចិត្ត។ ត្រូវចេះទំនាក់ទំនងឱ្យគេមើលឃើញថាអ្នកពិសេស និងដោះស្រាយបញ្ហាបានល្អជាងគេ ដូច្នេះតម្លៃអ្នកប៉ុនណា ឬតម្លៃទំនិញប៉ុនណា អ្នកទិញនឹងមិនសាញតម្លៃជាមួយអ្នកនោះទេ។

៤. ពិភាក្សារឿងតម្លៃលឿនជ្រុល៖ ត្រូវដឹងថាអ្នកទិញគិតពីរឿង២ចំណុច «គុណតម្លៃ និង តម្លៃ» ដូច្នេះមុនពេលអ្នកនិយាយពីតម្លៃ អ្នកលក់ត្រូវដោះស្រាយបញ្ហារបស់អ្នកទិញ ដើម្បីឱ្យអ្នកទិញយល់ពីគុណតម្លៃតាមសមត្ថភាពក្នុងការដោះស្រាយរបស់អ្នកលក់។ តម្លៃជាបញ្ហានៅពេលដែលទំនិញរកមិនឃើញគុណតម្លៃ ដូច្នេះបើការដោះស្រាយរបស់អ្នកទៅឱ្យអ្នកទិញមានខ្លឹមសារអាចឈ្នះការចង់បានរបស់អ្នកទិញ វាគ្មានរបស់ណាដែលថាថ្លៃនោះទេ។

៥. ការពន្យារពេល៖ នៅពេលដែលអ្នកលក់របស់មានតម្លៃរាប់ម៉ឺនដុល្លារ អ្នកប្រហែលជាត្រូវការប្រើការសន្ទនាជាច្រើនដង ប៉ុន្តែយកល្អអ្នកគួរតែសម្រេចការព្រមព្រៀងគ្នាក្នុងសន្ទនាដំបូងបានហើយ។ ការពន្យារពេលនឹងធ្វើឱ្យបាត់ការព្រមព្រៀងទិញ ដូច្នេះកុំឱ្យបាត់បង់វាទៅឱ្យសោះ។ ប្រសិនបើអតិថិជនដ៏មានសក្ដានុពលរបស់អ្នកនិយាយថា គិតមើលសិនឬនិយាយពិភាក្សាគ្នាសិន មានន័យថាគេកំពុងតែមិនទាន់ច្បាស់លាស់ជាមួយអ្នក។ ត្រូវសួរពីហេតុផលដែលគេស្ទាក់ស្ទើរ ហើយដោះស្រាយវាឱ្យបានល្អ​​បំផុត។ ឧ៖ បើអ្នកទិញនិយាយថាខ្វះលុយ អ្នកលក់គួរណែនាំជម្រើសហិរញ្ញប្បទាន ឬផែនការបង់ប្រាក់។

៦. ចែករំលែករឿងផ្សេងចាកប្រធាន៖ កុំយករឿងជោគជ័យរបស់អ្នកទិញផ្សេងទៀតមកនិយាយ ពីព្រោះអ្នកទិញដែលកំពុងនិយាយជាមួយអ្នកមិនខ្វល់ជាមួយរឿងផ្សេងនោះទេ។ អ្នកទិញនឹងចាំតែស្ដាប់នូវអ្វីដែលអ្នកលក់អាចផ្ដល់សម្រាប់តម្រូវការរបស់ពួកគេប៉ុណ្ណោះ ដូច្នេះនិយាយតែកិច្ចការរបស់អ្នកទាំងសងខាងបានហើយ។ មិនត្រូវនិយាយទូរស័ព្ទពេលពិភាក្សាជាមួយអ្នកទិញរបស់អ្នក ព្រោះគេនឹងអស់ការចាប់អារម្មណ៍ ហើយអ្នកក៏បាត់អ្នកទិញទៅតាមហ្នឹង។

៧. បញ្ចប់ការព្រមព្រៀងខុស៖ នៅពេលដែលអ្នកទិញយល់ព្រមជាមួយអ្នក​ អ្នកមិនគួរនៅស្ងៀមនោះទេ​ ​ត្រូវបញ្ចប់ដោយការចាប់ដៃដើម្បីបញ្ជាក់ការព្រមព្រៀងនេះ។ ត្រូវសួរអតិថិជនរបស់អ្នកថា តើគាត់ច្បាស់ទេថាបានត្រៀមខ្លួនរួចរាល់? បើពួកគាត់សម្រេចហើយ អ្នកអាចចូលទៅជំហានបន្ទាប់ ហើយពិភាក្សាអំពីលក្ខខណ្ឌ។ សម្ដីរបស់អ្នកលក់គ្រប់ម៉ាត់គឺសំខាន់ ព្រោះអ្នកទិញនឹងស្ទាក់ស្ទើរហើយគិតខុសដោយសារសម្ដីអ្នកលក់។ កិច្ចព្រមព្រៀងរបស់អ្នកទាំងសងខាងគួរតែជាការព្រមព្រៀង ឬក្រដាសស្នាម មិនគួរស្ដាប់មើលទៅដូចជាកិច្ចសន្យានោះទេ។ ចុងបញ្ចប់ត្រូវនិយាយថា «អបអរសាទរ»​ ជំនួសពាក្យថា «អរគុណ»​ និងរក្សាភាពស្មើគ្នារវាងអ្នកទាំងសងខាង៕

អត្ថបទ៖ លីដា
ប្រភព៖ Entrepreneur