ក្រុមហ៊ុន Thai Airways International Pcl នឹងទទួលបានការគាំទ្រផ្នែកហិរញ្ញវត្ថុសំខាន់ៗពីរដ្ឋាភិបាលសម្រាប់ការបង្កើនដើមទុន ២.២ ពាន់លានដុល្លារ និងផែនការផ្លាស់ប្តូរបំណុលទៅជាភាគហ៊ុន ក្នុងគោលបំណងជួយក្រុមហ៊ុនអាកាសចរណ៍ឱ្យរួចផុតពីការក្ស័យធន នេះបើយោងតាមសារព័ត៌មាន Bloomberg ។
រដ្ឋមន្ត្រីក្រសួងហិរញ្ញវត្ថុលោក Arkhom Termpittayapaisith បាននិយាយនៅក្នុងបទសម្ភាសន៍ជាមួយ Bloomberg ថា ធនាគារគ្រប់គ្រងដោយរដ្ឋ នឹងដឹកនាំក្នុងការផ្តល់មូលនិធិដល់ប្រាក់កម្ចីថ្មី,បំប្លែងបំណុល និងបញ្ចូលមូលធនភាគហ៊ុនទៅក្នុងក្រុមហ៊ុន Thai Airways ដែលជាផ្នែកមួយនៃផែនការកែលម្អដែលក្រុមហ៊ុនអាកាសចរណ៍បានផ្តល់ឱ្យតុលាការ សម្រាប់ការអនុម័តកាលពីខែមុន។
លោកបានកត់សម្គាល់ថា ក្រសួង និងស្ថាប័នផ្សេងទៀត នឹងបន្តរក្សាភាគហ៊ុនរួមគ្នាយ៉ាងហោចណាស់ ៤០% ប៉ុន្តែសមាមាត្រនឹងមិនលើសពី ៥០% ដើម្បីជំរុញក្រុមហ៊ុនអាកាសចរណ៍ឱ្យបន្តការប្រកួតប្រជែង។ គួរបញ្ជាក់ផងដែរថា ក្រុមហ៊ុន Thai Airways បានដាក់ពាក្យសុំការការពារក្ស័យធននៅឆ្នាំ២០២០ ដោយសារការខាតបង់ជាបន្តបន្ទាប់ចាប់តាំងពីឆ្នាំ២០១៣ មក។ ទោះជាយ៉ាងណាក៏ដោយ ការស្ទុះងើបឡើងវិញនៃការធ្វើដំណើរតាមផ្លូវអាកាសនៅលើពិភពលោកនាពេលថ្មីៗនេះ បានជួយ Thai Airways ជំរុញលំហូរសាច់ប្រាក់របស់ខ្លួន និងកាត់បន្ថយប្រាក់កម្ចីបានមួយកម្រិត៕
អត្ថបទ៖ លីនី
ប្រភព៖ vietnamplus