លោក Warren Buffett ដែលជាមហាសេដ្ឋីលំដាប់ទី៣ នៅលើពិភពលោកជាមួយទ្រព្យសម្បតិ្តប្រហែលជា ៨២ ពាន់លានដុល្លារ ដោយនៅក្នុងអាយុ ៨៨ឆ្នាំនេះ លោកនៅតែអាចគ្រប់គ្រង និងដំណើរការក្រុមហ៊ុន Berkshire Hathaway ដែលជាម្ចាស់ក្រុមហ៊ុនអាជីវកម្មរបស់លោកដូចជា Geico, Dairy Queen និង See’s Candies ។

ជាក់ស្ដែងលោក Bill Gates ដែលជាសហស្ថាបនិករបស់ក្រុមហ៊ុន Microsoft ដ៏ល្បីល្បាញមួយរូប និងជាមិត្តសំលាញ់ បានបង្ហាញពីគន្លឹះសំខាន់មួយនៅពីក្រោយភាពជោគជ័យដ៏អស្ចារ្យរបស់លោក Warren Buffett គឺជាទម្លាប់សាមញ្ញមួយ ហើយជាអ្វីដែលមនុស្សគ្រប់គ្នាអាចធ្វើបាននោះគឺ « ការអាន »។ ដោយជារៀងរាល់ថ្ងៃលោក Warren Buffett ចំណាយពេលពី 5 ទៅ 6 ម៉ោងក្នុងការអានសៀវភៅ និងកាសែតដោយយល់ឃើញថា វាជារឿងដ៏រីករាយមួយក្នុងគិតអំពីបញ្ហាអាជីវកម្ម និងការវិនិយោគ។ លើសពីនេះការតាមដាន និងរក្សាទុកលើព័ត៌មានអាជីវកម្ម និងព្រឹត្តិការណ៍ថ្មីៗ គឺជាមធ្យោបាយដ៏សាមញ្ញមួយដើម្បីទទួលបានអត្ថប្រយោជន៍ក្នុងការប្រកួតប្រជែង។

លោកស្រី Susan Buffett បានប្រាប់ឲ្យដឹងថា « លោក Warren Buffett ស្រលាញ់ការអាន និងចូលចិត្ត ដោយសារតែគាត់ជាមនុស្សប្រកួតប្រជែង ហើយគាត់តែងតែចំណាយពេលអង្គុយអានរឿងជាច្រើននៅក្នុងការិយាល័យតែម្នាក់ឯង ដែលមនុស្សគ្រប់រូបអាចអានបានប៉ុន្តែគាត់ស្រឡាញ់គំនិតដែលធ្វើឲ្យគាត់ក្លាយជាមនុស្សជោគជ័យ» ៕

អត្ថបទ៖ លីនី