យោងតាមការចុះផ្សាយរបស់សារព័ត៌មាន fortune បានឱ្យដឹងថា ចានផ្កាយរណប Starlink របស់មហាសេដ្ឋី Elon Musk បានបញ្ជូនមកដល់អ៊ុយក្រែនហើយ បន្ទាប់ពីនាយកប្រតិបត្តិ SpaceX បានបង្ហោះសារថា បច្ចេកវិទ្យាកំពុងដំណើរការ។

ការមកដល់នៃចានផ្កាយរណបនេះ គឺត្រឹមតែពេលប៉ុន្មានម៉ោងប៉ុណ្ណោះបន្ទាប់ពី Elon Musk បានសន្យាជាមួយឧបនាយករដ្ឋមន្ត្រីអ៊ុយក្រែន លោក Mykhailo Fedorov ថាគាត់នឹងជួយរដ្ឋាភិបាលតភ្ជាប់ទៅបណ្តាញអ៉ីនធឺណេតដែលមានមូលដ្ឋានលើផ្កាយរណបរបស់ SpaceX ដោយបញ្ជូនស្ថានីយ Starlink ចូលទៅក្នុងតំបន់សង្រ្គាម។

ជាមួយគ្នានេះ កាលពីល្ងាចថ្ងៃច័ន្ទ លោក Fedorov បានបង្ហោះរូបភាពនៃឡានកងទ័ព ដែលហាក់ដូចជាផ្ទុកទៅដោយស្ថានីយ៍មូលដ្ឋានសម្រាប់សេវាអ៉ីនធឺណិតផ្កាយរណប Starlink របស់ SpaceX រួមជាមួយនឹងសារដ៏សាមញ្ញមួយថា៖ “Starlink—នៅទីនេះ។ សូមអរគុណ @elonmusk “៕

អត្ថបទ៖ លីនី
ប្រភព៖ fortune