ហាង McDonald’s ដំបូងបំផុតដែលបើកនៅក្នុងប្រទេសថៃ បានប្រកាសបិទជាបណ្ដោះអាសន្ន ចាប់ពីថ្ងៃទី៣០ ខែមិថុនា ឆ្នាំ២០២២ ខាងមុខនេះ។ យោងតាមការចុះផ្សាយរបស់សារព័ត៌មាន The Nation បានឱ្យដឹងថា McDonald’s សាខាទី១ ដែលមានទីតាំងនៅផ្សារទំនើប Amarin Plaza កណ្តាលទីក្រុងបាងកក នឹងត្រូវបិទទ្វាររយៈពេល ២ឆ្នាំ ដោយផ្សារទំនើបនេះត្រូវបានជួសជុលឡើងវិញ និងភ្ជាប់ជាមួយផ្សារ ១ទៀតឈ្មោះថា​ Gaysorn Village។

មុនពេលផ្អាកដំណើរការ សាខាដែលបានបើកកាលពី ៣៧ឆ្នាំមុនក្នុងឆ្នាំ១៩៨៥ កំពុងផ្ដល់នូវការកាដូពិសេសដល់អតិថិជន ជាមួយនឹងកម្មវិធីប្រកួតថតរូប និងចំណងជើង ដែលល្អបំផុត ដែលនឹងចាប់ផ្ដើមនៅថ្ងៃទី២២ ខែមិថុនានេះ។ ទោះជាយ៉ាងណាក្ដី សាខារបស់​McDonald’sផ្សេងទៀតនៅក្បែរនោះ នៅតែដំណើរការជាធម្មតា។

គួរបញ្ជាក់ថា McDonald’s មានវត្តមានជាដំបូងដោយលោក Richard និង Maurice (Mac) McDonald ក្នុងឆ្នាំ១៩៤០ នៅលើផ្លូវលេខ ៦៦ ក្នុងទីក្រុង San Bernardino រដ្ឋកាលីហ្វ័រញ៉ា។ ក្រោយមកពួកគេបានលក់ក្រុមហ៊ុនរបស់ពួកគេទៅឱ្យ Ray Kroc នៅ Des Plaines រដ្ឋ Illinois ។ បច្ចុប្បន្នមាន McDonald’s មានប្រមាណ ៣៦,០០០ កន្លែងក្នុង ១១៩ ប្រទេស និងដែនដី៕

អត្ថបទ៖ លីនី
ប្រភព៖ nationthailand