Kylie Jenner និង Kanye West កាលពីថ្ងៃព្រហស្បតិ៍ទី៤ ខែមិថុនាបានឈរនៅលើកំពូលតារាងប្រចាំឆ្នាំរបស់ Forbes ដែលជាតារាដែលមានប្រាក់ខែខ្ពស់បំផុត ប៉ុន្តែតារាកីឡារួមទាំង Roger Federer និង Lionel Messi បានកាន់កាប់តំណែងកំពូលទាំង ១០។ យោងតាមទស្សនាវដ្ដី Forbes បានធ្វើការប៉ាន់ស្មានថា Jenner រកចំណូលបាន ៥៩០ លានដុល្លារអាមេរិកក្នុងរយៈពេល ១២ខែចុងក្រោយនេះ ដែលភាគច្រើនបានមកពីការលក់ភាគហ៊ុន ៥១% នៅក្នុងខ្សែស្រឡាយ Kylie Cosmetics របស់នាងទៅ Coty ក្នុងឆ្នាំ ២០១៩។

អ្នកជំនួញស្រីវ័យក្មេងអាយុ ២២ឆ្នាំ Kylie Jenner ដែលជាកូនកណ្ដាលក្នុងត្រកូល Kim Kardashian បានធ្វើឱ្យមានការចាប់អារម្មណ៍កាលពីមួយសប្តាហ៍មុននៅពេលដែលទស្សនាវដ្តី Forbes បាននិយាយថាបន្ទាប់ពីពិនិត្យមើលទិន្នន័យពីការលក់របស់ Coty នាងត្រូវបានធ្លាក់ចេញពីតំណែងជាមហាសេដ្ឋីដូចដែល Forbes បានប្រកាសកាលពីមួយឆ្នាំមុនហើយ។ យ៉ាងណាមិញពាក់ព័ន្ធនឹងរឿងនេះ Jenner បានឆ្លើយតបដោយនិយាយថាការប៉ាន់ស្មានរបស់ Forbes គឺផ្អែកលើ សេចក្តីថ្លែងការណ៍ និងការសន្និដ្ឋានមិនត្រឹមត្រូវ។

គួរបញ្ជាក់ផងដែរថា យោងតាមទស្សនាវដ្តី Forbes ក្នុងឆ្នាំ ២០១៩ ទ្រព្យសម្បត្តិសុទ្ធរបស់ Kylie Jenner ត្រូវបានប៉ាន់ប្រមាណថាមានចំនួន ១ ពាន់លានដុល្លារអាមេរិក ធ្វើឱ្យនាងជាប់ចំណាត់ថ្នាក់ជាមហាសេដ្ឋីក្មេងជាងគេនៅលើពិភពលោក ក្នុងវ័យ ២១ ឆ្នាំ គិតត្រឹមខែមីនាឆ្នាំ ២០១៩៕

ប្រភព៖ cnalifestyle
អត្ថបទ៖ លីនី