ថៃ៖ តាមរយៈបទសម្ភាសន៍រវាងកម្មវិធី Sentangsedtee ឬ ផ្លូវមហាសេដ្ឋីអនឡាញ ជាមួយអ្នកនាង Khun Muay-Vanisa Cheewasuksan អាយុ ២៨ឆ្នាំ ម្ចាស់ហាងគុយទាវ Falo Kwanko Mo ដែលបណ្តាអ្នកសរសេរប្លុកជាច្រើននាំគ្នាទៅថត ក៏ដូចជាទៅ Review ពីរសជាតិគុយទាវដ៏សែនឆ្ងាញ់នៅហាងដ៏ល្បីនេះ។ យ៉ាងណាមិញថ្មីៗនេះ បន្ទាប់ពីនិយាយគ្នារួច ពួកគេក៏លេចមុខក្នុងកម្មវិធីទូរទស្សន៍ដ៏ថ្មីមួយក្នុងស្រុកថៃ ផងដែរ ដោយអាហារដែលបង្កើតឈ្មោះដ៏ល្បីសម្រាប់ហាងគឺ គុយទាវជ្រូកខ្វៃ តម្លៃ ១២បាត!
ដោយអ្នកនាង Muay-Vanisa រៀបរាប់ថា៖ មុននឹងបើកហាងគុយទាវ នាងធ្លាប់ធ្វើការនៅរោងចក្រតាំងពីអាយុ ១៨ឆ្នាំ រហូតដល់អាយុ២០ឆ្នាំ ក្រោយមកនាងក៏បានឈប់ពីរោងចក្រ ដោយប្តូរទៅការងារផ្សេងទៀត រួមទាំងជាអ្នកលក់បាយ និងបាយម្ហូបកម្ម៉ង់ ប៉ុន្តែហាក់បីដូចជាមិនសូវជាដំណើរការបានល្អសោះឡើយ។ រហូតដល់អ្នកនាងបានជួបមិត្តប្រុសបច្ចុប្បន្ន ដែលមានឈ្មោះថា លោក (Nattapong Pew-am) ដោយម្តាយរបស់ Khun Nattapong ចាប់អាជីពជាអ្នកលក់គុយទាវស្រាប់ទៅហើយ ដូច្នេះអ្នកនាងមានឱកាសចូលជួយធ្វើគុយទាវម្តាយក្មេករហូតបានទទួលចំណេះ និងរូបមន្តនៃការធ្វើគុយទាវពីម្តាយក្មេក។ លុះថ្ងៃដែលម្តាយរបស់មិត្តប្រុសបានស្លាប់ អ្នកនាងក៏បានបោះបង់មុខរបរលក់បាយ ប្តូរមកធ្វើគុយទាវ ក៏ដូចជាចូលកាន់កាប់ហាងគុយទាវទាំងស្រុងទៅវិញ។ អ្នកនាងបានបន្តទៀតថា៖ អ្នកនាងបានអង្គុយគិតជាមួយមិត្តប្រុសរបស់អ្នកនាងថា «ដូចដែលយើងធ្លាប់ទៅហាងគុយទាវជាច្រើន យើងអាចឃើញគេលក់ចានតូចៗ ក៏នៅតែលក់ដាច់ផងដែរ ចំណែករូបមន្តគុយទាវដែលយើងទទួលបានពីម្តាយគឺនាងទទួលបានទាំងស្រុង ថែមទាំងមាន គ្រឿងបរិក្ខាររួចរាល់ហើយ ដូច្នេះយើងសាកល្បងមើល»។
បន្ទាប់ពីលក់បានជាងមួយឆ្នាំ អ្នកនាងក៏មានគំនិតច្នៃប្រឌិតបន្ថែមថ្មីមួយថា អាចសាកល្បងដាក់សាច់ជ្រូកបីជាន់បំពងស្រួយចូលទៅក្នុងចានគុយទាវបាន ព្រោះអតិថិជនភាគច្រើន តែងគិតថាសាច់ជ្រូកបីជាន់បំពងស្រួយតែងតែមាននៅតាមបណ្តាហាងបាយម្ហូបកម្ម៉ង់ ណាមួយវាក៏មិនមែនអ្នកនាងជាអ្នកគិតច្នៃដំបូងក្នុងការដាក់សាច់ជ្រូកបំពងស្រួយជាមួយគុយទាវនោះទេ តែបើលក់មួយចានតែ ១២បាត មួយនេះកម្រឃើញអ្នកណាធ្វើណាស់។ ហើយនេះ គឺជាចំណុចខុសគ្នាបើធៀបនឹងហាងគុយទាវផ្សេងទៀត លើសពីនេះទៅទៀតក៏មានពងស្ងោរតម្លៃក្នុងការលក់ត្រឹមតែ ៥បាតក្នុងមួយគ្រាប់ សម្រាប់អ្នកចង់ញាំគូជាមួយគុយទាវ ចំណែកអិតិថិជនដែលចង់បានស្បែកជ្រូកស្រួយៗជាកញ្ចប់តូចៗមានលក់ដែរ ចំណាយត្រឹមតែ ២២បាតក៏ឆ្អែតដែរ។
គួរបញ្ជាក់អោយដឹងផងដែរថា៖ ម្ចាស់ហាង វ័យ ២៨ឆ្នាំរូបនេះបាន ប្តេជ្ញាចិត្តចំពោះអតិថិជនថា បើទោះជាសេដ្ឋកិច្ចមិនល្អ បណ្តាលអោយរបស់របរឡើងថ្លៃប៉ុណ្ណាក៏ដោយ អ្នកនាងនៅតែព្យាយាមរក្សាតម្លៃលក់អោយនៅដដែល ដោយសារតែអ្នកនាងយល់ថា ស៊ូចំណេញតិចតែក៏នៅតែចំណេញ ព្រោះអ្នកនាងសង្ឃឹមថា របស់របរនឹងចុះថ្លៃវិញជាមិនខាន៕
អត្ថបទ៖ Bee
ប្រភព៖ sentangsedtee
ថៃ៖ អតីតកម្មការនីរោងចក្រលាឈប់ពីការងារ ចេញមករកសុីដំបូងបរាជ័យច្រើនលើកច្រើនសារ តស៊ូរៀនលក់គុយទាវជាមួយម្ដាយក្មេករហូតជាម្ចាស់ហាងគុយទាវល្បីនៅថៃ ចំណូលរាប់ពាន់ដុល្លារ