តម្លៃទឹកម្ទេសដ៏ពេញនិយមមួយឈ្មោះថា Sriracha បានកើនឡើងរហូតដល់ ៨ដងនៅក្នុងសហរដ្ឋអាមេរិក ដោយសារតែកង្វះ ម្ទេសក្រហម (jalapeños) ដែលជាសារធាតុផ្សំដ៏សំខាន់ ដែលបណ្ដាលមកពីគ្រោះរាំងស្ងួត។ ទឹកម្ទេសដ៏ល្បីនេះត្រូវបានផលិតដោយក្រុមហ៊ុន Huy Fong Foods ដែលជាកម្មសិទ្ធិរបស់មហាសេដ្ឋីជនជាតិវៀតណាមលោក David Tran និងត្រូវបានលក់ក្នុងតម្លៃ ៤០ដុល្លារក្នុងមួយដបសម្រាប់ចំណុះ ៥០០ ក្រាមនៅលើ eBay ខណៈកាលពីមុនវាមានតម្លៃត្រឹមតែ ៥ ដុល្លារប៉ុណ្ណោះ ហើយសម្រាប់ចំណុះដប ៨០០ក្រាម ត្រូវបានលក់ក្នុងតម្លៃ ៦០ ដុល្លារ។
ជាមួយគ្នានេះដែរ តម្លៃទឹកម្ទេសមួយប្រភេទនេះ នៅក្នុងហាងដែលនាំចូលរាប់ពាន់ដបក្នុងមួយឆ្នាំៗពីរដ្ឋកាលីហ្វ័រញ៉ា ក៏កើនឡើងដូចគ្នាដោយសារតែការផ្គត់ផ្គង់នៅតែខ្វះខាត។ ហើយថ្មីៗនេះ Huy Fong Foods បានប្រាប់ CNN ថា ក្រុមហ៊ុននៅតែជួបប្រទះការខ្វះខាតវត្ថុធាតុដើមដដែល ខណៈការខ្វះខាត ម្ទេសក្រហម (jalapeños) បានកើតឡើងអស់រយៈពេលបីឆ្នាំកន្លងមកហើយ។
គួរបញ្ជាក់ផងដែរថា ទឹកម្ទេស Sriracha របស់ Huy Fong ដែលត្រូវបានបង្កើតឡើងក្នុងឆ្នាំ១៩៨០ ដោយលោក David Tran ដែលជាជនភៀសខ្លួន ត្រូវបានលក់នៅក្នុងហាងលក់រាយដ៏ពេញនិយមដូចជា Target និង Whole Foods ។ ហើយកាលពីឆ្នាំមុន ក្រុមហ៊ុនបានបញ្ឈប់ការបញ្ជាទិញពីដៃគូចែកចាយជាបណ្ដោះអាសន្នដោយសារកង្វះខាតធាតុផ្សំ ដែលធ្វើឲ្យប៉ះពាល់ដល់ផលិតផល Chili Garlic និង Sambal Oelek របស់ខ្លួន៕
អត្ថបទ៖ លីនី
ប្រភព៖ vnexpress