ដូចដែលយើងបានដឹងរួចមកហើយថា កម្មវិធី TikTok គឺជាវេទិកាផ្សព្វផ្សាយសង្គមមួយដែលកំពុងពេញនិយមយ៉ាងខ្លាំងពីសំណាក់មនុស្សគ្រប់វ័យ។ វេទិកាប្រព័ន្ធផ្សព្វផ្សាយសង្គមមួយនេះ បានក្លាយជាប្រភពនៃការកម្សាន្តដ៏ពេញនិយមសម្រាប់ធ្វើវីដេអូខ្លីៗ របស់មនុស្សគ្រប់វ័យគ្រប់មជ្ឈដ្ឋាន ដោយចែករំលែកវីដេអូជាច្រើនប្រភេទដូចជា ការចំអិនម្ហូប វិធីថែរក្សាសម្រស់ ការរាំ វីដេអូបែបកំប្លែង និងវីដេអូកម្សាន្តជាច្រើនប្រភេទទៀត ដែលអាចធ្វើឱ្យអ្នកប្រើប្រាស់បណ្ដាញសង្គមមួយនេះមានភាពល្បីល្បាញ ហើយអាចរកប្រាក់បានតាមរយៈកម្មវិធីមួយនេះទៀតផង។
ជាក់ស្ដែង យុវជនវ័យ ២១ ឆ្នាំមួយរូប ដែលមានឈ្មោះថា Khaby Lame (ឈ្មោះពិត Khabane Lame) កំពុងទទួលបានការគាំទ្រយ៉ាងខ្លាំងនៅលើ TikTok ដោយមានអ្នកគាំទ្រ (followers) ជាង ៥០លាននាក់ និងអ្នកទស្សនាវីដេអូរបស់បុរសរូបនេះ ដល់ទៅរាប់លាននាក់ឯណោះ ដែលធ្វើឱ្យគាត់ក្លាយជាបុគ្គលដ៏សំខាន់សម្រាប់ការឧបត្ថម្ភលើការបង្ហោះលើបណ្តាញសង្គម។ បើយោងតាមគេហទំព័រ Celebs Life Reel តារា TikTok ដែលបច្ចុប្បន្នរស់នៅក្នុងប្រទេសអ៉ីតាលីរូបនេះ អាចរកប្រាក់បានចន្លោះពី ១៣,៣៨០ ទៅ ២២,៣០០ ដុល្លារក្នុងមួយវីដេអូដែលបានផុស។
ឆ្ងល់អត់ហេតុអ្វីបានជា Khaby Lame ល្បីខ្លាំងនៅលើ TikTok ហើយអាចរកប្រាក់បានច្រើនបែបនេះ តាមរបៀបណា? ជាការពិតណាស់ ខណៈមនុស្សជាច្រើនបានបង្ហោះវីដេអូកម្សាន្ត ដើម្បីព្យាយាមទាក់ទាញអ្នកទស្សនាក៏ដូចជាអ្នកគាំទ្រ យុវជន Khaby បានកសាងភាពល្បីល្បាញតាមរយៈការបង្កើត និងបង្ហោះវិដេអូកំប្លែង ជាមួយការលេងទឹកមុខស្ងួត ឆ្លើយតបទៅនឹងប្រភេទវីដេអូបែប “life hacks” ជាមួយវិធី ឬ ដំណោះស្រាយដែលងាយស្រួល និងសាមញ្ញបំផុត។ អ្វីដែលពិសេសជាងនេះទៅទៀតនោះ អ្នកគាំទ្រម្នាក់បានខមិនថា “ ខ្ញុំចូលចិត្តរៀនពីបុរសនេះជាងនៅសាលា” ។ ការចុះខមិនមួយទៀតសរសេរថា “តើសាលាមានចំណុចអ្វីសំខាន់ នៅពេលដែលយើងមាន Khaby?” ហើយអ្នកប្រើប្រាស់ TikTok ម្នាក់បានអត្ថាធិប្បាយថា “តើអ្វីដែលជាចំណុចពិសេសរបស់បុរសម្នាក់នេះ? នោះគឺ គាត់បានកែតម្រូវមនុស្សដែលកំពុងធ្វើខុសនៅពេលដែលយើងដឹងច្បាស់ថាត្រូវធ្វើយ៉ាងម៉េច ហើយគាត់រកលុយបានតាមវិធីនេះ” ៕
អត្ថបទ៖ លីនី
ប្រភព៖ distractify