ក្រុមហ៊ុន Apple Inc គ្រោងនឹងចាប់ផ្តើមផលិត iPhone 14 នៅក្នុងប្រទេសឥណ្ឌា ខណៈដែលក្រុមហ៊ុនបច្ចេកវិទ្យាយក្សរបស់សហរដ្ឋអាមេរិកមួយនេះ ស្វែងរកជម្រើសជំនួសប្រទេសចិន នេះបើយោងតាមការរាយការណ៍ពីសារព័ត៌មាន Bloomberg។ របាយការណ៍បាននិយាយនៅថ្ងៃអង្គារទី២៣ ខែសីហានេះថា ក្រុមហ៊ុនបាននឹងកំពុងធ្វើការជាមួយអ្នកផ្គត់ផ្គង់ដើម្បីបង្កើនផលិតកម្មនៅក្នុងប្រទេសឥណ្ឌា និងកាត់បន្ថយភាពយឺតយ៉ាវក្នុងការផលិត iPhone ស៊េរីថ្មី ពី ៦ ទៅ ៩ខែ សម្រាប់ការចេញលក់នៅពេលមុនៗ។

បើតាមរបាយការណ៍ដដែល ក្រុមហ៊ុនផ្គត់ផ្គង់ Foxconn ដែលមានមូលដ្ឋាននៅតៃវ៉ាន់របស់ Apple បានសិក្សាពីដំណើរការនៃការដឹកជញ្ជូនទំនិញពីប្រទេសចិន និងដំឡើង iPhone 14 នៅរោងចក្ររបស់ខ្លួននៅខាងក្រៅទីក្រុង Chennai ភាគខាងត្បូងប្រទេសឥណ្ឌា។ របាយការណ៍បានបន្ថែមថា ការផលិត iPhone 14s ដំបូងពីប្រទេសឥណ្ឌា ទំនងជានឹងបញ្ចប់នៅចុងខែតុលា ឬខែវិច្ឆិកា។

ទោះបីជាយ៉ាងណាក្ដី Apple មិន​បាន​ឆ្លើយ​តប​ភ្លាមៗ​ចំពោះ​សំណើ​សុំ​អត្ថាធិប្បាយ​របស់ Reuters ទេ ពាក់ព័ន្ធនឹងរឿងនេះ។ គួរបញ្ជាក់ថា ក្រុមហ៊ុន Apple បាននឹងកំពុងផ្លាស់ប្តូរផ្នែកខ្លះនៃការផលិត iPhone ពីប្រទេសចិនទៅកាន់ទីផ្សារផ្សេងទៀត រួមទាំងប្រទេសឥណ្ឌា ដែលជាទីផ្សារស្មាតហ្វូនធំបំផុតទីពីររបស់ពិភពលោក ហើយក៏គ្រោងនឹងបង្គុំទៅលើ iPad tablet នៅទីនោះផងដែរ។

ជាមួយគ្នានេះ ប្រទេសឥណ្ឌា និងប្រទេសដូចជា ម៉ិកស៊ិក និងវៀតណាម កាន់តែមានសារៈសំខាន់ចំពោះក្រុមហ៊ុនផលិតដែលបានចុះកិច្ចសន្យាផ្គត់ផ្គង់ដល់ម៉ាកយីហោអាមេរិកមួយនេះ ខណៈដែលពួកគេព្យាយាមធ្វើពិពិធកម្មផលិតកម្មឱ្យឆ្ងាយពីប្រទេសចិន។ ជាក់ស្ដែងកាលពីសប្តាហ៍មុន Nikkei បានរាយការណ៍ថា អ្នកផ្គត់ផ្គង់របស់ក្រុមហ៊ុនបច្ចេកវិទ្យាយក្សកំពុងពិភាក្សាដើម្បីផលិត Apple Watch និង MacBook នៅក្នុងប្រទេសវៀតណាមជាលើកដំបូង៕

អត្ថបទ៖ លីនី
ប្រភព៖ channelnewsasia
រូបភាព៖ outlookindia, insider.com,