មុននេះឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ បានរៀបរាប់នៅលើផេកផ្លូវការរបស់ឯកឧត្តមថា៖ “ខ្ញុំបានផ្ដួចផ្ដើមគំនិតសំណូមពរដល់ក្រុមហ៊ុនបុរីប៉េងហួត នូវគម្រោងស្ថាបនាផ្លូវក្រោមដីដែលឆ្លងកាត់ពីបុរីប៉េងហួត(បឹងស្នោរ) មកផ្លូវជាតិលេខ១ ដើម្បីកុំឱ្យមានការកកស្ទះដល់ប្រជាពលរដ្ឋធ្វើដំណើរតាមផ្លូវជាតិលេខ១ និងប្រជាពលរដ្ឋរស់នៅក្នុងបុរីនេះផ្ទាល់ ដែលធ្វើដំណើរចេញចូលរាជធានីភ្នំពេញ។ រដ្ឋបាលរាជធានីភ្នំពេញ និងក្រុមហ៊ុនបុរីប៉េងហួតបានឯកភាពគ្នាលើគម្រោងស្ថាបនាផ្លូវក្រោមដីដែលតភ្ជាប់ពីផ្សារ PH ECO MALL ទៅផ្លូវជាតិលេខ១ ស្ថិតនៅក្នុងសង្កាត់និរោធន៍ ខណ្ឌច្បារអំពៅ រាជធានីភ្នំពេញ”។ គួរបញ្ជាក់ថាបុរី ប៉េង ហួត បានចំណាយដើមទុនសរុបជាង២០០លានដុល្លារអាមេរិក សាងសង់ផ្សារទំនើប PH ECO Mall នៅក្នុងគម្រោង ហ្គ្រេន ស្តារផ្លាទីនីម តំបន់បឹងស្នោរ និងគ្រោងបញ្ចប់ការសាងសង់ក្នុងឆ្នាំ២០២១ ខាងមុខនេះ៕