ក្រុមហ៊ុនផលិតរថយន្តរបស់ប្រទេសចិន Wuling បានដាក់លក់ជាផ្លូវការនូវរថយន្តអគ្គិសនីដែលមានតម្លៃធូរថ្លៃបំផុតក្នុងប្រទេសវៀតណាម។ រថយន្តអគ្គិសនីខ្នាតតូច ដែលទើបនឹងចេញថ្មី ត្រូវបានដាក់លក់កាលពីថ្ងៃព្រហស្បតិ៍ក្នុងតម្លៃចាប់ពី ២៣៩ លានដុង (ប្រមាណ ១០.១៣៩ ដុល្លារ) នេះបើយោងតាមការចុះផ្សាយរបស់សារព័ត៌មាន VNExpress។
រថយន្តអគ្គិសនីដ៏តូចច្រឡឹងមួយនេះ មានឈ្មោះថា Wuling Hongguang Mini EV ត្រូវបានដំឡើងនៅក្នុងខេត្ត Hung Yen ភាគខាងជើងប្រទេសវៀតណាម គឺជារថយន្តអគ្គិសនីតូចបំផុតមួយនៅក្នុងប្រទេស។ រថយន្តមួយនេះ សាកថ្មតែម្ដងអាចបើកបរបានចម្ងាយ ១២០-១៧០ គីឡូម៉ែត្រ ហើយការសាកប្រើពេលពីចន្លោះ ៦ ម៉ោងកន្លះ ទៅ ៩ម៉ោង។
លើសពីនេះ រថយន្តនេះអាចរត់ក្នុងល្បឿនអតិបរមា ១០០គីឡូម៉ែត្រក្នុងមួយម៉ោង រួមទាំងបំពាក់អេក្រង់ប្រាំពីរអ៉ិញសម្រាប់អ្នកបើកបរដើម្បីត្រួតពិនិត្យរថយន្តផងដែរ។ យ៉ាងណាមិញ អ្នកចែកចាយគ្រោងនឹងទទួលបានរថយន្តសម្រាប់លក់ចាប់ពីខែកញ្ញានេះ៕
អត្ថបទ៖ លីនី