នៅក្នុងវិបត្តិដែលបង្កឡើងដោយវីរុស Covid-19 នេះមិនថា​ក្រុមហ៊ុនតូចធំ ក្រុមហ៊ុនដែលល្បីបង្កើតយូរឆ្នាំ ឬ ក្រុមហ៊ុនដែលទើបនឹងបង្កើតថ្មីសុទ្ធសឹងតែមិនអាចឆ្លងផុតពីការខាតបង់ចំណូលឡើយនៅដើមឆ្នាំនេះ។ ហើយនៅក្នុងវិបត្តិនេះក្រុមហ៊ុន និងអាជីវកម្មមិនតិចទេដែលបានប្រកាសបិទទ្វារ ហើយខ្លះទៀតសឹងតែក្ស័យធនទៅហើយប្រសិនបើមិនមានការផ្ដល់ប្រាក់សង្រ្គោះ និងកម្ចីពីរដ្ឋាភិបាល។

ប៉ុន្តែបើក្រឡេកទៅមើលជ្រុងមួយ គ្មាននរណាម្នាក់តស៊ូនឹងភាពលំបាកដូចលោក John Paul DeJoria នោះទេ ខណៈសហស្ថាបនិកនៃខ្សែផលិតផលថែរក្សាសក់ John Paul Mitchell Systems ត្រូវបាត់បង់ផ្ទះសម្បែងរហូតដល់ ២ដង មុនពេលក្លាយជា សហគ្រិនបង្កើតក្រុមហ៊ុនជាច្រើនក្នុងដៃ (serial entrepreneur) និងក្លាយជាមហាសេដ្ឋី។ ជាមួយនឹងបទពិសោជន៍ដែលគាត់ធ្លាប់បានជួបប្រទះក្នុងពេលលំបាកមហាសេដ្ឋីរូបនេះ បានចែករំលែកទស្សនវិជ្ជាអាជីវកម្មរបស់គាត់ហើយបានផ្តល់ដំបូន្មានអំពីរបៀបដែលសហគ្រិនអាចតស៊ូបានក្នុងកំឡុងពេលមានវិបត្តិនាពេលបច្ចុប្បន្នចំនួន ៤ ដូចខាងក្រោម៖

១. កុំបញ្ចុះតម្លៃ តែត្រូវផ្ដល់តតម្លៃបន្ថែម៖ ខណៈពេលដែលអាជីវកម្មជាច្រើនបានលក់បញ្ចុះតម្លៃក្នុងពេលមានវិបត្តិ អាចនឹងបង្កជាផលប៉ះពាល់នៅពេលដែលពួកគេចង់ដំឡើងថ្លៃត្រឡប់ទៅធម្មតាវិញ។ លោក DeJoria បាននិយាយថា នៅពេលដែលអ្នកលក់បញ្ចុះតម្លៃ អតិជននៅតែមានអាមរ្មណ៍ថាពួកគេទិញផលិតផលក្នុងតម្លៃធម្មតាដដែល។ យ៉ាងណាមិញចំពោះហេតុផលនេះគាត់ណែនាំឱ្យផ្តល់ជូននូវផលិតផល ឬសេវាកម្មបន្ថែម ដោយរក្សាតម្លៃផលិតផលនៅថេរដដែល។ គាត់បានអះអាងថា ការផ្ដល់ផលិតផល ឬ សេវាកម្មផ្សេងទៀតបន្ថែមដល់អតិថិជន​ និងធ្វើឲ្យអ្នកទទួលបានអតិថិជនកាន់តែច្រើន ហើយវាក៏ជាលើកទឹកចិត្តក្នុងការទាក់ទាញអតិថិជនឲ្យនូវតែគាំទ្រ និងមកជាប្រចាំផងដែរ។

២.ទីផ្សាររសើប៖ នៅក្នុងពេលមានវិបត្តិនេះការផ្សព្វផ្សាយពីផលិតផល ឬ សេវាកម្មរបស់អ្នកដល់អតិជនដែលកំពុងជួបការលំបាក គឺជាហានិភ័យមួយរបស់អាជីវកម្ម ឬក្រមហ៊ុនរបស់អ្នក វាអាចនឹងធ្វើឲ្យផលិតផលបាត់បង់ប្រជាប្រិយភាព។ ត្រង់ចំណុចនេះលោក DeJoria ណែនាំឲ្យអាជីវកម្ម ឬ ក្រុមហ៊ុនទាំងអស់គួររៀបចំសារថ្លែងទៅកាន់អតិថិជន ដោយចាប់ផ្តើមជាមួយព័ត៌មានដូចជា នៅពេលអ្នកមានគម្រោងបើកឡើងវិញជាដើម។ ទីផ្សាររសើបគឺ ជាទីផ្សារដែលអាចប្រែប្រួលខ្លាំងនៅដំណឹងល្អ ឬដំណឹងអាក្រក់។ ក្រុមហ៊ុនជាច្រើនព្យាយាមជៀសវាងទីផ្សាររសើប ដោយកំណត់តម្លៃព័ត៌មានល្អ និងអាក្រក់។

៣.បង្កើតទំនាក់ទំនងមួយដើម្បីឲ្យអតិថិជនចូលរួមដោយខ្លួនឯង៖ ការបង្កើតទំនាក់ទំនងជាមួយមនុស្សមានច្រើនវិធីដែលយើងអាចធ្វើបាន តាមរយៈការសួរនាំ ការយល់ចិត្ត ដឹងសុខទុក្ខ និងអ្វីដែលអតិថិជនចង់បាន វាគឺជាវីធីសាស្រ្តចងចិត្តអតិថិជនដ៏មានប្រសិទ្ធិភាពបំផុត។ ត្រង់ចំណុចនេះ DeJoria បានអះអាងថាគឺ ជារឿងដ៏សំខាន់បំផុតមួយសម្រាប់អាជីវកម្ម។

៤. រក្សាភាពវិជ្ជាមាន៖ ការជម្រះគំនិតរបស់អ្នកចំពោះគំនិតអវិជ្ជមាន គឺសំខាន់ណាស់ ប្រសិនបើអ្នកបានចងគំនុំទាស់នឹងនរណាម្នាក់សូមអភ័យទោសដល់ពួកគេហើយបន្តដំណើរទៅមុខទៀត។ លោក DeJoria បាននិយាយថា ” អ្នកគ្រាន់តែនិយាយថានោះជាម្សិលមិញ យើងមិនអាចផ្លាស់ប្តូររឿងរ៉ាវកាលពីម្សិលមិញបានទេ ប៉ុន្តែក៏មិនបណ្ដោយឲ្យវាកើតឡើងនៅថ្ងៃស្អែកទៀតដែរ “។ សហគ្រិនរូបនេះបានបន្តថា ខណៈដែលពេលដែលវិបត្តិនាពេលបច្ចុប្បន្នធ្វើឱ្យពិបាកក្នុងការផ្ដោតលើភាពប្រាកដប្រជាក៏ដោយ តែលោកគិតថា វាជារឿងអស្ចារ្យណាស់ដែលវិបត្តិនេះកើតឡើង ព្រោះអ្វីដែលយើងបានឆ្លងកាត់នេះ វានឹងមិនសូវធ្ងន់ធ្ងរទៀតនោះទេនៅពេលវិបត្តិកើតមានលើកក្រោយទៀត៕

ប្រភព៖ inc
អត្ថបទ៖ លីនី