យោងតាមការចុះផ្សាយរបស់សារព័ត៌មាន VNExpress ប្រទេសវៀតណាមបានប្រមូលពន្ធចំនួន ៣.៩៤ ពាន់ពាន់លានដុង (១៦៦.៥ លានដុល្លារអាមេរិក) ពីវេទិកាអនឡាញបរទេសចំនួន ៥៧ ក្នុងនោះក៏មាន៖ Google, Apple, Facebook, Netflix និង TikTok ក្នុងឆមាសទីមួយនៃឆ្នាំនេះ។

ប្រភពដដែលបានឱ្យដឹងថា ក្នុងចំណោមចំនួនសរុបខាងលើ ទឹកប្រាក់ចំនួន ៣.៤ ពាន់ពាន់លានដុង ត្រូវបានបង់ដោយផ្ទាល់តាមរយៈវិបផតថល (portal) នៃអគ្គនាយកដ្ឋានពន្ធដារ (GDT) ដែលត្រូវបានបង្កើតឡើងកាលពីខែមីនាឆ្នាំមុន ដើម្បីបង្កភាពងាយស្រួលដល់ក្រុមហ៊ុនយក្សឆ្លងព្រំដែនក្នុងការបង់ពន្ធរបស់ពួកគេនៅក្នុងប្រទេសវៀតណាម។ ដោយឡែកទឹកប្រាក់ដែលនៅសល់ ត្រូវបានបង់ដោយតំណាងរបស់ពួកគេនៅប្រទេសវៀតណាម។

ទន្ទឹមនឹងនេះ GDT ក៏បាននិយាយផងដែរថា ប្រាក់ចំណូលពន្ធពីវេទិកាពាណិជ្ជកម្មអេឡិចត្រូនិកក្នុងរយៈពេល ៥ ខែដំបូងនៃឆ្នាំនេះ ឈានដល់ ២៤៦ ពាន់លានដុង ស្មើនឹង ៣៤ នៃប្រាក់ចំណូលឆ្នាំ២០២២៕

អត្ថបទ៖ លីនី
ប្រភព៖ vnexpress