សារព័ត៌មាន entrepreneur កាលពីថ្ងៃទី០៨ ខែមិថុនា កន្លងទៅនេះបានចុះផ្សាយថា មានមហាសេដ្ឋីកំពូលៗ និងជាម្ចាស់ក្រុមហ៊ុនលំដាប់ៗរបស់ពិភពលោកជាច្រើនរូប បានគេចវេះពីការបង់ពន្ធលើប្រាក់ចំណូលជូនរដ្ឋ។ យោងតាម ការស៊ើបអង្កេតរបស់ ProPublica បានឱ្យដឹងថា កំពូលមហាសេដ្ឋីលំដាប់ពិភពលោកជាច្រើនដែលគេចវេសមិនចង់បង់ពន្ធរួមមាន៖ លោក Elon Musk, Jeff Bezos, Warren Buffett, Michael Bloomberg, Carl Icahn, George Soros។
ផ្អែកតាមការស៊ើបអង្កេតរបស់ ProPublica បានឱ្យដឹងទៀតថា នាយកប្រតិបត្តិ Tesla លោក Elon Musk ដែលជាអ្នកមានបំផុតទី ២ នៅលើពិភពលោកមិនបានបង់ពន្ធលើប្រាក់ចំណូលជូនរដ្ឋឡើយ។ ហើយ Musk ក៏មិនមែនជាអ្នកមានតែម្នាក់នោះឡើយដែលគេចវេសពីការបង់ពន្ធប្រាក់ចំណូលក្នុងរយៈពេលពីរទសវត្សចុងក្រោយនេះទេ។ ជាក់ស្ដែង បើតាមឯកសារពន្ធដែល ProPublica បានប្រមូល និងស្រាជ្រាវ រយៈពេលជាង ១៥ ឆ្នាំមកនេះបង្ហាញថា លោក Elon Musk បានបង់ពន្ធក្នុងចំនួនតិចតួចណាស់ ហើយក្នុងឆ្នាំ២០១៨ មហាសេដ្ឋីរូបនេះមិនបានបង់ពន្ធជូនរដ្ឋឡើយ។
ទន្ទឹមនឹងនេះដែរ មហាសេដ្ឋីលំដាប់ទី១ លើលោក និងជានាយកប្រតិបត្តិក្រុមហ៊ុន Amazon លោក Jeff Bezos ក្នុងឆ្នាំ២០១៧ មិនបានបង់ពន្ធលើប្រាក់ចំណូលនោះទេ។ ក្រៅពីមហាសេដ្ឋីរាប់ពាន់លានដុល្លារ Jeff Bezos កំពូលអ្នកវិយោគ និងជាម្ចាស់អាជីវកម្មរាប់រយមុខ លោក Warren Buffett ក៏គេចវេសមិនបង់ពន្ធច្រើនបំផុតក្នុងរយៈពេលបួនឆ្នាំដែរ។
មិនតែប៉ុណ្ណោះ អតីតអភិបាលក្រុងញូវយ៉កលោក Michael Bloomberg ក៏បានធ្វើដូចគ្នាទៅនឹងលោក Elon Musk នៅប៉ុន្មានឆ្នាំថ្មីៗនេះដែរ។ ខណៈអ្នកគ្រប់គ្រងមូលនិធិការពារហានិភ័យនិងអ្នកវិនិយោគសកម្មជនលោក Carl Icahn បានគេចវេសបង់ពន្ធលើប្រាក់ចំណូលពីរដង ខណៈដែលអ្នកគ្រប់គ្រងមូលនិធិការពារហានិភ័យមហាសេដ្ឋី George Soros មិនបានបង់ពន្ធលើប្រាក់ចំណូលក្នុងរយៈពេលបីឆ្នាំជាប់ៗគ្នា។
គួរបញ្ជាក់ផងដែរថា ទិន្នន័យដែលទទួលបានដោយ ProPublica បង្ហាញនូវអ្វីដែលមិនធ្លាប់មានពីមុនមកក្នុងជីវិតហិរញ្ញវត្ថុរបស់អ្នកមានបំផុតរបស់អាមេរិក រួមទាំងមហាសេដ្ឋីចិត្តធម៌ Bill Gates និងនាយកប្រតិបត្តិក្រុមហ៊ុន Facebook លោក Mark Zuckerberg រួមទាំងមហាសេដ្ឋីជាច្រើនទៀត។ ProPublica បានបង្ហាញទៀតថា លិខិតបញ្ជាក់ពន្ធមិនត្រឹមតែបង្ហាញថាតើមហាសេដ្ឋីទាំងនេះមានប្រាក់ចំណូលប៉ុន្មាន និងចំនួនប៉ុន្មានដែលពួកគេបានបង់ពន្ធប៉ុណ្ណោះទេ ប៉ុន្តែថែមទាំងការជួញដូរភាគហ៊ុន ការវិនិយោគ ការឈ្នះឆ្នោតនិងលទ្ធផលសវនកម្មផងដែរ៕
អត្ថបទ៖ លីនី
ប្រភព៖ entrepreneur