មហាសេដ្ឋីកាណាដា Elon Musk ដែលត្រូវបានគេស្គាល់ថា​ជានាយកប្រតិបត្តិនៃក្រុមហ៊ុន Tesla បានដុតចំៗទៅលើនាយកប្រតិបត្តិក្រុមហ៊ុន Amazon លោក Jeff Bezos នៅលើ Twitter កាលពីថ្ងៃសុក្រ បន្ទាប់ពីកាសែត Financial Times បានរាយការណ៍ថា ក្រុមហ៊ុនបច្ចេកវិទ្យាយក្សនៅ Seattle បានទិញយកក្រុមហ៊ុន Zoox ដែលជាក្រុមហ៊ុនតាក់ស៊ីស្វ័យភាព (self-driving-taxi) ក្នុងតម្លៃ ១.២ ពាន់លានដុល្លារ។

នៅក្នុងបណ្ដាញ Twitter ផ្ទាល់ខ្លួនលោក Musk បានហៅស្ថាបនិក Amazon ថាជាអ្នកចម្លង (copycat) ដោយការបាញ់ចំៗនេះបានកើតឡើងបន្ទាប់ពីក្រុមហ៊ុន Amazon បានទិញយក​ក្រុមហ៊ុន Zoox ហើយក្លាយជាគូប្រជែង​នៅក្នុងផ្នែកដឹកជញ្ជូន (តាក់ស៊ីស្វ័យភាព)។ ទោះបីជាយ៉ាងនេះក្ដីលោក Mark Matousek របស់សារព័ត៌មាន Business Insider បានរាយការណ៍កាលពីខែឧសភាថា ក្រុមហ៊ុន Amazon ចាប់អារម្មណ៍នឹង Zoox ដើម្បីជួយរៀបចំដំណើរការចែកចាយកញ្ចប់របស់ខ្លួន។ ខណៈយានយន្តរបស់ Zoox ត្រូវបានរចនាឡើងជាប្រភេទតាក់ស៊ី មិនដូចរថយន្ត Tesla ដែលត្រូវបានរចនាឡើងជារថយន្តផ្ទាល់ខ្លួន។

គួរឲ្យដឹងផងដែរថា កាលពីឆ្នាំ២០១៩ Musk បាននិយាយថានៅពាក់កណ្តាលឆ្នាំ២០២០ រថយន្តបើកបរដោយខ្លួនឯងរបស់ក្រុមហ៊ុនគាត់នឹងដំណើរការពេញលេញ។ ខណៈនៅក្នុងសន្និសិទ IGNITION ឆ្នាំ ២០១៩ របស់ Business Insider សហស្ថាបនិក Zoox និងជាប្រធានផ្នែកបច្ចេកវិទ្យាលោក Jesse Levinson មានប្រសាសន៍ថា មិនមានឱកាសក្នុងការធ្វើឲ្យវាកើតឡើងនោះទេ ព្រោះមិនមានឧបករណ៍ចាប់សញ្ញា ឬកុំព្យូទ័រគ្រប់គ្រាន់ដើម្បីធ្វើតាមបច្ចេកវិទ្យាចាប់ពីចង្ងាយ ដូចទៅនឹងការបើក​បររបស់មនុស្សនោះទេ។

យ៉ាងណាមិញថ្មីៗនេះ Zoox មានតម្លៃ ៣.២ ពាន់លានដុល្លារ ដោយ Zoox ក៏ដូចក្រុមហ៊ុនយានយន្តស្វយ័តដទៃទៀតដែរ ដែលបានទទួលរងផលប៉ះពាល់ពីការធ្លាក់ចុះនៃសេដ្ឋកិច្ចដែលបណ្ដាលមកពីជំងឺរាតត្បាត Covid-19 ដោយបានបញ្ឈប់បុគ្គលិក ១២០ នាក់កាលពីខែមេសា ហើយយោងតាម ​​Axios ក្រុមហ៊ុនបានតស៊ូដើម្បីបង្កើនដើមទុននាពេលថ្មីៗនេះ ហើយកិច្ចព្រមព្រៀងជាមួយ Amazon នេះអាចជួយឱ្យក្រុមហ៊ុននៅស្ថិតស្ថេរបាន៕

អត្ថបទ៖ លីនី
ប្រភព៖ businessinsider