ថៃ៖ ដោយសារតែការចូលចិត្តញ៉ាំក្តារឈីសបែប Charcuterie (Charcuterie Board) ខ្លាំងពេក ហើយនាងថែមទាំងចូលចិត្តរៀបចំ Charcuterie ពេលមានពិធីជប់លៀងនៅផ្ទះ ធ្វើឱ្យកញ្ញា Nok-Natcha Kiatthanawit ក្មេងស្រីអាយុ ២៣ ឆ្នាំបាននាំយកចំណង់ចំណូលចិត្តរបស់នាង មកបង្កើតអាជីវកម្មក្នុងកំឡុងពេលដែលនាងកំពុងសិក្សាឆ្នាំទី ៤ ទោះបីជានាងដឹងថាប្រជាជនថៃអាចជាមិនធ្លាប់ញ៉ាំCharcuterieបែបបារាំងក៏ដោយ ប៉ុន្តែនាងមិនបានបោះបង់ចោលការតាំងចិត្ត និងការ ព្យាយាមយកបន្ទះឈីសចូលទៅក្នុងបេះដូងរបស់អតិថិជននោះឡើយ។
មកដល់សព្វថ្ងៃនេះ កញ្ញា Nok បានបើកហាងបានជាងមួយឆ្នាំហើយ ហើយបានប្រាក់ចំណូលពីការលក់ ក្តារឈីសបែប Charcuterie តាមអនឡាញរបស់អ្នកនាងទទួលបានជាមធ្យមជាង ៧ពាន់ដុល្លា ក្នុងមួយខែ និងពីការលក់តាមអ៊ីនធឺណិត ដែលមានការិយាល័យនៅខាងក្រោយផ្ទះ។ បច្ចុប្បន្ននាងកំពុងស្វែងរកវិធីថ្មីដើម្បីបើកហាង ឱ្យអតិថិជនបានអង្គុយញ៉ាំ។ កញ្ញា Nok ក៏បានផ្តល់បទសម្ភាសន៍ដល់កម្មវិធី Sentangsedtee ឬផ្លូវរបស់មហាសេដ្ឋីតាមអ៊ីនធឺណិតថា៖ ក្តារឈីសបែប Charcuterie គឺជាអាហារដែលគ្រួសារចូលចិត្ត ប្រសិនបើមានថ្ងៃជប់លៀង នាងនឹងស្ម័គ្រចិត្តធ្វើបន្ទះឈីសសម្រាប់អ្នករាល់គ្នាញ៉ាំ ព្រោះបើបញ្ជាទិញពីហាងនឹងមានតម្លៃលើសពី ២ពាន់បាត ឬជាង ៧០ដុល្លាអាមេរិក ឬអាចច្រើនជាងនេះផងដែរ។ ទើបកញ្ញា Nok ក៏ធ្លាប់គិតថា ប្រសិនបើមានហាង cheeseboard កាន់តែទូលំទូលាយជាងនេះ តម្លៃក៏អាចថោកជាងនេះផងដែរ ទើបកញ្ញា Nok ក៏បានសាកល្បងធ្វើលក់ខ្លួនឯងតែម្តង។
គួរបញ្ជាក់អោយដឹងផងដែរថា កញ្ញា Nok បានបង្កើតវាជាអាជីវកម្មដំបូងក្នុងកំឡុងពេលដែលរៀនឆ្នាំទី ៤ របស់ សាកលវិទ្យាល័យ Silpakorn ក្នុងអំឡុងពេលនោះនាងបានធ្វើ Thesis ផងដែរ ពេលដែលនាងមានពេលច្រើន ដោយបានទិញគ្រឿងផ្សំគ្រប់យ៉ាងពីផ្សារទំនើប ក្រោយពេលធ្វើរួច ក៏យកទៅចែកជូនមិត្តភក្តិឪពុកម្តាយរបស់នាងភ្លក់ ក៏ដូចជាមិត្តភក្តិរបស់នាងរហូតទាល់តែគេប្រាប់គ្នាតៗគ្នាពីមាត់មួយទៅមាត់មួយ ហើយពេលនោះហើយជាដែលអ្នកនាងចាប់ផ្តើមលក់អនឡាញ ដោយឈ្មោះហាងរបស់នាងគឺ « Nokky’s Charcuterie »។ សូមបញ្ជាក់ថាCharcuterie គឺមានប្រភពមកពីប្រទេសបារាំង អមដោយឈីស សាច់ និងផ្លែឈើស្រស់ៗ៕
អត្ថបទ៖ Bee
ប្រភព៖sentangsedtee