ផ្លែស្វាយខ្មែរកំពុងពេញនិយម និងផ្ទុះការគាំទ្រជាខ្លាំងនៅលើទឹកដីប្រទេសជប៉ុន ក្រោយជប៉ុនបានយកស្វាយខ្មែរច្នៃចេញជាភេសជ្ជៈយកទៅដាក់លក់លើវេបសាយ shop.umenoyado ព្រមទាំងនៅតាមបណ្ដាម៉ាតនានា ទទួលបានការគាំទ្រខ្លាំងមែនទែនពីសំណាក់ប្រជាជនជប៉ុន និងពីប្រជាជនខ្មែរដែលរស់នៅទីនោះ ពោលគឺលក់រហូតដល់ដាច់ស្តុកតែម្ដង។
បើតាមការបង្ហោះនៅលើគណនីផ្លូវការរបស់អ្នកស្រី សែម ណាវី ម្ចាស់ក្រុមហ៊ុន Sisyphus.inc បានឱ្យដឹងថា ភេសជ្ជៈដែលច្នៃចេញពីស្វាយខ្មែរ មានរសជាតិឆ្ងាញ់ណាស់ នេះដាច់ស្តុករហូត រកទិញទម្រាំតែបាន។
ទន្ទឹមនឹងនេះ អ្នកស្រីបានឱ្យដឹងបន្ថែមថា ខាងក្រុមហ៊ុនដែលច្នៃ បានមកពិភាក្សាជាមួយអ្នកស្រី ដេីម្បីរកវីធីសាស្រ្ត យកស្វាយខ្មែរមកប្រទេសជប៉ុនឱ្យបានកាន់តែច្រើន ដេីម្បីឱ្យស្វាយខ្មែរលេចធ្លោជាងប្រទេសថៃ និងហ្វីលីពីន ដោយសារស្វាយខ្មែរមានរសជាតិឆ្ងាញ់ជាងប្រទេសជិតខាងដាច់។ លើសពីនេះទៅទៀត ក្រុមហ៊ុនចង់ឱ្យស្វាយខ្មែរក្លាយជាស្វាយប្រេនមួយសម្រាប់ប្រទេសខ្មែរ ដែលមានផ្លាកសញ្ញាប្រចាំផលិតផល ដែលអាចសម្គាល់ថាជាផលិតផលខ្មែរ ដែលទទួលស្គាល់ពីរដ្ឋាភិបាល ផងដែរ។
អ្នកស្រីបានបន្ថែមទៀតថា កាលពីឆ្នាំមុន ក្រុមហ៊ុន នាំស្វាយខ្មែរមកជប៉ុនចំនួន ២០០តោន ហេីយឆ្នាំថ្មីនេះ ក្រុមហ៊ុនមានគំរោងនាំចូលស្វាយចូលប្រទេសជប៉ុនចាប់ពី ៣០០តោន ទៅ ៥០០តោន រឺច្រេីនជាងនេះទៅទៀត បើសិនជាអាចទទួលបានការសហការណាមួយពីប្រទេសខ្មែរ៕