ថៃ៖ បុរសម្នាក់សុខចិត្តបញ្ជាំផ្ទះទៅធ្វើការនៅស្រុកក្រៅ រលាស់ខ្លួនពីជីវភាពក្រខ្សត់ ផឹកទឹកម៉ាសុីនជំនួសអាហារ តស៊ូរហូតក្លាយជាម្ចាស់ក្រុមហ៊ុនតម្លៃរាប់សិបលានដុល្លារនៅអង់គ្លេស
អាជីវកម្ម September 16, 2022 Bee

លោក​ Chakri Chankhana បច្ចុប្បន្នមានអាយុ ៤៣ឆ្នាំ មានស្រុកកំណើតនៅខេត្ត សាមុតប្រាកាន ប្រទេសថៃ។ បន្ទាប់ពីបញ្ចប់ការសិក្សាពីចុងភៅ ពីមហាវិទ្យាល័យ Dusit Thani រួច គាត់បានអង្វរម្តាយរបស់គាត់ អោយជួយយកផ្ទះតែមួយគត់ដែលមានទៅបញ្ចាំ ដើម្បីយកប្រាក់ជិត ១ ម៉ឺនដុល្លា មកជាប្រាក់សម្រាប់ធ្វើដំណើរទៅធ្វើការនៅភោជនីយដ្ឋានថៃក្នុងប្រទេសអង់គ្លេស។

ចំណែកហេតុផលតែមួយគត់ដែលនាំអោយចង់ទៅធ្វើការនៅភោជនីយដ្ឋានថៃនោះ ក៏ដោយសារតែ «ចង់ទទួលបានប្រាក់ចំណូលច្រើនៗ» នេះក៏ព្រោះតែលោកបានកើតមកក្នុងគ្រួសារតែក្រីក្រ បើគិតពីជំនាន់មុនខាងគ្រួសារលោកអាចផ្គត់ផ្គង់អោយកូនបានរៀនសូត្រតែម្នាក់គត់ ទើបលោកសម្រេចចិត្តអោយបងស្រីរបស់លោកបានរៀនទៅចុះ ចំណែកខ្លួនលោកក៏បានទៅរៀនជំនាញគ្រឿងយន្ត ប៉ុន្តែកាលនោះដែរមិត្តភក្តិនៅក្នុងក្រុមឧស្សាហ៍កាប់ចាក់គ្នារហូតបណ្តាលអោយមិត្តម្នាក់នៅក្នុងក្រុមបានបាត់បង់ជីវិត ជាហេតុធ្វើអោយលោកបោះបង់ការរៀនជំនាញនោះចោលបែរទៅរៀនជំនាញទូទៅវិញ។ ប៉ុន្តែនៅ​ទី​បំផុត លោកបានបាន​បញ្ចប់​ការ​សិក្សា​ពី NNU មុន​ពេល​ចូល​រៀន​នៅ​មហាវិទ្យាល័យ Dusit Thani នៅពេលនោះដែរមានសិស្សច្បងម្នាក់បានណែនាំថា មានរៀន​ថ្នាក់​ចុងភៅ​ផង​ដែរ បើ​អ្នក​ធ្វើ​បាន​ល្អ អ្នក​ប្រហែល​ជា​អាចទៅ​ធ្វើ​ការ​នៅ​បរទេសបានទៀតផង នេះជាសម្តីដែលលោក Chakri បានរៀបរាប់។

លោក Chakri បានបញ្ជាក់អោយដឹងបន្ថែមថា៖ លោកបាន​សិក្សា​នៅ Dusit Thani College បានដោយសារតែលោកទទួលបានអាហារូបករណ៍ជួយថ្លៃសិក្សា ប៉ុន្តែថ្លៃហូបចុក ថ្លៃការរស់នៅត្រូវរកដោយខ្លួនឯង ទើបលោកត្រូវធ្វើការងារក្រៅម៉ោងជាច្រើន ដូចជា៖ ការលក់សំបុត្រកុន ជាអ្នកដឹកមាន់បំពងជាដើម ហើយកាលពីរៀននៅសាលា Dusit Thani លោកមានមិត្តរួមថ្នាក់ដែលមកពីគ្រួសារអ្នកមាន នៅពេលដែលលោកអង្គុយក្នុងក្រុម ពួកគេក៏បានបបួលលោកទៅញាំអាហារ ប៉ុន្តែលោកបានឆ្លើយតបទៅវិញថា លោកបានទទួលទានឆ្អែតហើយ តែតាមធាតុពិតទៅគឺលោកលួចផឹកទឹកម៉ាសុីននៅក្នុងបន្ទប់ទឹកដើម្បីរំបំបាត់ការស្រែកឃ្លានទៅវិញទេ។

លោក Chakri បានរៀបរាប់បន្តថា៖ លោកបាន​ធ្វើ​ដំណើរ​ទៅ​ទីក្រុង​ឡុងដ៍ ប្រទេស​អង់គ្លេស​កាលពីឆ្នាំ២០០៤ ប៉ុន្តែ​ពេល​ទៅ​ដល់ លោកនៅ​តែ​មិន​បាន​ការងារ​ធ្វើ វាប្រៀបដូចជាត្រូវបានគេបោកបញ្ឆោត ព្រោះ​ភោជនីយដ្ឋាន​ដែល​បាន​ព្រមព្រៀង​គ្នា​មិន​ទាន់​បើកនៅឡើយទេ ពោលគឺលោកត្រូវ​រង់ចាំ​ប្រហែល ៧ ខែទៀត។ ខណៈ​ដែល​លោកនៅសល់ប្រាក់ជាប់ខ្លួនតែ ៤០ ផោនតែប៉ុណ្ណោះ លោកក៏បានសួរខ្លួនឯងថា តើ​ខ្ញុំ​នឹង​រស់​នៅ​យ៉ាង​ណាបន្តទៅទៀត? ដូច្នេះហើយលោកត្រូវជួយខ្លួនឯងអោយបាន ដោយលោកបានបែងចែកប្រាក់តិចតួចនោះ ទៅទិញក្រដាសទំព័រពណ៌លឿង ដើម្បីស្វែងរកលេខទូរស័ព្ទដើម្បីទាក់ទងភោជនីយដ្ឋានផ្សេងទៀតដែលអាចនឹងបើកទទួលការងារនៅក្នុងផ្ទះបាយ។ រហូតដល់ថ្ងៃមួយលោកទទួលបានការឆ្លើយតបពីហាងមួយ ដែលស្ថិតនៅក្នុងទីក្រុងតូចមួយ រវាង Manchester និង Liverpool ប៉ុន្តែនៅពេលគាត់មកដល់គាត់ត្រូវបានគេជូនដំណឹងថា គាត់មិនទទួលយកមេចុងភៅទេ គឺទទួលបានតែអ្នកក្រឡុកស្រាប៉ុណ្ណោះ លោកក៏សម្រេចចិត្តទទួលយកការងារនោះ បើទោះជាលោកមិនមែនជាអ្នកដែលចូលចិត្តផឹកស្រាក៏ដោយ។

ក្រោយពីបានចូលទៅធ្វើការរួច លុះមានថ្ងៃមួយលោកក៏មានគំនិតថា ចង់រកសុីបន្ថែមទៀតដោយសារតែលោកសង្កេតឃើញមិត្តរួមការងារក៏ដូចជា ជនជាតិថៃដែលធ្វើការនៅទីនោះបានវេរលុយទៅអោយក្រុមគ្រួសារនៅប្រទេសថៃ ត្រូវចំណាយថ្លៃសេវាផ្ញើដល់ទៅ ៤០ ផោន ទោះជាវេរលុយទៅតិច ឬច្រើនប៉ុណ្ណាក៏ដោយ ក៏នៅតែគិតសេវាផ្ញើស្មើរគ្នាដដែល។ ក្រោយពីឃើញដូចនេះ លោកក៏បានខលទៅរកម្តាយនៅឯប្រទេសថៃដើម្បីរៀបចំជួយការងារដល់គាត់ ពោល គឺលោកជាអ្នកទម្លាក់លេខកុង និងលេខអ្នកទទួលទៅអោយម្តាយដែលនៅស្រុកថៃ វេរចេញពីបញ្ជីនៅថៃវិញ ដោយមិនបាច់អស់ថ្លៃសេវាផ្ញើក្នុងមួយជើង។ ក្រោយពីបានចាត់ចែងរួច លោកក៏បានចំណាយប្រាក់ចុះផ្សព្វផ្សាយអំពីសេវាវេរលុយនៅក្នុងកាសែតដើម្បីទាក់ទាញអតិថិជនអោយមកវេរលុយដោយលោកគិតសេវាវេតែ ១ផោនប៉ុណ្ណោះ ប៉ុន្តែការធ្វើដូចនេះ លោកនៅតែមិនទាន់អាចទទួលបាននៅសេចក្តីទុកចិត្តអំពីអតិថិជននោះទេ ព្រោះលោកទើបតែចេញរកសុីថ្មីថ្មោង។

ថ្ងៃមួយលោកបានរៀបរាប់ពីសេវាកម្មនេះដល់អ្នកលាងចានចំនួន ២នាក់ ក្រោយមកអ្នកលាងចានក៏បានអោយលោកវេរលុយទៅថៃអោយ នោះបានន័យថាលោកបានទទួលអតិថិជនចំនួន ២នាក់ដំបូងបានសម្រេច ដោយសារតែភាពអត់ធ្ងត់នឹងស្មោះត្រង់ មិនចុះចាញ់នឹងឧបសគ្គលោកធ្វើការផង រកសុីផង ថ្ងៃមួយលោកទទួលបានអតិថិជនដល់ទៅ ៥០នាក់ ក្នុងមួយខែ។ ប៉ុន្តែជាមួយនឹងអតិថិជនកើនឡើងកាន់តែច្រើន រហូតដល់មានការស៊ើបអង្កេតដោយរដ្ឋាភិបាលអង់គ្លេស ប៉ូលិស​មក​សួរ​នាំថា​ធ្វើ​អី? អ្នកមិនមានអាជ្ញាប័ណ្ណទេ ដូច្នេះលោកក៏​ត្រូវ​វិនិយោគ ចុះបញ្ជី​ក្រុមហ៊ុន សុំ​អាជ្ញាប័ណ្ណ ធ្វើ​អ្វីៗ​គ្រប់យ៉ាង​ឱ្យ​បាន​ត្រឹមត្រូវ​តាមផ្លូវច្បាប់។ ដោយលោកត្រូវចំណាយពេលក្នុងការរៀបចំនឹងបង្កើតជាក្រុមហ៊ុនជិត ១ឆ្នាំ រហូតក្លាយទៅជា «ក្រុមហ៊ុនផ្ទេរប្រាក់ថៃដំបូងគេនៅចក្រភពអង់គ្លេស» រហូត​មក​ដល់​ពេល​នេះ​ពង្រីកដល់អតិថិជនថៃនៅអឺរ៉ុបដូចជា ស៊ុយអែត អ៊ីតាលី អាល្លឺម៉ង់ ទៅហើយ។

គួរបញ្ជាក់អោយដឹងផងដែរថា៖ “A & B Money Plus គឺជាផ្នែកបន្ថែមនៃអាជីវកម្មពីអតីតដែលផ្តល់សេវាកម្មផ្ទេរប្រាក់អន្តរជាតិ នាំឱ្យមានអាជីវកម្មធនាគារ សេវាធនាគារតាមអ៊ីនធឺណិតដំបូងគេសម្រាប់ប្រជាជនថៃនៅចក្រភពអង់គ្លេស រួមទាំងសហភាពអឺរ៉ុបផងដែរ ដែលអាចប្រើបានជាមួយកាត Debit Mastercard អាចប្រើសម្រាប់ការទិញទំនិញទូទាំងពិភពលោកបានទៀតផង។
ដូច្នេះហើយ អាជីវកម្មរបស់លោកបានបន្តរីកចម្រើន ដែលមានតម្លៃ​នៃ​អាជីវកម្ម និង​ទ្រព្យសកម្ម​ បើ​គិត​ជា​ទឹកប្រាក់មានរហូតដល់ទៅ​រាប់សិបលានដុល្លាអាមេរិក​ឯណោះ៕

អត្ថបទ៖ Bee
ប្រភព៖ sentangsedtee