នៅពេលនិយាយពីអាជីវកម្មអនឡាញ គឺពិតជាពេញនិយមខ្លាំងមែនទែននៅក្នុងពេលបច្ចុប្បន្ននេះ ជាពិសេសនៅក្នុងបរិបថកូវីដ-១៩ ដែលធ្វើឱ្យមនុស្សម្នាស្ទើរទូទាំងពិភពលោកងាកមករកការទិញទំនិញតាមអ៉ីនធឺណេត។ ថ្ងៃនេះដែរ khmernotebusiness សូមបង្ហាញនូវកំពូលអ្នក Live លក់ផលិតផលដ៏ល្បីបំផុតនៅចិនម្នាក់ ដែលបានសាងអាណាចក្រអាជីវកម្មអនឡាញចាប់តាំងពីបាតដៃទទេររហូតដល់ល្បីល្បាញខ្លាំង។
Viya ដែលមានឈ្មោះពិតថា Huang Wei ហើយបច្ចុប្បន្នមានវ័យ ៣៦ឆ្នាំ បានក្លាយជា កំពូលអ្នក Live លក់ផលិតផលល្បីបំផុតនៅចិននៅលើបណ្ដាញ microblogging Weibo និងនៅលើទីផ្សារ Taobao ដែលជាប្រតិបត្តិការពាណិជ្ជកម្មសង្គមរបស់ក្រុមហ៊ុន Alibaba Group Holding។ មុនពេលក្លាយជា ស្រ្តីដ៏មានឥទ្ធិពលនៅលើអាជីវកម្មអនឡាញ នៅវ័យ ១៦ឆ្នាំ Viya បានចាកចេញពីផ្ទះទៅធ្វើការនៅទីក្រុងប៉េកាំង ជាផ្នែកលក់នៅផ្សារលក់ដុំក្បែរសួនសត្វប៉េកាំង។
នាងមិនបានរៀនថ្នាក់មហាវិទ្យាល័យនោះទេ តែនាងមានមហិច្ឆតាចង់ក្លាយជាអ្នកមាន ហើយល្បីល្បាញ។ នៅក្នុងឆ្នាំ២០០៣ ក្នុងអំឡុងពេលការផ្ទុះជំងឺ Sars នាងបានក្លាយជាមនុស្សគ្មានការងារធ្វើ ហើយសម័យនោះលុយពិបាករកណាស់ ហើយនាងបានព្យាយាមសន្សំសំចៃដោយរស់នៅក្នុងផ្ទះជួលដោយគ្មានបង្គន់ផ្ទាល់ខ្លួនទេ តូចចង្អៀតគ្មានសូម្បីខ្យល់ចេញចូល ហើយជិះរថយន្តក្រុងដែលមានតម្លៃ ១យ័ន (ប្រមាណ ០.១៦ ដុល្លារ) ប៉ុណ្ណោះ ថោកជាងការដឹកជញ្ជូនទំនិញតាមម៉ាស៊ីនត្រជាក់ទៅទៀត នេះបើយោងតាមបទសម្ភាសន៍ថ្មីៗនេះរបស់ Viya ជាមួយប្រព័ន្ធផ្សព្វផ្សាយចិន។
ទោះជាយ៉ាងនេះក្តី ក្ដីស្រម៉ៃដើម្បីក្លាយជាអ្នកមាន និងល្បីល្បាញនៅតែមាន ដោយក្នុងឆ្នាំ២០០៣ដដែល Viya និងស្វាមី Dong Haifeng បានបើកហាងតូចមួយចចេញពីដើមទុនចំនួន ៦,០០០យ័ន (ប្រមាណជា ៩៤២ដុល្លារ) ប៉ុន្តែលុយដែលរកបានពីការបណ្តាក់ទុននោះត្រូវបានបាត់បង់នៅពេលដែលប្តីប្រពន្ធនេះបើករោងចក្រតូចមួយផលិតទំនិញប្រើប្រាស់។ ក្រោយមកដោយជឿជាក់លើរូបរាង និងសមត្ថភាពច្រៀងរបស់នាង Viya បានចូលប្រឡូកក្នុងវិស័យសិល្បៈក្នុងឆ្នាំ២០០៥ ដោយបង្កើតក្រុមចម្រៀងនារី ក្រោយមកនាងបានដឹងថា មុខរបរជាអ្នកចម្រៀងរបស់នាង មិនបានរកប្រាក់គ្រប់គ្រាន់ដូចដែលនាងគិតដំបូងឡើយ។ ដូច្នេះនាង និងស្វាមីបានផ្លាស់ទៅរស់នៅទីក្រុង Xian នៃខេត្ត Shaanxi ភាគពាយ័ព្យ ជាកន្លែងដែលពួកគេបានបើកហាងសំលៀកបំពាក់មួយ។
ពេលនោះហើយ ដែលធ្វើឱ្យ Viya សម្រេចចិត្តវិនិយោគលើពាណិជ្ជកម្មអេឡិចត្រូនិក ពោលគឺនៅពេលដែលនាងបើកហាង មានភ្ញៀវម្នាក់ចូលមករើស និង ល ខោអាវស្ទើរតែពេញហាង ហើយនៅតែមិនត្រូវចិត្ត និងមិនបានទិញសូម្បីតែមួយ ផ្ទុយទៅវិញអតិថិជនម្នាក់នោះបានបើកគេហទំព័រ Taobao ហើយស្វែងរកសម្លៀកបំពាក់ដែលនាងបានល។ បន្ទាប់ពីបិទហាង នាងបានផ្លាស់ទៅទីក្រុង Guangzhou នៃខេត្ត Guangdong ភាគខាងត្បូង ខណៈពេលដែលហាងអនឡាញរបស់នាងនៅលើ Taobao ទទួលបានជោគជ័យតិចតួច Viya បានទទួលឱកាសផ្លាស់ប្តូរជីវិតនៅពេលដែលនាងត្រូវបានអញ្ជើញដោយ Taobao ក្នុងនាមជា “Taobao Girls” របស់ខ្លួនក្នុងការឡាយលក់។ នៅខែឧសភា ឆ្នាំ២០១៦ នាងបានចាប់ផ្តើមការឡាយផ្ទាល់ដំបូងរបស់នាង ដោយសារជំនាញលក់ដ៏ខ្លាំងរបស់នាងនៅពីមុខកាមេរ៉ា ដែលមានដុងតាំងពីក្មេង ហើយធ្លាប់ជានារីផ្នែកលក់នៅទីផ្សារលក់ដុំនៅទីក្រុងប៉េកាំង រួមជាមួយនឹងប្រជាប្រិយភាពក្នុងចំណោមអ្នកទិញទំនិញតាមអ៉ីនធឺណេត ក៏ដូចជាការផ្តល់ជូនពិសេសដែលផ្តល់ដោយអ្នកផ្គត់ផ្គង់ បានធ្វើឱ្យនាងកាន់តែមានទំនុកចិត្តនៅក្នុងការឡាយ ហើយទទួលបានជោគជ័យជាបន្តបន្ទាប់។
Viya លក់គ្រប់យ៉ាងរាប់តាំងពីគ្រឿងសម្អាង និងផលិតផលថែរក្សាស្បែក អាហារសម្រន់ របស់ប្រើប្រាស់ក្នុងផ្ទះ រហូតដល់រថយន្ត និងសូម្បីតែការបាញ់បង្ហោះរ៉ុក្កែត។ ការលក់របស់នាងចាប់ផ្តើមកើនឡើងក្នុងល្បឿនយ៉ាងលឿន នាងលក់ទំនិញបានប្រហែល ២.៧ ពាន់លានយ័ន (ប្រមាណជាង ៤២៣លានដុល្លារ) ក្នុងឆ្នាំ២០១៨ ហើយនៅឆ្នាំ២០១៩ ចំនួននេះនាងអាចបង្កើតបានត្រឹមពេល ២ ទៅ ៣ថ្ងៃ ខណៈនៅឆ្នាំ២០២០ នាងអាចធ្វើបានត្រឹមតែប៉ុន្មានម៉ោងប៉ុណ្ណោះ។ នៅពេលដែលការលក់របស់ Viya កើនឡើង Alibaba នឹងផ្តល់ឱ្យនាងនូវទំនិញបន្ថែមទៀតដើម្បីផ្សព្វផ្សាយដល់ទស្សនិកជនយ៉ាងច្រើន។ ចរាចរណ៍តាមអ៉ីនធឺណេតកាន់តែកើនឡើង ការលក់របស់នាងកាន់តែធំ។ នាងបានក្លាយជាកំពូលអ្នកឡាយបន្តផ្ទាល់នៅលើ Taobao និងជាអ្នកដឹកនាំនៃសហគ្រាសឡាយ ដែលចូលរួមជាមួយក្រុមមនុស្សរាប់រយនាក់ និងពាណិជ្ជករជាច្រើន។ កាលពីឆ្នាំមុន Viya បានធ្វើការឡាយចំនួន ៣១០វគ្គ ឬស្ទើរតែមួយវគ្គក្នុងមួយថ្ងៃ នេះបើយោងតាមរបាយការណ៍របស់ Xinhua Daily Telegraph នៅក្នុងខែមិថុនា។ នាងបានលក់ផលិតផលដែលមានតម្លៃ ៣៨.៦ ពាន់លានយ័ន (ប្រមាណជាង ៦ពាន់លានដុល្លារ)នៅលើ Taobao ក្នុងឆ្នាំ២០២០ ដែលស្មើនឹងប្រហែលមួយភាគបីនៃការលក់របស់ហាងទំនិញនៅសហរដ្ឋអាមេរិក Macy នៅទូទាំងពិភពលោក៕
អត្ថបទ៖ លីនី
ប្រភព៖ scmp