ដូចដែលយើងបានដឹងមកហើយ កាលពីខែមុន មហាសេដ្ឋី Elon Musk បានចុះហត្ថលេខាលើកិច្ចព្រមព្រៀងមួយដើម្បីទិញយកក្រុមហ៊ុនបណ្ដាញសង្គមយក្ស Twitter ក្នុង​តម្លៃ ៤៤ ពាន់​លាន​ដុល្លារ ហើយកិច្ចព្រម​ព្រៀង​នេះ​គ្រោង​នឹង​បញ្ចប់​នៅ​ចុង​ឆ្នាំ​នេះ។ ប៉ុន្តែ នាពេលថ្មីៗនេះ លោកបាននិយាយថា ផែនការទិញ Twitter នឹងត្រូវដាក់ផ្អាកជាបណ្ដោះអាសន្ន។

យោងតាមការចុះផ្សាយរបស់សារព័ត៌មាន nhk នាយក​ប្រតិបត្តិ​នៃ​ក្រុមហ៊ុន​ផលិត​រថយន្ត​អគ្គិសនី​របស់​អាមេរិក Tesla បាននិយាយថា គាត់កំពុងកំពុងដាក់ផែនការទិញ Twitter “ផ្អាកជាបណ្តោះអាសន្ន” ខណៈពេលដែលគាត់កំពុងរង់ចាំព័ត៌មានលម្អិតអំពីចំនួនគណនីក្លែងក្លាយនៅលើវេទិកាប្រព័ន្ធផ្សព្វផ្សាយសង្គមមួយនេះ។

នៅក្នុង tweet កាលពីថ្ងៃសុក្រ លោក Musk និយាយថា Twitter ប៉ាន់ស្មានថា spam និងគណនីក្លែងក្លាយមានតិចជាង ៥ភាគរយនៃអ្នកប្រើប្រាស់ទាំងអស់។ គាត់នឹងផ្អាកកិច្ចព្រមព្រៀងរហូតដល់គាត់ទទួលបានព័ត៌មានលម្អិតដែលត្រូវនឹងការគណនានេះ។ ទោះជាយ៉ាងណាក្ដី លោក​បាន​បន្ថែម​ថា លោក​នៅ​តែ​ប្តេជ្ញា​ចិត្ត​ចំពោះ​ការ​ទិញ​យក​នេះ៕

អត្ថបទ៖ លីនី
ប្រភព៖ nhk