យោងតាមការចុះផ្សាយរបស់សារព័ត៌មាន Yahoo នៅថ្ងៃទី១៣ ខែកក្កដានេះ បានឱ្យដឹងថា ក្រុមហ៊ុនអាកាសចរណ៍ Air Canada បានអង្វរអ្នកដំណើរចំនួន ២៥នាក់ឱ្យចុះពីយន្តហោះ ដោយសារតែមូលហេតុផ្ទុកទំងន់ធ្ងន់ពេកមិនអាចហោះហើរបាន ហើយក្រុមហ៊ុននេះ បានធ្វើឱ្យបាត់វ៉ាលីរបស់ភ្ញៀវទៀតផង។

អ្នកដំណើរម្នាក់បានប្រាប់សារព័ត៌មាន Business Insider ថា ការធ្វើដំណើរ ២១ម៉ោងរបស់គាត់ទៅកាន់អឺរ៉ុបកាលពីចុងសប្តាហ៍មុនគឺជា “បទពិសោធន៍ហោះហើរដ៏អាក្រក់បំផុត” ដែលគាត់មិនធ្លាប់បានជួប។ អ្នកដំណើររូបនេះបានបន្តថា គាត់បានចំណាយប្រាក់ទិញសំបុត្រយន្តហោះតម្លៃ ១១,០០០ ដុល្លារ​ទៅ​អឺរ៉ុប​ ហើយក្នុងអំឡុងពេលដំណើរ ក្រុមហ៊ុន Air Canada បានពន្យារពេលជើងហោះហើររបស់អ្នកដំណើរសរុបចំនួន ១០ដង ហើយបានធ្វើឱ្យបាត់វ៉ាលីរបស់គាត់ទៀតនៅតាមផ្លូវពេលចុះចតដើម្បីបន្តជើងហោះ។

ក្រៅពីការបាត់បង់របស់ខ្លួន អ្នកដំណើររូបនេះបានឱ្យដឹងទៀតថា នៅពេលដល់ម៉ោងឡើងយន្តហោះតជើងបន្តទៀត ស្រាប់តែបុគ្គលិកបម្រើការលើយន្តហោះបានអង្វរ អ្នកដំណើរ ២៥នាក់ឱ្យផ្លាស់ប្តូរជើងហោះហើររបស់ពួកគេនៅនាទីចុងក្រោយ ដោយសារតែយន្តហោះនេះធ្ងន់ពេកមិនអាចហោះចេញបាន។

គួរឱ្យដឹងថា ប្រហែល ៦៥% នៃជើងហោះហើររបស់ Air Canada ត្រូវបានពន្យារពេលនៅថ្ងៃសុក្រ និងថ្ងៃសៅរ៍ ដូចដែល Bloomberg បានរាយការណ៍កាលពីថ្ងៃចន្ទ។ ជាមួយគ្នានេះកាលពីថ្ងៃអាទិត្យ ៧០% ត្រូវបានពន្យារពេល ពោលគឺច្រើនជាងក្រុមហ៊ុនអាកាសចរណ៍ផ្សេងទៀតនៅថ្ងៃនោះ នេះបើយោងតាម ​​Flight Aware។ យ៉ាងណាមិញនៅពេលត្រូវបានទាក់ទងដោយ Insider ក្រុមហ៊ុន Air Canada បាននិយាយថា ខ្លួនបានដោះស្រាយជាមួយអតិថិជន “ដោយផ្ទាល់” ខណៈក្រុមហ៊ុនអាកាសចរណ៍ “កំពុងប្រឈមមុខនឹងបញ្ហាជាមួយព្រលានយន្តហោះ និងអ្នកផ្តល់សេវាភាគីទីបីនៃសេវាកម្មដូចជា ការត្រួតពិនិត្យអ្នកដំណើរ គយ និងការធ្វើដំណើរតាមផ្លូវអាកាស”៕

អត្ថបទ៖ លីនី
ប្រភព៖ yahoo
រូបភាពពី៖ reuters,thejetset,businessinsider.in